Þessi fjögur vettlingapör setti ég í jólapakkana handa sonum mínum og tengdadætrum.
Þeir eru prjónaðir úr kambgarni, og eru uppskriftirnar úr Vettlingabókinni eftir Kristínu Harðardóttur.
Bókin er mjög flott, og þarna útbýr Kristín uppskriftir að vettlingum sem eru byggðar á gömlum vettlingum sem hafa varðveist.
Það er spurning hvort maður eigi að setja allt á bloggið sem telst til handavinnu, ég geri það ekki, en ákvað að leyfa þessu að fara.
Ég nota svona klúta stöðugt, og eru þessir prjónaðir úr afgöngum. Munstrið lærðist strax, svo þetta varð fínt sjónvarpsprjón.
Hér kemur hjartað út í sléttu prjóni.
Munstrið er úr þessu 32 ára prjónamunsturblaði. Ég fitjaði upp 57 lykkjur, þá fékk ég 5 munstur á lengdina, og 6 raðir upp.
Fyrir nokkrum vikum heklaði ég nýja bjölluseríu, og fór eftir uppskrift úr Heklbók Þóru. Uppskriftin er mjög þægileg að hekla.
Seríuna gerði ég til að hengja upp í saumaherberginu mínu. Hér fær hún selskap af jólakúlum Arne&Carlos yfir jólin, en sjálf fær hún að hanga þarna lengur.
Og hér sést inn um gluggann á Saumaherbergi Hellenar ;)
Fyrir tveimur árum saumaði ég tvær bollamottur, og er færslan um þær hér. Nýlega bætti ég við fjórum í viðbót. Varð pínu svekkt því þessar voru örlítið minni en hinar (örugglega bara ég sem sé það), en ég var með nokkur eintök í tölvunni og hef greinilega ekki prentað út sama snið og síðast.
Nú hef ég prjónað bjöllur í fyrsta sinn, en hef heklað fullt af þeim.
Ég notaði heklugarn nr. 10 eins og ég hef heklað úr áður.
Uppskriftin er úr jólablaði Húsfreyjunnar 2012.
Ég sé að ég hef ekkert sett á bloggið í október, þótt ýmislegt sé í gangi í saumaherberginu. Ég skelli því inn mynd af toppi, sem ég saumaði fyrir nokkrum vikum, en myndaði fyrst í dag. Hann er eftir sama sniði og þessi rósótti.
Ég held áfram að prjóna úr afgöngum, því eitthvað verður maður jú að hafa á prjónunum. Nú var það úr einföldum plötulopa, og ég kláraði rauða litinn áður en ég var búin með peysuna, og ég ætlaði ekki að kaupa meira. Þá var bara að róta í körfunni, og þessi grái varð endanlega fyrir valinu, og ég held bara að peysan sé betri fyrir vikið.
Uppskriftin er frá Drops.
Í þessu stykki ákvað ég að sleppa uppáhaldslitnum mínum, rauðum, og nota lit sem ég er alls ekkert fyrir, appelsínugulan. Ég held ég reyni þetta ekki aftur. Mér finnst ég stundum dálítið föst í uppáhaldslitunum mínum, en það er skemmtilegra að sauma úr þeim.
Svo stakk ég í höndum, mér finnst það alveg ótrúlega gaman.
Ég rakst á þessa peysu á netinu, og varð að prjóna hana.
Uppskriftin er á Ravelry og heitir Mr.Greenjeans. Ef þetta nafn er slegið inn koma upp alls konar útgáfur af henni. Ég vildi helst hafa eitthvað annað en ull í henni, og mundi þá eftir peysu sem ég nota aldrei, og ákvað að rekja hana upp og nota garnið. Það er frá Dalegarn og er blanda úr bómull, hör og silki.
Tölurnar keypti ég hjá Heimilisiðnaðarfélaginu, en þær eru úr endurunnu efni.
Ég valdi að hafa peysuna hneppta alveg niður en uppskriftin gerir ráð fyrir einni tölu.
Þetta er peysan sem ég rakti upp.
Uppskriftin heitir Still Light og fæst á Ravelry.
Mér finnst alltaf gaman að skreyta eftir árstíðum, ekki bara á hátíðum. Ég heklaði nokkur svona fiðrildi nýlega, úr bómullarafgöngum. Svo set ég þau hingað og þangað, í blómapotta, á salerniskassann, í gluggakistuna o.s.frv. Uppskriftin er frá Whispering Forest Design og fæst ókeypis á Ravelry, og heitir þar Sweet Butterfly.
Ég eignaðist lítinn frænda þann 29. júní, og var búin að prjóna á hann þá. Ég gerði settið á 0-3/4 mánaða, og notaði uppáhaldsgarnið mitt, Lanett. Uppskriftin er frá Prjóna Jónu, og er hún á Facebooksíðu hennar.
Núna í júní prjónaði ég afgangateppi eins og þeir Arne&Carlos gera í bókinni Litríkar lykkjur úr garðinum.
Ég átti haug af smárestum af garni, flest áratuga gamalt, sem var ekki hægt að gera neitt með. Þó var ég búin að saxa aðeins á hann með teppinu sem glittir aðeins í í síðustu færslu.
Það er svo gott fyrir sálina að hreinsa svona upp. Ég fitjaði upp 250 lykkjur, og prjónaði svo þar til garnið var svo til uppurið. Ég skipti bara um lit þegar endinn var búinn. Teppið varð tæplega 2 metra langt. Grófleikinn var mismunandi, og stundum prjónaði ég úr tvöföldu.
Það þarf svona snillinga til að benda manni á svona einfalda hluti.
Posted with Blogsy