Saumaherbergi Hellenar

Viðurkenning

2012-01-23T19:25:00.003Z

Hún Anneli, sem er með bloggsíðuna Annelis hantverk, var svo hugguleg að senda mér viðurkenningu á blogginu sínu. Kærar þakkir, Anneli!! Ég hvet ykkur, sem lesið síðuna mína, að kíkja í heimsókn til hennar. Hún skrifar um ýmislegt auk handavinnu og tekur mjög fallegar myndir.

Tusen takk, Anneli, for denne award!!

Þæfð karfa og bókakaup

2012-01-14T11:35:00.008Z

Ég er löngu búin að kveðja jólin, en átti samt eftir að sýna þessa þæfðu körfu, sem ég prjónaði fyrir jól. Uppskriftin er af Drops jóladagatalinu og notaði ég tvöfaldan plötulopa en fór að öðru leyti eftir uppskriftinni. Ég þurfti reyndar að þvo körfuna þrisvar til að fá hana í góða stærð. Lopinn var fallega jólarauður, sérlitaður fyrir Handprjónasambandið.

Svo lét ég verða af því að fá mér þessa bók. Hún er mjög falleg, og mér finnst mjög gaman að prjóna kúlur. Ég pantaði hana á Amazon í Bretlandi. Hún var fljót að skila sér og kostaði ekki nema 3400 krónur, komin í mínar hendur. Hlakka til að prjóna upp úr henni.

Svo ætla ég líka að sýna þessa bók. Hana pantaði ég líka af Amazon í Bretlandi og kostaði hún 1830 kr. Í henni er fullt af teppum, sum flokkuð eftir þjóðernisstíl.

Þetta er samt teppið sem olli því að ég keypti bókina, teppi í sænskum sveitastíl. Ég VERÐ að hekla það.

Jólakönnumottur

2011-12-30T13:41:00.006Z

Ég hafði nú hugsað mér að sauma svona könnumottur fyrir jól, en gerði þær í gær. Ég er líka hætt að miða alltaf við næstu jól, það koma jól á hverju ári, og hlutirnir fá bara sinn tíma til að klárast.

Ég fór eftir sniði frá Elínu Guðjónsdóttur, en af því mig langaði fyrst að búa til svona litlar mottur, þá teiknaði ég blokkina upp í EQ7, og saumaði með pappírssaumi í minni stærð en uppgefnar eru hjá henni. Svo notaði ég nokkur af þeim 222 sporum sem eru í dásamlegu saumavélinni minni, og eru þá 3 leturgerðir ekki taldar með. Þó maður noti kannski svona spor ekki mikið, þá segi ég eins og góð kona sagði: Ég vil frekar hafa öll þessi spor og þurfa aldrei að nota þau, heldur en að hafa þau ekki og þurfa á þeim að halda. Ég valdi jólalegustu mótífin.

Sniðið hennar Elínar fæst í Quiltkörfunni í Faxafeni.

Theodóra á peysufötum

2011-12-27T16:15:00.006Z

Þessa dúkku, hana Theodóru, prjónaði ég í haust að mestu, en átti svo eftir alls konar smáfrágang, sem ég var að ljúka við í dag.

Undir peysufötunum er hún í klukku og nærbuxum. Ég átti klukku þegar ég var pínulítil, og man eftir því.

Þetta eru peysufötin, og í skónum eru meira að segja íleppar! Dúkkan og flest fötin eru prjónuð úr léttlopa, en skór og sokkar, ásamt íleppunum, eru úr einbandi. Uppskriftin er keypt hér.

Prjónaskapur af ýmsu tagi

2011-12-12T21:12:00.010Z

Hún Úlfhildur Sjöfn, litla frænka mín, varð 4 ára þann 10. desember, og þá færði ég henni þessa lopapeysu. Uppskriftin er á heimasíðu Ístex.

Litla systir hennar, Salvör Veiga, þurfti að fá jólasveinahúfu til að vera eins og stóra systir. Ég prjónaði eins húfu á Úlfhildi Sjöfn fyrir tveimur árum. Uppskriftin er hér.

Þegar ég var búin að prjóna alla sokkana hér að neðan úr afgöngum af léttlopa, sem safnast reglulega upp hjá mér, náði ég að prjóna þetta teppi með Dómínó aðferðinni, og kláraði fullt af litlum hnyklum. Ég gerði ekki kant, því ég er að hugsa um að geyma það og bæta við það seinna þegar meiri afgangur safnast upp. Það eiga að vera takkar kringum teppið.

Þessi 12 sokkapör ásamt 7 öðrum, samtals 19 pör af sokkum á tveggja, fjögurra og sex ára, setti ég í verkefnið Jól í skókassa sem KFUM og K heldur utanum hvert ár.

Svo datt ég í jólakúluprjón og er búin að prjóna 12 kúlur. Ég prjóna eftir uppskrift frá Prjóna Jónu, sem er að finna á Facebook síðu hennar. Ég nota léttlopa og prjóna no. 4. Ég fékk þennan fallega jólarauða lit í Handprjónasambandinu, en mér skilst að þetta sé sérlitað fyrir það og bara selt þar. Það er með fleiri liti sem Ístex sérlitar fyrir það.
Ég hengi kúlurnar neðan í hringstigann okkar.

Loks er hér mynd af prjónuðum umbúðum utan um pakka, sem ég fór með á jólahlaðborð í vinnu mannsins míns. Þar var pakkaleikur, og sú sem fékk þennan var mjög ánægð með hann og það staðfesti fyrir mér að fólki finnst vænt um að fá handunna hluti.

Jóladúkur

2011-11-27T16:49:00.005Z

Þennan jóladúk var ég að sauma og á hann að vera á eldhúsborðinu.

Sniðið fann ég í blaði sem fæst ennþá í Eymundsson og heitir Quilting Celebrations.

Það er gefið út af Patrick Lose, og hef ég verið að horfa á hann á QNN. Þótt ég sé ekki hrifin af öllu sem hann gerir er líka margt áhugavert hjá honum. Hann applíkerar mikið í saumavél, og notar gjarnan satínsporið til þess eins og ég hef gert hérna, en í þessum dúk bregður hann út af vananum og lætur gera það fyrir sig í höndunum. Með öllu þessu má fylgjast á QNN í nýjustu þáttunum hans.

Teppi á nýjan vegg

2011-11-12T12:16:00.003Z

Hugmyndina að þessu teppi fékk ég í tímariti á bókasafninu fyrir nokkrum árum. Ég geymdi hana í EQ og nú er ég loksins búin að sauma það.

Það er samt nokkuð breytt, og blokkirnar fékk ég úr EQ7.

Skólateppi

2011-10-10T16:48:00.007Z

Hvað er meira viðeigandi fyrir kennara en að sauma lítið veggteppi, sem minnir á skólabyrjun að

hausti?

Teppið er af sama diski og það, sem ég sýndi í þar síðustu færslu.

Ég þurfti reyndar að breyta stærðinni, og gerði það með hjálp EQ7. Ég minnkaði teppið töluvert til að láta það passa á þann vegg, sem ég ætlaði því.

Þetta var fyrsta verkefnið sem ég stakk á nýja saumaborðinu, og það var æði.

Nýtt saumavélarborð

2011-10-07T16:18:00.009Z

Í sumar var ég alveg með það á hreinu að mig vantaði saumavélarborð, þar sem saumavélin væri felld ofan í borðið. Mér finnst mjög vont að stinga stór teppi á þessum akrýlborðum sem fylgja vélunum sem bútasaumsborð. Það vill togast í teppin og er bara erfitt að mata vélina jafnt. Ég var búin að finna borð á netinu og ætlaði að panta þetta borð í gegnum ShopUSA. Það kostar 249 dollara en hingað komið var það á 70 þúsund!! Ég tímdi því alveg, því kosturinn við þetta borð er að það er fyrirferðarlítið og hægt að leggja það saman með örfáum handtökum.

En þá greip eiginmaðurinn inn í og bauðst til að smíða svona borð fyrir mig, enda er hann bæði einstaklega handlaginn og viljugur. Og nú er borðið tilbúið. Hann hafði stærðina á ameríska borðinu til viðmiðunar, en við gátum samt haft það aðeins lengra, eins og okkur fannst henta. Það er fest með festingum við gamla saumaborðið, og er algjörlega stöðugt fyrir vikið, og svo myndast mjög gott pláss á borðinu fyrir aftan til að taka við teppunum, því það er hornborð.

Svo vissi hann að ég vildi geta tekið borðið saman með örfáum handtökum og geymt það og því þyrfti að vera hægt að leggja fæturna saman. Ekki málið.....þá gerði hann það bara þannig.

Og rúsínan í pylsuendanum.....hann lét líka sníða heila plexíglerplötu til að ég gæti notað það sem ljósaborð þegar ég þyrfti, alveg eins og hægt er að gera á ameríska borðinu!

Þetta borði kostaði sama og ekki neitt. Hann fékk MDF plötur hjá Húsasmiðjunni, fætur í IKEA og plexíglerplöturnar í Akron.

Starry Night

2011-10-05T16:53:00.004Z

Þetta litla, haustlega veggteppi var ég að klára og hengdi það upp í eldhúsinu. Munstrið er fengið af diski, sem ég pantaði frá Electric Quilt Company, og hefur að geyma snið og leiðbeiningar að bútasaumsmyndum eftir þær Cori Dereksen og Myra Harder.

Ég hef áður saumað eftir munstri frá þeim og er mjög hrifin af þeim. Það leið ekki nema rúm vika frá því ég pantaði diskinn og þar til hann var kominn í hús.

Vesti

2011-10-03T14:48:00.004Z

Þetta vesti prjónaði ég fyrir nokkrum vikum. Það er úr Lopa og bandi, nýja blaðinu sem gefið var út í haust.

Í stroffið er notaður tvöfaldur plötulopi, en í bolinn einfaldur plötulopi og einband.

Haustlöber

2011-09-12T14:42:00.003Z

Þennan dúk sá ég í blaðinu "Fons and Porter´s Love of Quilting", nýjasta tölublaðinu.

Hann er applíkeraður í vél með tunguspori.

Hann liggur nú á sófaborðinu mínu og gefur stofunni smá haustblæ.

Bleiubuxur

2011-09-04T17:17:00.006Z

Þegar ég fór í sumarbústað í sumar hafði ég með mér garn og uppskrift að bleiubuxum. Ég byrjaði sem sagt að prjóna þær þar og hélt svo áfram fram eftir sumri. Mér fannst skemmtilegt að prjóna þetta og uppskriftin lærist fljótlega.

Ég sendi þær allar í Rauðakrossinn til að styðja þetta verkefni RKÍ. Ég prjónaði 20 stykki, helminginn á 3ja mánaða og hinn hlutann á 9 mánaða. Uppskriftin er úr "Garn og gaman" eftir Prjónajónu. Ég notaði ungbarnagarn úr ull af ýmsum tegundum, aðallega Lanett, Smart og Trysil.

Skólataska

2011-08-26T19:51:00.007Z

Mig bráðvantaði tuðru til að hafa með í vinnuna fyrir nestið, pappíra og prjónana (þeir eru nauðsynlegir á löngum fundum og námskeiðum - skerpa athyglina). Ég fann ekkert sem mér líkaði, og þá var ekki annað í boði en að sauma hana sjálf.

Ég átti efni með gamaldags skólamyndum sem ég keypti fyrir 12-14 árum í Glugghúsi í Hafnarfirði, en vissi aldrei hvað ég átti að gera við það. Ég tók það fram í gær og saumaði þessa tösku, og fór með hana í vinnuna í morgun - og er ánægð með útkomuna.

Ég er svakalega veik fyrir svona panelum, og þetta efni með saumavélunum keypti ég í Virku fyrir stuttu, og er búin að plana veggteppi með myndunum. Ég er líka svo hrifin af saumavélamótívinu sem slíku.

Svo kom ekkert annað til greina en að kaupa þetta í Quiltkörfunni í vetur, en hvað ætti ég að gera úr því? Mér dettur eitthvað í hug þótt síðar verði.

Mér finnst bara gaman að taka þetta efni upp og skoða það af og til.

Svo stóðst ég ekki mátið og keypti þetta jólaveggteppi í Bót á Selfossi í sumar. Mér finnst það bara svo fallegt, og hlakka til að búa til ramma og fá svo að stinga það af hjartans lyst.

Mug Rug

2011-08-22T21:29:00.005Z

Þessa könnumottu saumaði ég eftir pöntun. Þetta er bara önnur mottan sem ég sauma, en sú fyrri hefur verið í daglegri notkun síðan hún var saumuð. Gerði þessa eftir sama formi og hina í EQ7 en skipti bara um mynd.

Motta undir rokkinn

2011-08-14T18:32:00.011Z

Fyrr í sumar var ég svo heppin að fá rokkinn hennar ömmu til eignar, en móðursystir mín hafði varðveitt hann. Amma var fædd árið 1899, og fékk rokkinn 15 ára gömul og spann á hann alla sína ævi. Hann er nettari en margir rokkar.

Ég heklaði mottu undir hann eins og ég sá undir rokkunum á Heimilisiðnaðarsafninu á Blönduósi í sumar. Uppskriftina fann ég í eldgömlu, sænsku heklublaði, Marks, en við mamma söfnuðum þeim hér áður fyrr og hekluðum í gríð og erg.

Hlaupastelpan á rokknum var týnd, en hún kemur ábyggilega í leitirnar síðar. Ég fékk hins vegar rokkasmið í Grafarvoginum, sem þær hjá Heimilisiðnarðarfélaginu bentu mér á, til að smíða nýja hlaupastelpu, og tókst það svona vel.

Svo fylgdi snældustokkurinn með, en ég á eftir að setja á hann hnykla.

Hér eru myndir af rokkunum frá Blönduósi,

og þar fékk ég hugmyndina að mottunni. Hún er hekluð úr léttlopa.

Ný lopapeysa

2011-08-08T20:38:00.004Z

Ég get ekki sagt að mig hafi VANTAÐ nýja lopapeysu, en bætti þó þessari í safnið í sumar af því að mig langaði í ljósa peysu. Ég prjónaði dökka í fyrra, og er hún mikið notuð. Þessi er prjónuð á prjóna nr. 7 úr tvöföldum plötulopa. Tölurnar eru úr skelplötu.

The Eldredge E

2011-07-27T17:33:00.010Z

Ég datt heldur betur í lukkupottinn í gær. Lengi, lengi hefur mig langað í svona gamla saumavél, og helst af öllu eintak, sem hefur tilheyrt fjölskyldunni. Ég vissi af einni hérna áður fyrr, en hún var glötuð.

Ég var því aðeins farin að kíkja á vélar í antikbúðum, en langaði samt mest að fá vél tengda fölskyldunni eða öðrum kunnugum.

Í gær heyrði yngri bróðir minn mig tala um þetta, þar sem við hittumst í kaffi, og viti menn! Hann sagðist þá vera með svona vél í geymslunni hjá sér, sem hann hafði bjargað fyrir mörgum árum frá því að vera hent! Hann sótti vélina og færði mér hana!!! Hún var áður í eigu látinnar frænku okkar.

Brosið fór ekki af andlitinu á mér þegar ég ók heim með vélina í skottinu. Ég þurrkaði aðeins af henni og stillti henni upp, og er alveg rosalega ánægð með útlitið á henni, hefði ekki getað verið heppnari með eintak. Mér leið í gær eins og komin væru jól!

Stjörnuteppi

2011-07-17T21:14:00.005Z

Nú er ég búin að fá nýjan vegg, og auðvitað vantaði teppi á hann. Ég á reyndar fleiri nýja fleti sem þarf að hengja eitthvað á. Þessi veggur er hár, svo teppið varð að vera frekar langt.

Ég hef alltaf verið hrifin af stjörnum, hvort sem er í bútasaum, útsaum eða prjóni, svo það lá beint við að nota það mótív. Ég stal hugmyndinni af netinu, þar sem ég sá þetta teppi, og teiknaði blokkirnar upp í EQ7 og lengdi teppið, og bjó svo til rétta stærð fyrir mig. Stjörnurnar eru saumaðar með pappírssaumi.

Svo stakk ég allt með krákustígsspori, og var ég að prófa nýjan tvinna til að stinga fríhendis með, og gekk það eins og í lygasögu, en vélin mín er kresin með tvinna, hef lent töluvert í því að hún slítur hann, en þó hefur þetta verið mjög misjafnt. En núna var þetta bara gaman!

Riddari

2011-07-06T20:49:00.004Z

Þessa peysu var ég að klára handa eiginmanninum. Ekki veitir af hlýjum lopafatnaði þar sem við erum á leið á Norðurlandið í sumarfrí....;)

Uppskriftin er úr Lopa 28 og heitir Riddari. Þar er hún prjónuð lokuð, en ég ákvað að hafa hana opna. Ermarnar virðast of síðar á myndinni, en eru það ekki í raun. Ég ætlaði að fara að spretta þeim upp í dag og taka úr umferðir, en þetta liggur sennilega í því að þær voru of teygðar þegar ég lagði peysuna til þerris, og dugar að bleyta þær aftur og leggja í rétt mál. Svona er að flýta sér, betra að hafa málbandið við hliðina!

Marti Mitchell í Virku

2011-07-01T10:53:00.007Z

Fyrir rúmri viku kom Marti Mitchell í heimsókn í Virku. Hún var með smá námskeið og sýnikennslu, og mættu um 70 konur á svæðið, enda þröngt á þingi.

Marti Mitchell er þekkt fyrir kennslu sína og framleiðslu á stikum til að sníða eftir. Á tveimur efstu myndunum sýnir hún hvernig hægt er að gera teppi eftir tveimur mismunandi stærðum í stikusetti. Stærðirnar voru reyndar fleiri en þetta.

Ég á bókina með þessu teppi og stikurnar, og ætla að sauma það einn góðan veðurdag.

Svo keypti ég þessa stiku, Flying Geese Ruler, hún er mjög praktísk fyrir mig, þar sem þetta er eitt af uppáhalds munstrum mínum. Hins vegar er ég ekki mikil stikukona, þótt ég eigi þessa og bjálkakofastikurnar, því ég er svo mikið í pappírssaum og nota EQ7 við næstum allt sem ég geri. Mér fannst hins vegar mjög gaman að hitta þessa konu, því fyrsta bútasaumsbókin, sem ég keypti mér þegar ég var að byrja í bútasaum fyrir um 24 árum, var einmitt eftir hana. Svo hef ég horft á kennsluþætti og fleira með henni á QNNtv, og hún er svo skemmtileg, fræðandi og hógvær á allan hátt.

Annar sumarkjóll

2011-06-23T09:33:00.004Z

Fyrir síðustu helgi saumaði ég mér annan sumarkjól. Hann er saumaður eftir Onion sniði sem ég hef saumað þrjár flíkur eftir áður. Efnið keypti ég í Föndru.

Rykkingin í bakinu gerir mikið fyrir sniðið.

Dúkkudress

2011-06-18T19:53:00.003Z

Þetta dúkkudress prjónaði ég í vor. Það er prjónað úr Sisu garni.

Uppskriftin er úr Prjónablaðinu Ýr nr. 42.

Sumarkjóll

2011-06-08T18:11:00.003Z

Ég saumaði þennan sumarkjól í síðustu viku. Sniðið er nr. 2013 frá Onion og keypt í Föndru.

Fleiri cupcakes

2011-05-30T17:17:00.007Z

Fyrir nokkru lauk ég við að sauma út annað viskustykki.

Mótífíð var það sama og síðast.

Þetta munstur fann ég á netinu. Slóðin er hér.

Svo er alveg tilvalið að applíkera bollakökur á gömul viskustykki. Sé til með það.

Hrím

2011-05-25T16:42:00.003Z

Nú er ég búin að prjóna aðra peysu úr léttlopa á eldri soninn, og í þetta sinn munstraða. Ég var talsvert lengur að prjóna þessa en þá fyrri, en hún varð eins og hann vildi hafa hana, frekar þröng. Uppskriftin er í Lopa 29, eins og hin.

Hrærivélarhlíf

2011-05-17T17:35:00.004Z

Ég hef ætlað að sauma hlíf á hrærivélina mína í 25 ár, eða frá því ég keypti hana. Svo þegar ég sá þetta snið frá henni Elínu Guðjónsdóttur, vissi ég að tíminn var kominn! Mér finnst það svo flott og vandað hjá henni í alla staði. Sniðið er hægt að kaupa hjá henni sjálfri og líka í Quiltkörfunni. Netfangið er elingu@emax.is

Sniðið passar á Kitchenaid hrærivélar, en ég á Kenwood, svo ég þurfti að breyta því aðeins. Ég saumaði fyrst prufuhlíf úr óbleikjuðu lérefti og tók ca. 5 cm neðan af hlífinni allan hringinn. Ég minnkaði sultukrukkumótívið og hænuna niður í 85% í ljósritunarvél áður er ég sneið, en lét stærðina á blómakransinum öllum halda sér. Svo hafði ég miðjustykkið hálfri tommu breiðara en uppskriftin sagði til um. Og þá smellpassar hún líka á hrærivélina mína, sem á nú loksins eitthvað til að fara í....

Pínulítil budda

2011-05-03T20:19:00.005Z

Mig vantaði svona pínulitla buddu, og á annan í páskum saumaði ég mér hana eftir uppskrift frá Timotei. Hér er hægt að finna hana.

Ég gerði hana meira að segja aðeins minni en í uppskriftinni, hafði radíusinn á hringnum, sem byrjað er að búa til, 6 cm í stað 7.

Rósótt

2011-04-29T21:48:00.011Z

Ég keypti pakka af efnum, skornum í 5" ferninga, í Quiltkörfunni, daginn sem búðin opnaði. Þetta voru eingöngu rósótt efni, og valin af handahófi, svokallaður "charm pack".

Það var töluverð áskorun að finna verkefni þar sem ég gæti notað þessi efni eingöngu. Svo fékk ég hugmynd þegar ég sá teppi á Keepsake Quilting. Ég flokkaði þau eftir litastyrk, í ljós, meðaldökk og dökk.

Meðaldökku efnin notaði ég óbreytt að stærð í miðjuna, ljósu efnin skar ég í 4 ferninga hvern bút og notaði í hornin, og svo skar ég dökka búta í tvennt til að nota í "sashing" (veit einhver um íslenskt orð yfir þetta?).

Miðjubútana stakk ég í gegnum pappír.

Ég gataði pappírinn með saumavélinni, nokkur stykki í einu, og þá var mjög fljótlegt að búa til 16 stykki.

Og munstrið til að stinga eftir fann ég að sjálfsögðu í EQ7.

Lúruteppi

2011-04-22T22:12:00.010Z

Þetta lúruteppi var ég að ljúka við. Mig langaði í teppi þar sem ég gæti notað sem mest af efnunum mínum og nýtt litla búta líka. Svo varð ég voða ánægð þegar ég fór að undirbúa að sauma kantinn í kring og sá að ég átti nóg af afskurði af gömlum kantstrimlum sem ég gat skeytt saman og þurfti ekkert til viðbótar.

Mynstrið byggist upp á því að láta ljóst og dökkt ráða til skiptis. Ég stakk teppið fríhendis.

Ég sá fyrirmyndina sem bakgrunn í þætti á QNNtv sem ég er áskrifandi að og hef verið í nokkur ár. Ég krotaði það niður og teiknaði það svo í EQ7 forritinu mínu.

Ég skar hvern einasta bút í 16 búta ferningnum niður með þessari stiku, mest einn í einu.

Þeir urðu samtals 560 talsins. Þríhyrningarnir voru heldur fljótlegri þar sem ég saumaði þá fyrst saman sem 2 ferninga og skar svo skáhallt í sundur.

Svona leit teppið út í EQ7 hjá mér.

Gleðilega páska!

Cupcakes

2011-04-18T11:57:00.007Z

Ég verð öðru hverju að sauma krosssaum. Nú er ég búin að prjóna allar borðtuskurnar, og er ekki bara næst á dagskrá að sauma út í viskastykkin?

Ég er alltaf dálítið veik fyrir þessu mótívi, og langar til að applíkera það einhvern tíma líka.

Útsaumsgarnið þolir suðu svo það er í fínu lagi að nota það á suðuþvott. Ég á annað viskastykki og fleiri bollakökumunstur svo allt er tilbúið þegar krosssaumurinn bankar upp á næst. Viskastykkin fást í Fjarðarkaupum, sem er hverfisbúðin mín, og útsaumsgarnið líka.

Herrapeysa

2011-04-15T21:54:00.003Z

Þessi var að detta af prjónunum hjá mér. Ég prjónaði hana á eldri son minn, sem vildi hafa hana alveg einlita, en uppskriftin heitir Sátt og er í Lopa 29. Þar er hún prjónuð úr tvöföldum plötulopa á prjóna nr. 5,5. Ég notaði hins vegar léttlopa til að fá hana þynnri, en notaði sömu prjónastærð og í uppskriftinni.

Hann vildi hafa hana þrönga og ekki of stóra, og eins og sjá má þá smellpassar hún á manninn!

Ungbarnasett og dúkkuföt

2011-04-09T20:14:00.006Z

Ég varð afasystir í annað sinn þann 5. mars. Þá fæddist Salvör Veiga, og um áramótin byrjaði ég að prjóna á hana. Mamma hennar valdi litinn. Uppskriftin er í Ungbarnablaði Tinnu nr. 11.

Uppskriftirnar af þessum eru úr prjónabókinni hennar Prjónajónu, Garn og gaman.

Svo þurfti stóra systir, Úlfhildur Sjöfn, að fá eitthvað á dúkkubarnið sitt líka.

Þetta sett er prjónað eftir hinum og þessum uppskriftum, sem ég hef sankað að mér.

Teppagrind

2011-03-23T14:18:00.008Z

Lappetausa og LeKaQuilt eru með leik á síðunum sínum, þar sem fólk er beðið um að sýna teppagrindur sínar, ef það á þannig tól.

Mig hefur alltaf langað í svona grind, og keypti fyrir nokkrum árum handklæðagrind í IKEA ef ég skyldi ekki komast yfir aðrar grindur. Svo lá hún í pakkningunni þar til í gærkvöldi, þegar ég ákvað að taka þátt í leiknum hjá Elin og Lena Karen. Maðurinn minn skrúfaði hana saman, en ég er ekkert úrkula vonar um að hann smíði nú svona grip fyrir mig, annað eins gerir hann nú.

Svo þannig lítur nú teppagrindin mín út, og ég er bara nokkuð ánægð með hana!

Prjónaðir klútar

2011-03-22T20:09:00.005Z

Vegna þess að ég verð alltaf að hafa eitthvað á prjónunum, þá er ég auðvitað búin að prjóna fullt af borðtuskum, sem eru í stöðugri notkun, meira að segja rauðar og grænar fyrir jólin. Þetta eru bestu borðtuskurnar, svo það var sjálfgert að leggja þessum gömlu, keyptu.

Svo háttar þannig til að á öðru baðherberginu hér heima er ég með viðarborðplötu undir vaskinum, og vil helst hafa klúta undir sápunum til að ekki liggi vatn á borðinu. Þá datt mér allt í einu í hug að prjóna klútana til þess arna. Ég prjónað fjóra, og notaði slétt og brugðið í ýmsum útgáfum. Ég fitjaði upp u.þ.b. 60 lykkjur og notaði prjóna nr. 3. Garnið heitir "Mor Aase" og fæst í Mólý í Kópavoginum.

Kjóll

2011-03-11T21:41:00.003Z

Ég saumaði mér þennan kjól í vetrarfríinu í síðustu viku. Efnið keypti ég fyrir löngu í Handalín, jersey efni sem fellur mjög vel. Í fyrra gerði ég annan kjól eftir sama sniði, en það er frá Onion.

Taska utan um iPad

2011-03-05T14:17:00.004Z

Ég eignaðist iPad fyrir tveimur vikum, og vantaði hlífðartösku utan um hann. Ég var ekki nógu spennt fyrir töskunum sem Eplið selur, svo ég ákvað að reyna að sauma sjálf. Ég skoðaði töskur á netinu, og sá eina sem var eitthvað í svipuðum dúr.

Efnið keypti ég í Storkinum. Það er frá Kaffe Fassett, úr Westminster línunni. Ég notaði tvöfalt bómullarvatt, og saumaði það ásamt yfirborði og bakefni, og svo fóðraði ég það líka með bómullarpoka innan í, þannig að lögin eru fimmföld í allt.

Svo ákvað ég að hafa pokann opinn í annan endann til að hægt væri að hlaða tölvuna í honum, en margar töskur sem ég skoðaði á netinu eru með loki sem brettist yfir eða með rennilás. Handgerðu viðartölurnar átti ég.

Sokkar, sokkar.......

2011-03-02T18:37:00.007Z

Ég er alltaf með eitthvað á prjónunum, og ef það er ekkert sérstakt sem liggur fyrir, þá dýfi ég hendinni bara ofan í garnpokann og prjóna úr afgöngum. Þessir sokkar hér að ofan eru prjónaðir eftir uppáhalds sokkauppskriftinni minni, sem ég fann í Hug og hönd frá 2008. Þeir eru á 2 og 4 ára.

Þarna var ég að prófa stundaglashæl með garðaprjóni úr bókinni hennar Kristínar Harðardóttur, sem heitir Sokkar og fleira. Þessir eru á 2 ára.

Svo prjónaði ég sokka á sjálfa mig, og þeir eru með stundaglashæl, og eru úr sömu bók. Allir sokkarnir eru úr léttlopa.

Nálapúðar

2011-02-27T12:12:00.004Z

Ég er löngu búin að sauma þessa nálapúða, en átti bara eftir að setja í þá fyllingu.

Þeir eru saumaðir með fléttusaumi eða gamla krosssaumi úr kambgarni.

Ég var áður búin að blogga um þann rauða, en uppskriftin er úr 4. tölublaði Húsfreyjunnar frá árinu 2004.

Renningur

2011-02-22T17:41:00.005Z

Var að ljúka við að sauma þennan renning. Ég bjó hann til eftir máli í EQ7 þannig að hann passaði á gamlan tekkskenk sem við höfum undir sjónvarpinu.

Ég saumaði saman alls 16 átta tommu blokkir, 2x8 í röð, með pappírssaumi.

Þessi skenkur var á heimili mínu þegar ég var að alast upp, og mér finnst svo notalegt að vera með svona húsgögn á heimilinu sem tengjast sögu fjölskyldunnar. Við tókum bara lappirnar undan honum til að lækka hann.

"Needle turn" applíkering

2011-01-16T21:05:00.005Z

Þessi dúkur er eins konar æfingastykki fyrir mig í "needle turn" applíkeringu. Ég hef sjaldan applíkerað þannig, þó aðeins, og langaði að prófa það aftur.

Blokkina fann ég í EQ7, og valdi svo litina þannig að ég vildi hafa þá ljósa en ekki skæra.

Svo hef ég ekki prófað áður að nota samsettan bakgrunn fyrir mynd, svo nú er ég búin að því líka! En það á ég eftir að gera aftur, því mér finnst það koma vel út.

Freyja

2010-12-30T14:34:00.005Z

Þessa peysu, Freyju, prjónaði ég fyrir nokkrum vikum. Hún er úr einföldum lopa.

Ég prjónaði silfraðan tvinna inn í munstrið, en það sést lítið á myndinni.
Uppskriftin er hér á ensku og hér á íslensku.

Mug Rug

2010-12-26T15:02:00.006Z

Settist loksins niður við saumavélina. Þessar litlu mottur hef ég séð um allt á bloggunum undanfarið. Þær eru kallaðar Mug Rugs, og eru til í alls konar útfærslum. Ég "gúgglaði" með myndaleit áðan, og sá margar.

LeKaQuilt hefur saumað margar undanfarið, allar mjög flottar hjá henni. Mig vantaði einmitt mottu undir tebollann sem ég drekk í stofunni á kvöldin, svo nú er það mál leyst.

Ég notaði auðvitað EQ7 forritið mitt til að teikna í rétt mál, og prentaði eplið út og saumaði í pappír. Svo gerði ég nokkrar aðrar útgáfur, sem ég nota sauma kannski seinna. Mottan mín varð 6 x 9 tommur.

Gleðileg jól

2010-12-23T21:28:00.001Z

Gleðileg jól!

Jólasokkar

2010-12-19T12:03:00.004Z

Þessa jólasokka sá ég á blogginu hjá Anelias hantverk. Ég bara varð að prjóna þá.

Ég notað einband og prjóna no.2,5. Uppskriftin er á ensku og prjónuð fram og til baka, en ég prjónaði í hring og hafði franskan hæl.

Peysur á Úlfhildi Sjöfn og Baby Born

2010-12-15T14:44:00.010Z

Hún Úlfhildur Sjöfn varð þriggja ára 10. desember. Afasystirin prjónaði að sjálfsögðu á dömuna.

Að sjálfsögðu fylgdu sokkar í stíl. Þeir eru úr nýju prjónabókinni Sokkar og fleira eftir Kristínu Harðardóttur. Uppskriftinni fylgdi dúkkupeysa í stíl, sem auðvitað var prjónuð líka.

Peysan er úr léttlopa og uppskriftin úr Lopabók frá Ístex.

Pakki í pósti

2010-12-14T15:06:00.007Z

Þegar ég kom heim úr vinnunni í gær beið mín pakki í forstofunni.
Da jeg kom hjem fra jobben i gar, ventet en pakke pa meg.

Ég gat auðvitað ekki beðið með að opna hann en var búin að sjá að hann kom frá Noregi. Hann var frá henni Oddbjörg, bloggvinkonu minni í Noregi. Þetta er "fat quarter" af efni, sem ég sá á blogginu hennar og finnst einstaklega skemmtilegt og sérstakt, flott í saumabuddur. Svo fylgdi kort með fallegri kveðju.
Kærar þakkir, Oddbjörg!
Jeg kunne selvfölgelig ikke vente med a apne den, men sa at den kom fra Norge. Den var fra Oddbjörg, min bloggveninne i Norge. Dette er en "fat quarter" av en stoff, jeg sa pa bloggen hennes og synes er spesielt morsom og fin, passer gott til sybokser. Sa fulgte med en kort med noen fine ord. Tusen, tusen takk, Oddbjörg. Klem fra Hellen

Skokkur úr Navia

2010-12-11T12:37:00.007Z

Þennan skokk prjónaði ég úr Navia garni í sumar.

Uppskriftin er í rauninni af kjól, en ég sleppti ermunum og hafði hann síðari.

Það var dálítið erfitt að áætla síddina, því pilsið er prjónað á mjög grófa prjóna úr Navia Uno, svo eftir að ég þvoði hann, tók ég síddina, klippti af það sem var umfram og prjónaði kant úr tvöföldu Navia Duo áður en ég felldi af. Svo þurfti ég að sauma sér undirpils því þetta er svo gisið.

Dúkkuföt

2010-11-27T15:26:00.011Z

Nú ætla ég að sýna dúkkuföt sem ég gríp allaf í að gera öðru hverju.

Mér finnst meira gaman að prjóna þau en sauma. Ég tók æði og prjónaði nokkur sokkapör, með hæl, stroffi og tá eins og á alvöru sokkum.

Uppskriftirnar eru héðan og þaðan, ljósrit úr gömlum blöðum og svo kíki ég í ný blöð líka eftir uppskriftum.

Stundum geri ég allt dressið eins og hér fyrir ofan.

Hér langaði mig bara til að prjóna kjólinn.

Þetta var svo gert úr afgöngum, og peysan var úr þrenns konar hvítum garnafgöngum.

Tölutöskur

2010-11-11T16:12:00.004Z

Lauk við að sauma þessar töskur fyrir viku. Ég saumaði báðar samtímis, svo ég nennti að gera tvær. Aðra ætla ég að gefa. Þessi efri er úr efnum úr "stashinu" mínu.

Þessi hér að ofan er úr svokölluðum "charm pack" frá Moda, sem ég keypti hjá Quiltbúðinni á Akureyri. Í uppskriftinni er einmitt gert ráð fyrir að maður noti 5" búta úr "charm pack". Verst hvað maður þarf að sletta mikilli ensku í þessum texta, kannski er hægt að nota orðið sjarmabúnt, en svona pakkar eru sýnishorn af efnalínum framleiðenda, þar sem enginn bútur er eins en allir passa saman.

Sniðið er héðan.

Borðmottur fyrir aðventuna

2010-10-29T18:46:00.003Z

Mig langaði að gera jólalegar borðmottur í eldhúsið, og hafði lengi hugsað mér að nota þetta munstur, sem heitir "Lover´s Knot". Motturnar eru í gömlu, íslensku bútasaumsblaði.

Ég notað EQ7 forritið til að teikna blokkirnar upp og reikna út skurðarbreiddina á efninu, til að fá passlega stærð á motturnar fyrir minn smekk.

Svo stakk ég í saumförin í saumavélinni með mislitum Sulky útsaumstvinna.

Ný Helga

2010-10-24T11:02:00.008Z

Nú er ég búin að prjóna aðra "Helgu", en ég prjónaði bláa í fyrra.

Hún varð of stór, svo ég prjónaði minni stærðina núna, og nú er hún fín. Ég notaði tvöfaldan plötulopa. Mér finnst mjög gott að hafa háan kraga á lopapeysum, því þá hneppi ég bara kragann í stað þess að nota trefil ef ég er úti í peysunni í kulda.

Tölurnar keypti ég í Gallerí Söru. Undanfarið hef ég bara keypt skelplötutölur í peysur sem ég hef prjónað. Þær eru bæði léttar, hlutlausar og smart!
Uppskriftin er hér.

P.s. Varðandi uppskrift af vagnhosum, sem tvær konur hafa spurt mig um: Ég kann ekki við að birta hana nema að fá leyfi hjá þeirri sem gaf mér hana, og ætla að reyna að hafa samband við hana og sjá hvað hún segir.

Vagnhosur

2010-10-20T21:07:00.007Z

Fyrir tveimur árum sendi hún María í Keflavík mér uppskrift af vagnhosum, sem hún sagðist hafa prjónað mikið af.

Hún sendi mér líka sýnishorn, og nú er ég búin að prófa að prjóna hosur, og get varla hætt.

Ég prjóna úr tvöföldum plötulopa á prjóna no. 4,5.

Lopavettlingar

2010-10-16T16:13:00.005Z

Lopinn í körfunni inni í stofu æpti á mig, svo ég bjó til úr honum vettlinga.

Ég notaði tvöfaldan plötulopa.

Uppskriftirnar eru úr bókinni góðu Vettlingar og fleira eftir Kristínu Harðardóttur.

Lundi

2010-10-01T16:04:00.006Z

Þá er lundinn minn loksins kominn í mynd.

Ég fann hann í EQ forritinu mínu og gerði svo rammann sjálf. Myndin er 34x34 sm að stærð.

Ég valdi efnin þannig að þau minntu á umhverfi lundans, þ.e. hafið og himininn, klettana og grasið. Sum efnin keypti ég á Akureyri í fyrra til að nota í myndina.

Stjörnuhekl

2010-09-27T20:55:00.007Z

Í mörg ár hef ég ætlað að læra stjörnuhekl. Svo ætlaði ég að hekla lopateppi, því ég man eftir þannig teppi á heimili foreldra minna þegar ég var lítil.

Uppskriftina fann ég svo í bókinni Kúr og lúr, sem kom út á síðasta ári.

Ég notaði léttlopa í teppið og hafði það bara lítið, ca.70x115.

Auðvitað notaði ég afganga, þeir hlaðast alltaf upp, en keypti samt dálítið af fjólubláum dokkum til að lífga upp á sauðalitina. En.......ég notaði ekkert rautt!!

Needles and Notions

2010-09-21T17:21:00.009Z

Þá er ég loksins búin með saumaherbergismyndina.

Hver mynd er 4 tommur, en það var líka hægt að sauma 6 tommu myndir.

Aðferðin er að sjálfsögðu pappírssaumur.

Teppið verður hengt upp í saumaherberginu mínu.

Og nú er það bara spurningin...........hvað ætti ég að gera næst?

Prjónaskapur sumarsins

2010-09-12T14:21:00.006Z

Hér er hluti af því sem ég prjónaði í sumar. Peysan hér að ofan er úr færeyska garninu Navia trio. Liturinn kemur alls ekki réttur út á myndinni, því hann er hárauður, en virðist bleikur hérna. Ég lendi oft í því að rautt virðist bleikt, og ég gæti lagað það í fotoshop, en nenni því ekki. Uppskriftin er líka úr færeysku Naviablöðunum.

Þetta er svo faðmur úr Einbandsbókinni. Það tók dálítinn tíma að prjóna þessa, sem er bara gott mál, því þá entist hún mér lengi. Ég er orðin í vandræðum með mig því ég verð að hafa eitthvað að prjóna þegar ég sest fyrir framan sjónavarpið, og oft er mér alveg sama þótt ég þurfi að rekja flík upp og gera hana aftur, því ég hef þá eitthvað að prjóna á meðan.

Svo gerði ég mér þessa slá úr einbandi í vor. Mér var sagt að "allir" kennarar í ákveðnum skóla hér í Hafnarfirði væru búnir að prjóna sér svona slá, og uppskriftin er svona: Fitjað er upp á 160 lykkjum með einbandi og prjónað garðaprjón fram og til baka á prjóna no. 6 þar til búið er að prjóna úr 2 dokkum. Þá er framhaldið prjónað í 2 hlutum, fyrst annar boðangurinn sem er 80 lykkjur. Hann er prjónaður þar til 1 dokka er búin, og hinn boðangurinn prjónaður á sama hátt. Svo þvoði ég stykkið og teygði vel úr því og þetta er bara hin klæðilegasta flík!

Kjólablogg

2010-09-05T16:49:00.012Z

Í sumar datt ég aðeins í kjólasaum. Þennan svarta og skræpótta var ég reyndar að klára í dag. Ég saumaði hann upp úr Emamikjólnum sem ég saumaði mér í fyrra, og bætti við munstraða efninu.

Ég var búin að nota þann kjól töluvert, en ákvað svo að nóg væri komið, og notaði efnið í annan kjól, enda ekkert mál að sníða upp úr honum því hann er bara beint, stórt stykki.

Hér er svo hálfsíður kjóll frá í sumar, saumaður eftir sama sniði og þessi fyrir ofan. Þennan nota ég með buxum.

Það átti að rykkja kjólinn í bakið og leggja eitthvert sérstakt teygjuefni undir til þess, en ég fékk það hvergi. Hins vegar sá ég leiðbeiningar á netinu um það hvernig hægt er að rykkja með því að setja teygjutvinna í spóluna á saumavélinni, og það tókst svona líka vel.

Þetta þarf að vera teygjutvinni fyrir saumavélar, og hér er slóðin að leiðbeiningunum.

Þessi kjóll er svo eftir öðru sniði, og ég valdi þá útfærslu að hafa teygju í faldinum, og nota hann bæði með leggings og buxum.
Allir kjólarnir eru úr teygjuefni.
Bæði sniðin eru frá Onion

Drunkard´s Path

2010-08-22T16:48:00.016Z

Þetta teppi var ég að ljúka við að stinga. Þetta er eins konar prufustykki, því mig langaði til að prófa fót, sem ég keypti fyrir nokkrum árum, og er til þess ætlaður að sauma saman bognar línur án þess að nota títuprjóna eða að finna miðju og festa saman. Það gekk mjög vel. Fóturinn heitir Curve Master, og er hægt að panta hann á netinu.

Ég gerði snið í EQ7, sem ég fékk í sumar, og setti upp munstrið og líka hvernig ég ætlaði að stinga teppið, og gat prófað margar útgáfur. Þó ég sé ekki að gera mjög "fancy" teppi, af því ég er hrifnust af hefðbundnum munstrum, þá geri ég næstum ekkert öðruvísi en að nota EQ.

Svo hef ég aldrei gert svona bogakant áður, og langaði til að prófa það líka.
Er það svo ekki ágætþýðing á nafni þessa munsturs að kalla það Rónarölt?

Eldhúsmynd

2010-07-04T17:59:00.002Z

Þessa mynd saumaði ég einn rigningardaginn í vikunni. Munstrið er úr 14 ára gömlu blaði, sem ég á. Fann henni pláss í eldhúsinu. Ég dett gjarnan í útsaum á sumrin, en lítið á öðrum tíma ársins.

Maíblóm og nálapúði

2010-07-02T11:05:00.005Z

Sniðið að þessari veggmynd keypti ég síðastliðinn laugardag þegar ég kom við í Bót á Selfossi. Það er frá Patchabilites, og ég er oft búin að spá í að kaupa í eina mynd frá þeim.
Efni fylgdu sniðinu, en ég notaði annað efni í rammann, sem ég átti og líka í miðjuna á blómunum.

Stönglana saumaði ég í saumavélinni, fór tvisvar í línuna með sporinu sem gengur fram og til baka þegar maður saumar. Mér finnst það þægilegast þegar þarf að bródera svona línur.

Svo hefur nálapúðinn bæst í hópinn, þannig að nú er ég búin með fimm af tólf myndum í veggteppið með saumaáhöldunum.

Tvinnakefli og tebolli

2010-06-29T09:23:00.004Z

Nóg þarf að vera af tvinnanum í saumaherberginu.

Svo þarf saumakonan auðvitað að hafa hressingu við höndina, svo hún geti haldið áfram að sauma. Í mínu herbergi myndi það vera tebolli, en e.t.v. kaffibolli hjá öðrum.

Saumaáhöld

2010-06-25T09:14:00.005Z

Þessa bók eignaðist ég fyrir nokkrum árum. Í henni eru pappírssaumssnið fyrir helstu áhöld og tæki sem finna má í saumaherberginu.
Ég ætla loksins að drífa mig í að sauma upp úr henni, og ég byrjaði á saumavélinni.

Svo komu skærin..... ég saumaði báðar myndirnar í gær.

Blokkirnar eru fjórar tommur þegar þær eru tilbúnar.

Mussa

2010-06-20T16:35:00.002Z

Þessa mussu saumaði ég í vikunni sem leið. Er þetta annars kallað mussa? Norðmenn kalla svona flík "en overdel" eða "en tunika", og mér finnst þetta frekar vera skyrta. Jæja, skiptir ekki máli, sniðið er úr norska blaðinu Ingelise's symagasin og efnið keypti ég í Handalín, nýju góðu búðinni á Vitastígnum. Það er úr viskósa, og skreið bókastaflega um allt á meðan ég var að sníða. En þetta tókst fyrir rest.

Löber

2010-06-14T14:13:00.006Z

Ég hef verið með það í kollinum lengi að gera svona löber. Hugmyndin var nú samt að hann yrði meira hvítur, en þetta varð útkoman. Ég keypti engin efni í hann, heldur notaði efni úr "stashinu" mínu, eins og ég geri yfirleitt. Ég notaði líka blúnduafganga sem ég átti og varð að halda mig þá búta sem voru nógu langir.
Svo fannst mér upplagt að nota einhverjar af þeim 222 saumgerðum sem saumavélin býður upp á. Krosssaumurinn er líka úr henni.

Ég var með dúkinn á saumaborðinu dálítið lengi og gerði pínulítið á dag, og þurfti svo að hugsa málið.

Svo má líka nota hann sem borðmottu undir te fyrir tvo!

Teppi úr kambgarni

2010-06-07T16:15:00.005Z

Þetta teppi lauk ég við fyrir 2-3 vikum.
Ég á töluvert af kambgarni síðan ég saumaði út með því fyrir nokkrum árum. Þá gerði ég litla riddarateppið og sófapúða og fleira, en þurfti lítið af hverjum lit.

Svo sá ég á netinu þessa uppskrift, og langaði til að prófa hana. Uppskriftin er fyrir ungbarnateppi, en ég hafði það stærra.

Ég notaði ekki alla litina sem ég átti. Appelsínugult t.d. get ég varla notað í neitt! En... þetta var sem sagt útkoman. Það eru notaðir mun grófari prjónar en gefið er upp fyrir garnið, og því verður teppið svo blúndukennt.

Taska

2010-06-02T18:14:00.003Z

Þessa tösku saumaði ég fyrir stuttu. Sniðið fékk ég í Ingelise´s symagasin feb/2010. Efnið keypti ég í Ikea, bæði fóðrið og ytra byrðið.

Leiðbeiningarnar eru reyndar arfavitlausar í blaðinu. Það er t.d. alveg óþarfi að loksauma eða sikk sakka allar brúnir, því þær lokast allar inni í töskunni, og svo verður að loka axlasaumnum síðast í höndum, þegar búið er að snúa töskunni við, en í leiðbeiningunum átti bara að skilja eftir op í botninum á fóðrinu. En þetta gekk að lokum, enda grunaði mig að þetta stæðist ekki.

Myndin er tekin úti á svölunum hjá mér kl. tíu um kvöld!

Lítil saumamotta

2010-05-30T14:43:00.008Z

Ég var að fletta í gegnum bloggið hennar LeKaQuilt, sem er mjög fallegt og áhugavert, og þá sá ég mjög einfalda hugmynd, sem ég er alveg hissa á að mér skuli ekki hafa dottið sjálfri í hug.
Kannist þið ekki við það þegar þið eruð að sauma í höndum, kannski í hægindastól í stofunni, að það er eins og maður geti ekki almennilega lagt frá sér skærin, nálina, tvinnann o.s.frv.?

LeKaQuilt saumaði sér litla mottu fyrir smáhlutina! Auðvitað þurfti ég að gera svona líka. Ég ákvað að hafa þríhyrninga, því ég átti fullt af þannig afskurði úr öðrum teppum.

Ég prentaði út pappírssnið í hæfilegri stærð úr EQ6, þannig að hver ferningur er ein og hálf tomma.

Svo stakk ég í saumförin og líka fríhendis og voila!!

Veggteppi

2010-05-22T16:26:00.011Z

Þetta veggteppi var ég að ljúka við.
Það er úr smáum bútum eins og smáteppið sem ég gerði fyrir nokkru. En nú skar ég hvern bút 1,5 tommu, þannig að þeir urðu 1 tomma saumaðir.

Svo stakk ég blóm á ljósu svæðin. Ég teiknaði þau gegnum skapalón með penna, sem eyðist.

Ég notaði applíkeringarfót í rósirnar, og sneri stykkinu í hvert skipti sem ég þurfti að beygja, og þetta voru 38 blóm!! En mér leiddist ekkert. Vélin mín er líka svo stórkostleg að hún lyftir fætinum sjálf þegar ég stoppa og lætur hann svo sjálf niður þegar ég fer af stað. Annars væru úlnliðirnir á mér búnir.

Svo prófaði ég að nota málningarlímband til að sauma eftir beinar línur, og það tókst alveg glimrandi vel.

Í skurðinn notaði ég litla mottu, lítinn hníf og litla stiku!

Þessa stiku keypti ég í fyrra í Bót á Selfossi og hún er frábær í svona litla búta.

Hér gefur að líta efnin sem ég notaði. Þetta voru eintómir smábútar, sem ekki var hægt að gera neitt við, en ég straujaði þá og skar þessa litlu ferninga út. Efnin eru eldgömul, og ég á nóg eftir.

Sítrussjal

2010-05-10T15:46:00.002Z

Sítrussjalið prjónaði ég fyrir stuttu. Það er úr einbandi. Uppskriftin er frá Ístex. Það er svo hlýtt úti núna á meðan ég er að skrifa þetta að ég get ekki ímyndað mér að ég noti það fyrr en í haust.

Skærapokar

2010-05-03T17:05:00.006Z

Þessa skærapoka saumaði ég fyrir nokkrum dögum.

Þeir eru mjög einfaldir í gerð. Tvö efni í stærðinni A4 eru lögð saman með vatt á milli, og skáband saumað í kring. Síðan er brotið eins og myndin sýnir og jaðrar á hliðum saumaðir saman í höndum.

Svo er botninn brotinn upp og saumaður fastur með flottri tölu. Auðvitað má geyma fleira, sem passar í, t.d. gleraugu, skurðarhníf o.fl.

Hugmyndina að þessum pokum fékk ég á bútasaumssýningu Skraddaralúsa í Hvalfjarðarsveit á sumardaginn fyrsta. Þangað mættum við Anna Björg snemma dags ásamt elskulegum eiginmönnum okkar, og betri sumarbyrjun er ekki hægt að hugsa sér. Sýningin var mjög skemmtileg og hafi þær þakkir fyrir framtakið.

Smámynd

2010-04-28T21:31:00.007Z

Ég tók fram kassa með alls konar smáafgöngum, sem ég hef ekki tímt að henda, og sneið úr þeim litla ferninga, ljósa og dökka. Þeir eru sniðnir 1 x 1 tomma að stærð, og þegar þeir eru komnir 4 saman í myndina eru þeir 1 x1 tomma saumaðir.
Hér er geisladiskur til samanburðar á stærðinni.

Ég las í bloggi sem heitir The sentimental quilter, að sú sem skrifar það sníður alla litla afganga niður í svona stærðir, saumar saman fjóra búta, og setur í öskju. Svo saumar hún svona lítil teppi þegar hún er í stuði til þess. Sniðugt?!

Kjóll

2010-04-20T18:03:00.007Z

Þennan kjól saumaði ég um helgina. Hann er úr jerseyefni. Sniðið er í Ingeliseblaði frá því í janúar 2010.
Ég saumaði hann í og með til að æfa mig á overlockvélinni, sem ég keypti í maí í fyrra. Ég hef saumað þrjá kjóla og ýmislegt smálegt á hana, en er enn að læra. Ég fer á námskeið, sem fylgir vélinni, eftir viku. Eins og sést á myndinni saumar hún þekjusaum, þ.e. tvöfalt og þrefalt spor til að falda með, og til að sauma hann þarf ýmsar tilfæringar áður, sem ég var að æfa mig í. En það er sagt að því meira sem maður saumi, því meira saumi maður (!)

Hér er myndin úr blaðinu. Ég ákvað að sýna mynd af "professional" fyrirsætu í kjólnum í stað þess að sitja fyrir sjálf.

Húfur og ermar

2010-04-16T20:59:00.005Z

Ég datt í húfuprjón um páskana. Kvenfélagasamband Íslands ætlar, í tilefni af 80 ára afmæli sínu, að færa öllum börnum, sem fæðast á afmælisárinu, húfu að gjöf. Reiknað er með að um 5000 börn fæðist á árinu.
Mig langaði til að taka þátt í þessu, en uppskriftina er að finna á vef Kvenfélagasambandsins. Notað er kambgarn, en ég á töluvert af því, samt ekki í góðum litum fyrir ungbörn. Ég átti þó allt bláa garnið og það ljósbleika, en ég keypti hvítt og bleikt. Það fást 2 húfur úr dokkunni.

Þessar ermar prjónaði ég fyrr í vetur, en þurfti að rekja upp og laga, og nú eru þær fínar. Þær eru úr bókinni Garn og gaman, og þar eru þær prjónaðar úr léttlopa, en ég notaði Perfect frá Sandnes.

Dúkur með pinwheel munstri og viðurkenning

2010-04-05T17:07:00.007Z

Ég hef lengi ætlað að sauma svona dúk. Ég sá hann í sjónvarpinu fyrir fimm árum í þættinum Innlit/útlit. Þá var farið í heimsókn á gullfallegt heimili, þar sem húsfreyjan er dugleg í bútasaumi. Ég teiknaði munstrið í EQ6 forritinu og dreif mig í þetta.
Ég valdi frekar bjarta liti og mest eru þetta efni frá Thimbleberries, enda hafa þau verið í uppáhaldi hjá mér og það breytist lítið.

Mér fannst hann passa vel á borðstofuborðinu um páskana, vorlegur og léttur.

Bakið og kantana hafði ég úr þessu svakalega rósótta efni, en af því að það er líka frá Thimbleberries þá pössuðu litirnir ágætlega saman.

Þessi viðurkenning barst mér fyrir viku frá Anelie, en hún er finnskur bloggari og handverkskona. Takk, Anelie!! Hún er mjög fjölhæf og gerir fína hluti. Þessi viðurkenning kemur frá Brasilíu og þýðir "blogg með sjarma". Reglan er sú að maður á að senda þetta áfram til 12 annarra bloggara, tengja þá við manns eigið blogg og tengja sig við blogg þess sem sendir þetta, og svo á að senda þessum 12 skilaboð um að þeirra bíði viðurkenning. Eins og margir gera, þá ætla ég ekki að velja ákveðnar 12 manneskjur, heldur langar mig að bjóða sérstaklega íslenskum handavinnukonum, sem blogga um handavinnuna sína, að taka til sín þessa viðurkenningu frá mér. Sem sagt, ef þú bloggar á Íslandi um handavinnuna þína, þá áttu þetta! Mig langar að sjá fleiri handavinnublogg á íslensku, því nóg er af konum hér sem eru að gera flotta hluti.

Færeyski kjóllinn

2010-03-26T14:52:00.003Z

Þá er kjóllinn úr færeyska Navia garninu tilbúinn. Ég prjónaði hann úr Navia uno.
Hér er frúin komin í kjólinn og er bara nokkuð ánægð með hann!

Prjónað......

2010-03-16T18:32:00.007Z

Ég prjónaði mér aftur Baktus, nú úr Fabel garni.
Mér finnast þetta bestu treflarnir á veturna.

Svo varð ég að prófa svona snúinn trefil. Notaði Lanett ullargarn og fitjaði upp á 150 lykkjum, prjónaði 6 garða, tvöfaldaði þá lykkjufjöldann og prjónaði aftur 6 garða. Hélt svona áfram þar til lykkjurnar urðu 1200, og felldi af eftir 6 garða. Það tók sinn tíma!

Þetta síða vesti prjónaði ég úr Kitten mohair, og er liturinn miklu dekkri í raun heldur en myndin sýnir.

Núna er ég með kjól á prjónunum úr færeyska garninu Navia uno. Liturinn er blanda úr brúnu og svörtu. Svo er ég auðvitað að sauma líka, er að gera bútasaumsdúk úr pinwheel munstri, sem ég sýni þegar ég er búin.

Sumarskakki og húfa

2010-02-28T17:57:00.006Z

Hér er sumt af því sem ég hef verið að gera undanfarið.

Þetta sjal er úr bókinni "Prjónaperlur". Það er kallað sumarskakki og er prjónað úr eingirnisafgöngum. Svo gerði ég þessa húfu. Ég sá hana á síðunni hjá Strikkemor(o), þar sem hún sagðist hafa notað Perfect garn frá Sandnes.

Ég á töluvert af því garni, og gerði mér eina svarta. Þetta er mjög góð húfuuppskrift, og gaman að prjóna hana.

Uppskriftin er á Ravelry.

Diskamottur

2010-02-14T17:00:00.006Z

Nýlega lauk ég við að sauma þessar diskamottur. Þær eiga að vera svona hversdags á eldhúsborðið.
Ég var ákveðin í að hafa þær úr köflóttu eingöngu. Ég sá einu sinni þannig diskamottur í Virku. Þær voru reyndar með húsi í miðjunni, og úr mjög samlitum og dökkum efnum.

Ég prófaði þess vegna að setja hús í miðjuna þegar ég bjó mottuna til í EQ6. Svo fór ég að hugsa að ég væri svo oft að sauma hús, enda eru hús, átta arma stjörnur og fljúgandi gæsir uppáhaldsmótívin mín.

En ég held líka mikið upp á fimm arma stjörnur, svo ég ákvað að prófa það núna.

Enn ein lopapeysan

2010-02-04T18:00:00.005Z

Hvað þarf ein kona að eiga margar lopapeysur? Ég held að nú sé komið nóg, a.m.k. í bili.

Ég prjónaði bláa peysu fyrir nokkru með þessu munstri, en hún varð of stór, og mamma fékk hana. Nú reyndi ég aftur, og minnkaði peysuna um 30 lykkjur, og nú smellpassar hún.

Peysan er prjónuð úr einföldum lopa og einbandi á prjóna nr. 4,5. Tölurnar eru skelplötutölur.

Grámhildur góða

2010-01-30T17:46:00.003Z

Þessa léttlopapeysu prjónaði ég eftir áramót. Hún er úr bókinni Prjónaperlum, sem kom út fyrir stuttu, og heitir Grámhildur góða. Hún er prjónuð á grófari prjóna en venjulega, eða nr. 5,5. Þannig verður hún mjög lipur og létt. Peysan er græn, þó hún komi eiginlega grá út á þessum myndum. Að sjálfsögðu þurfti ég að eiga við ermarnar, þegar peysan var tilbúin. Ég er svo smámunasöm með ermasídd, hún verður að vera nákvæm, og ég rakti upp 4,5 sentimetra af hvorri ermi og lykkjaði saman aftur, og nú er ég ánægð.

Eins árs afmæli og "award"!!

2010-01-25T17:28:00.008Z

Í dag hef ég bloggað í eitt ár!

Ég hefði aldrei trúað því að ég ætti það eftir. Það var vegna hvatningar (þrýstings!!) frá

Önnu Björgu að ég byrjaði á því, aðallega til að þurfa ekki að taka allt, sem ég var að gera, með mér í vinnuna til að sýna henni. Hún þurfti þess ekki, hún bloggaði bara.

Í síðasta tölublaði Húsfreyjunnar var sýnt hvernig á að gera svona hálsfesti, og loksins á laugardaginn kom ég því í verk að þæfa rauðu kúlurnar. Þessar svörtu eru hraunmolar. Í tilefni dagsins setti ég festina svo saman í dag til að geta sýnt eitthvað nýtt.

En mér til undrunar fékk ég komment frá Oddbjörg í Noregi þar sem hún sagðist vera með skilaboð til mín á blogginu sínu! Hún sendir mér sem sagt "award" eða viðurkenningu. Það er í fyrsta skipti sem ég fæ svoleiðis! Tusen takk, Oddbjörg, for "awarden"du ga til meg! Dette er förste gang jeg far slik! Ég á að setja link á síðuna hjá þeim sem sendi mér viðurkenninguna, skrifa sjö staðreyndir um sjálfa mig og senda sjö bloggurum viðurkenninguna áfram.

Hér koma staðreyndirnar:

1. Ég var sjö ára gömul þegar ég hafði prjónana með mér í fjallgöngu til að geta prjónað þegar sest var niður til að drekka.

2. Ég er svakalega hrædd við ókunnuga hunda.

3. Ég borða engan sykur.

4. Mér finnst ég alltaf þurfa að setja eitthvað rautt í flest sem ég geri, t.d. bútasaum, og mér finnst rautt og fjólublátt flott saman.

5. Rjómi er það besta sem ég fæ og ég borða mikið af honum.

6. Mér finnst gaman að synda, ganga og hjóla, en ligg aldrei í sólbaði.

7. Ég hef tekið 7. stig í söng og hef sungið í grúppum og kórum frá því ég var unglingur.

Pa norsk:

1. Jeg var syv ar gammel da jeg tok strikkepinnerne med meg i en fjelltur for a strikke da vi satte os ned til a spise.

2. Jeg blir fryktelig redd da jeg treffer hunde jeg ikke kjenner.

3. Jeg spiser ingen sukker.

4. Jeg liker a sette noe rödt i ting jeg laver, f. eks. i lappesöm, og jeg liker godt kombinasjon av rödt og lilla.

5. Jeg elsker vispet flötekrem og spiser mye av den.

6. Jeg liker a svömme, ga og sykle, men ligger aldri i solen.

7. Jeg har tatt 7 grader i sang, og fra jeg var ung har jeg altid vært med i sanggrupper og korer.

Ég ætla að senda þessum konum viðurkenninguna áfram, vegna þess að mér finnst gaman að lesa bloggin þeirra og fylgist reglulega með þeim: Anna Björg, Edda Soffía, Timotei, Lekaquilt, Sigga, Britt og Sigrun.

Hnepptur trefill

2010-01-21T21:19:00.005Z

Þennan trefil prjónaði ég um áramótin og hef notað hann mikið síðan. Ég notaði alpakka garn frá Sandnes, hafði það tvöfalt og notaði prjóna nr. 5,5. Ég fitjaði upp 34 lykkjur, prjónaði 2 sléttar og 2 brugðnar til skiptis, og mældi svo bara á sjálfri mér hversu langur hann þurfti að vera. Tölurnar eru af peysu sem ég átti rúmlega tvítug!

Þorralöber

2010-01-11T16:41:00.004Z

Þá er þorralöberinn, sem ég minntist á í þarsíðasta bloggi, tilbúinn.

Ég notaði aðeins efni sem ég átti, og er bara sátt við útkomuna.

Hann verður settur á borðstofuborðið þann 22. janúar, á bóndadaginn.

Möbius sjal

2010-01-06T17:00:00.009Z

GLEÐILEGT ÁR!!

Þetta sjal, sem kennt er við Möbius, var "jólaprjónið" mitt í ár. Mig langaði alltaf til að prófa Kauni garnið, og svo þegar hún Ingibjörg Jónsdóttir, vinkona mín, sýndi mér uppskrift að þessu sjali, fannst mér upplagt að prófa garnið á því.

Garnið pantaði ég frá Bót á Selfossi og geymdi það til jóla. Svo var ég bara þrjá daga að prjóna það. Liturinn kemur ekki alveg rétt út á myndinni. Það er rautt, en ekki svona bleikt eins og myndin sýnir. Uppfitjunin er dálítið óvenjuleg, maður fitjar upp 150 lykkjur, og býr svo líka til lykkjur úr bandinu sem myndast í botni hverrar lykkju, þannig að lykkjufjöldinn verður 300, og sjalið prjónast upp og niður út frá miðju.

Ég hef séð uppskrift að Möbius sjali í bókinni Prjónaperlum, sem kom út fyrir jólin. Þar er það úr einbandi, og uppfitin er eitthvað öðruvísi en ég gerði. Hér er uppskriftin sem ég notaði.

Íslenska rósin

2009-12-30T10:27:00.009Z

Þessi löber heitir "Íslenska rósin" og er sniðið eftir hana Elínu Guðjónsdóttur á Þverlæk.
Mér finnst svo frábært hvernig hún kemur íslenskum munstrum og þjóðlegum myndum inn í bútasauminn.Ég keypti sniðið í Quiltbúðinni á Akureyri í fyrra, og það eru nokkrir mánuðir síðan ég setti löberinn saman og átti í rauninni bara eftir að sauma niður kantinn og stinga. Það gerði ég milli jóla og nýárs.

Ég þurfti aðeins að velta því fyrir mér hvernig best væri að stinga, og eftir að hafa stungið í saumförin eins og venjulega varð niðurstaðan sú sem sést á myndunum.

Auðvitað freistaðist ég til að teikna rósina upp á pappír til að sauma eftir. Mér er ekki viðbjargandi þegar kemur að pappírssaum.

Reyndar áttu að vera fjórir litir í rósinni, og ætlaði ég að hafa rauðan, grænan, bláan og fjólubláan, en ég fékk ekki það jafnvægi á litina sem þurfti, og því hafði ég meira af rauða litnum, sem mér finnst bara koma vel út.

Núna er ég að sauma annan löber eftir Elínu, Þorralöber. Sýni hann þegar ég er búin.

Heklað á aðventunni

2009-12-27T11:12:00.006Z

Ég datt í það að hekla á aðventunni. Þessar bjöllur gerði ég á seríur og gaf aðra þeirra.

Ég stífaði þær á frauðplastbjöllur, sem fást í föndurbúðum. Mínar voru keyptar í föndurbúð inni í Mörkinni í Reykjavík og eru 5 cm háar.

.Sykurvatnsblönduna hafði ég einn á móti einum. Seríurnar fékk ég í Garðheimum.

Svo hef ég lengi ætlað að hekla svona diskadúka. Nú lét ég verða af því og heklaði sex stykki.

Mér finnst gaman að leggja eitthvað ofan á diskana þegar ég dekka borðstofuborðið, sérstaklega þegar ég dekka fyrir aðfangadagskvöld á Þorláksmessu. Hér er uppskriftin. Ég heklaði stærri dúkinn en notaði Solberg heklugarn og nál nr. 1.75.

Heklaðar stjörnur

2009-12-20T19:59:00.006Z

Þessar stjörnur heklaði ég fyrir jólin í fyrra, en nennti aldrei að ganga frá endunum. Ég heklaði milli 30 og 40 stykki. Uppskriftin er úr Hendes Verden nr. 37 2008.
Þessi hjörtu gerði ég líka. Þau eru hekluð eftir uppskrift á Garnstudio.com.

Núna dreif ég mig í að ganga frá endunum, og stífaði síðan allt í sykurvatni, 2 hlutum vatns á móti einum af sykri, og strekkti þær létt á einangrunarplasti með títuprjónum.
Meiningin er að strá þeim yfir borðdúka og gluggakistur, og kannski eitthvað fleira. Ég hef séð svipaðar stjörnur á Garnstudio.com.

Peysa og jólasveinahúfa

2009-12-13T21:21:00.005Z

Þessa peysu prjónaði ég handa minnstu frænku minni, henni Úlfhildi Sjöfn, afabarninu hans bróður míns, en hún átti tveggja ára afmæli þann 10. desember, og hélt upp á afmælið sitt á laugardaginn.
Uppskriftin er úr Lopa 29.

Svo stóðst ég ekki mátið þegar ég opnaði gluggann á jóladagatalinu mínu þann 1. desember, og gerði þessa jólasveinahúfu líka, úr alpacaull.

Mér finnst voða gaman að opna glugga á hverjum degi í desember fram að jólum.

Þjóðleg sería

2009-12-07T21:28:00.007Z

Hef ég nokkurn tíma minnst á það hversu gaman mér þykir að prjóna úr afgöngum?
Þessa uppskrift rakst ég á á netinu, og um leið og ég sá að í hana voru notaðir afgangar af léttlopa, varð ég að prófa hana.
Þetta var fljótgert, og ég heklaði utan um 20 perur.

Gerist það þjóðlegra?

Desember!!

2009-12-04T17:19:00.004Z

Ótrúlegt en satt! Nú er ég búin með myndir fyrir alla mánuði ársins. Nóvember fékk reyndar aðeins að hanga uppi í 9 daga, en betra er seint en aldrei. Þetta var verkefni af síðunni

Ellie´s Quiltplace, ein mynd á mánuði árið 2009.

Nóvember

2009-11-25T15:58:00.002Z

Þá er ég loksins búin að sauma nóvembermyndina, og ekki seinna vænna þegar aðeins 5 dagar eru eftir af mánuðinum. Þá eru myndirnar orðnar ellefu og ein eftir. Ég verð að viðurkenna að svona mánaðarskammtar af verkefnum eru ekki alveg minn stíll, ég fer mest eftir löngun og tilfinningu þegar ég vel mér verkefni. En ég er samt ánægð að hafa klárað þetta og gaman að geta hengt myndirnar upp á réttum tíma næstu árin.

Flöskupeysur

2009-11-23T21:27:00.003Z

Rauðvínsflöskur frá Chile komnar í íslenskan, þjóðlegan lopaklæðnað. Að sjálfsögðu er þetta prjónað úr afgöngum, og uppskriftina fann ég í Húsfreyjunni, 1. tölublaði 2009.

Lopapeysa

2009-11-14T14:05:00.006Z

Þessa lopapeysu kláraði ég sunnudaginn fyrir viku síðan, og var að fara í hana í fyrsta skipti í dag!Hún er prjónuð úr tvöföldum plötulopa á prjóna nr. 7. Litirnir koma því miður ekki alveg réttir út á myndunum, hún virðist grá og bleik, en er svört og dökkrauð með ljósgráu.
Ég keypti náttúrulegar skelplötutölur í Gallerý Söru. Þær eru fisléttar miðað við stærð og fallegar.
Til gamans ætla ég að geta þess að þessi færsla í dag er sú hundraðasta hjá mér.

Fönn

2009-11-02T21:53:00.006Z

Um helgina lauk ég við að ganga frá þessari léttlopapeysu á yngri son minn, sem er 25 ára.

Uppskriftin er úr Lopa 25 og heitir "Fönn".

Hún er reyndar ekki með rennilás í uppskriftinni, og ég breytti stroffum og kraga.

Handtak

2009-10-31T16:45:00.006Z

Ég held áfram að prjóna úr afgöngunum mínum af léttlopanum.

Þessi uppskrift er í Lopa 29 og heitir "Handtak".
Í handavinnuumræðunni á Barnalandi hef ég séð að hjá nokkrum konum, sem hafa prjónað þessa vettlinga, hafa þeir orðið of stórir, en mínir smellpössuðu, og er ég þó frekar handnett.

Ég prjónaði vettlingana fyrir þremur vikum, en nennti aldrei að ganga frá þeim. Skýringuna er að finna á myndinni hér að ofan, en þegar ég var búin að festa alla enda, reyndust þeir vera 98 talsins!

Prjónaður skokkur

2009-10-28T17:58:00.003Z

Var að ljúka við að prjóna þennan skokk úr léttlopa. Uppskriftin heitir "Keðja" og er úr Lopa 28. Ég ákvað að hafa peysuna ermalausa, annars yrði hún of heit, og svo verð ég bara í svörtum, síðerma bol innan undir. Síddin er rétt ofan við hné.

Sokkar úr afgöngum

2009-10-19T15:48:00.005Z

Um daginn flokkaði ég allt garnið mitt betur, og setti allt í glæra plastpoka. Ég sá að það hafði safnast aftur fyrir heilmikið af léttlopa.
Þessir sokkar á tveggja ára urðu til fyrir framan sjónvarpið á kvöldin nú í september og fram í október.

Eins og sést, þá er nóg eftir í körfunni. Uppskriftin er úr tímariti Heimilisiðnaðarfélagsins, Hug og hönd 2008. Ég reikna með að sokkarnir fari til Rauða krossins.

Október

2009-10-09T16:07:00.006Z

Þá er október kominn upp. Að þessu sinni var það dálítill höfðuverkur hvað ég ætti að gera, því munstrið frá Ellie´s quiltplace, sem hægt er að smella á hér til hliðar á blogginu, var í anda hrekkjavökunnar amerísku. Þar sem ég hef aldrei verið hrifin af þeirri hátíð eða því sem fylgir henni, þá fannst mér ég þurfa að gera eitthvað annað.
Þann 5. október varð mér litið á almanakið mitt góða, og sá þá þetta haustlauf, sem var svo vel við hæfi. Ég teiknaði það í EQ6 og saumaði með pappírssaum.