Heildartala yfir síðuflettingar

föstudagur, 3. apríl 2020

Snúrupokar


Í síðustu viku vantaði mig svo eitthvað til að sauma, svo ég bað vinkonu mína að lána mér snið sem hún á af snúrupoka.
Minni pokinn er gerður eftir uppskriftinni.
Eini feillinn sem ég gerði var að hafa of stíft flíselín í honum.
Annars er hann fínn fyrir ýmislegt smálegt, t.d. nett prjón.


Mig langaði að prófa aftur, gerði hann stærri. Skar kringum stiku sem ég á og kom fín stærð með henni.  Svo hafði ég þynnra flíselín. Mjög ánægð með útkomuna. Gat notað efni í vasann sem ég hef átt lengi en ekki notað. Snúruna í hann keypti ég í John Lewis í Edinborg fyrir mörgum árum.
Sniðið heitir Little Drawstring Bag frá Sarah J Patterson _designs.

föstudagur, 27. mars 2020

Sokkar


Sokkar tolla voða illa á tæplega sjö mánaða litla manninum mínum, hann er ýmist berfættur á öðrum eða báðum.
Ég hef gert  marga svona sokka áður, og núna hafði ég stroffið frekar langt, og þá er hægt að setja það utan yfir buxurnar og tolla þeir þá betur.
Uppskriftin er frá Garnstudio.com.

þriðjudagur, 24. mars 2020

Bjálkakofi


Ein ömmustelpan hefur í sínum fórum gamalt bútasaumsteppi frá föðurbróður sínum sem ég saumaði fyrir u.þ.b. 25 árum. Hún notar það á rúmið sitt.


Mamma hennar bað mig því að sauma líka teppi handa bróður hennar til að hafa í hans herbergi.
Ég byrjaði milli jóla og nýárs og lauk því núna um daginn, tók þetta svona í skorpum.
Ég valdi bjálkakofa munstrið handa honum, og þó hann sé bara tæplega sjö mánaða, þá gerði ég stórt teppi handa honum, 1.37 x 2.07 m. Teppið sem systir hans er með er svipað að stærð.
Það er bara hægt að brjóta það þrefalt yfir rúmið til að byrja með, svo töfalt o.s.frv.


Ég stakk í öll saumför. Vildi ekki stinga meira til að halda því lipru og mjúku.
Ég saumaði allt með pappírssaumi.


Merkimiðann saumaði ég í útsaumsvélinni minni góðu. Gaman að prófa það.


Efnin eru bæði úr safninu mínu, og svo komst ég á útsölu hjá Panduro i Smáralind um áramótin og keypti töluvert af fínum efnum fyrir lítinn pening.


Og ég er alltaf jafn ánægð með mína frábæru saumavél, Husqvarna Epic 980Q sem ég keypti í Pfaff fyrir einu og hálfu ári.  
Teppið er frekar stórt, og ég þurfti stanslaust að vera að snúa því á meðan ég stakk það í fjórar áttir og þurfti að margdraga það allt undir arminn. 
Það var ekkert mál, því nóg er plássið.
Vélin getur líka geymt allar stillingar sem ég geri í ákveðnu verkefni, hún geymir þær í “Smart save” þannig að ef ég ætla að halda áfram í sama verkefni næst þegar ég kveiki á henni ýti ég á einn hnapp og hún opnar sig með þeim stillingum sem ég geymdi. 
Og yfirflytjarinn á Husqvarna vélum er sérviska mín, vil ekkert annað....en það er bara ég 😊

mánudagur, 23. mars 2020

Kríur


Fyrir um sex árum heklaði ég Kríur handa mér og tengdadætrunum. Þær hafa verið í stöðugri notkun öll þessi ár
Eina ömmustelpuna langaði að eiga svona sjal eins og mamma hennar á.
Ég tók því fram afgangana frá Kríunum, var með flokkað í poka garn sem passaði saman í grófleika og innihaldi, þetta voru ullar/bómullarblöndur. Sumt eru afgangar af fötum sem ég hef prjónað á stelpurnar.
Og af því að ég get ekki gert upp á milli þeirra, þá heklaði ég handa þeim öllum.


Ég notaði mest allt garnið sem ég átti.
Uppskriftin er í Heklbók Þóru og heklunálin nr. 4.

mánudagur, 24. febrúar 2020

Sokkar, vettlingar og hálsaskjól


Prjónaði sokka á ömmustrákinn, næst minnstu stærðina af Snær sokkar frá Petit knitting.


Vettlingarnir eru líka frá Petit knitting og heita Sindri vettlingar.
Stærðin er á 1-2 ára.


Svo vantaði hann kraga fyrir vetrarveðrið.
Uppskriftin er aftur frá Petit knitting og heitir Skorri hálsskjól.
Ég valdi minnstu stærðina, 6-12 mánaða, en sleppti stroffi neðst. Svo hafði ég 1 sl og 1 br í kraganum sjálfum til að hann héldi betur að hálsinum, en í uppskriftinni er perluprjón.
Kraginn passar mjög vel á hann svona.

Notaði Drops merino extra fine í allt.

föstudagur, 14. febrúar 2020

Prjónaveski fyrir Addi trio prjóna


Ég er voða gamaldags hvað varðar prjónaáhöld, nota mína gömlu prjóna og er bara sátt við þá. 


Það er samt ein nýung sem ég hef fallið fyrir, og það eru Addi trio prjónarnir.
Mér hefur alltaf leiðst að nota fimm prjóna, og nú er ég á góðri leið með að skipta þeim út fyrir Addi prjónana.


Og til að hafa eitthvað yfirlit yfir prjónaeignina þurfti ég að sauma veski undir þá.
Ég stefni á að fylla þetta veski smám saman. Af sumum stærðum á ég nú þegar tvö pör, því mér finnst best að prjóna ermar, skálmar, sokka og vettlinga samtímis hvað öðru.
Ég saumaði hvítan borða á hólfin til að skrifa prjónastærðirnar á þegar ég veit betur hvað kemur í þau.
Aftari hólfin eru fyrir lengri gerðina.


Svo rúlla ég þessu saman.
Fyrirmyndin er prjónaveski sem mér var gefið fyrir nokkrum árum og ég hef notað síðan.
Efnin keypti ég á útsölu hjá Panduro í vetur.



mánudagur, 10. febrúar 2020

Tvöfaldir vettlingar


Í bókinni Leikskólaföt 2 rakst ég á vettlingauppskrift þar sem innri vettlingur var prjónaður í þann ytri til að gera hann hlýrri.
Ég prjónaði minnstu uppskriftina, á 1-2 ára.


Svona líta þeir út að innan.


Og af því að ömmustrákurinn notar ekki ennþá þumla, þá prjónaði ég aðra þumlalausa með sömu aðferð.


Uppskriftin heitir Lísa í Undralandi.
Ég notaði afganga af Lanett stærri vettlingana, og það sama í þá minni, nema innan í þeim er Mini alpakka frá Sandnes.
Stærð á prjónum: 3,5 og 4.

föstudagur, 7. febrúar 2020

Hneppt peysa


Þetta var jólaprjónið mitt að þessu sinni og lauk ég við peysuna fyrir nokkru, en átti bara eftir að festa tölur.


Peysan er á sjálfa mig, mig langaði í gollu.
Það gekk ekki alveg þrautalaust að gera hana, ég valdi stærð eftir uppgefnum málum í uppskriftinni, prjónaði tæplega upp að höndum, setti lykkjurnar á band og mátaði og peysan var hólkvíð.
Ég taldi út að stærð small yrði í lagi á mig, en það skrítna var að prjónafestn mín var alls ekki út úr korti, en samt ekki alveg rétt.


Svo þá var bara að rekja upp og byrja upp á nýtt. Ég fitjaði upp á medium peysu, en tók svo úr í hliðum með jöfnu millibili þannig að við berustykkið myndi hún verða komin í stærð small.
Bolurinn er prjónaður fram og tilbaka en ermarnar í hring, þannig að ég notaði hálfu númeri grófari prjóna fyrir ermar. Ég prjóna lausar fram og tilbaka.


Garnið er Drops cotton merino, keypt í Gallery Spuna.
Tölurnar keypti ég í Rokku.
Prjónastærðin er 4, en 4,5 í ermum.

fimmtudagur, 30. janúar 2020

Húfan Ösp


Nú er ég búin að prjóna aðra húfu á ömmudrenginn. 
Þetta er húfan Ösp sem ég prjónaði á yngstu ömmustelpuna fyrir rúmu ári.
Ég gerði minnstu stærðina á hann.
Þessi húfa er bæði skemmtileg og fljótprjónuð.
Garnið, Drops merino extra fine, og dúskinn,  keypti ég í Gallery Spuna.
Uppskriftin er frá Knillax.