Heildartala yfir síðuflettingar

sunnudagur, 29. mars 2009

Það tókst!

Jæja, ég dró fram handbókina sem fylgir EQ6, fletti uppá blaðsíðu 288 og þar stóð allt sem ég þurfti að vita! Það þarf að lesa sér til um flest í þessu forriti, því það virkar ekki eins og hvert annað forrit í PC tölvu. En svona á teppið sem sagt að líta út í aðalatriðum. Litirnir eru ónákvæmir, en þó í áttina.

Stjörnuteppið - á leiðinni

Hér sést afrakstur helgarinnar hvað varðar stjörnuteppið.
Svo ætla ég að setja munstraðan kant kringum teppið. Mér hefur ekki tekist að flytja myndir beint úr EQ6 yfir á bloggið. Gerði margar tilraunir í dag, en tókst ekki. Þarf að læra það.

Hér er pappírinn í kantinn tilbúinn, og næsta skref er að klippa efnið. Búin að búa til skapalón.



föstudagur, 27. mars 2009

Kaleidoscope

Ákvað að sýna núna veggteppi sem ég gerði fyrir tæpum 4 árum. Ég teiknaði það í EQ6 og saumaði með pappírssaumi.
Það er gert úr 6" blokkum, og utan um átti að vera kantur. Þá reyndist teppið of stórt, því ég saumaði það sérstaklega á háan vegg í svefnherberginu okkar, sem þá var nýtt. Ég var búin að sauma kantinn á, en spretti honum af og lét mjóa kantinn duga.

Regluleg munstur, þar sem sama munstrið þekur allan flötinn, höfða alltaf mest til mín, og svo finnst mér mest gaman af "scrappy" efnavali.



þriðjudagur, 24. mars 2009

Átta arma stjörnur

Nú er ég að sauma saman átta arma stjörnur. Þær eru 7 tommur að stærð saumaðar. Ég fann þær í EQ6 og prentaði út fyrir pappírssaum.
Ég ætla að byrja á að sauma 20 stykki. Núna er ég búin með 17, svo sé ég til hvort ég geri meira.

Grunninn hef ég ljósari en stjörnuna, en alls ekki mjög ljósan.

Auðvitað verða nokkrar rauðar með.

Hér er fyrirmyndin af teppinu. Hún er úr júlí/ágúst 2007 hefti af Fon´s and Porter´s Love of Quilting. Ég sé svo til hvernig ég útfæri það frekar.





mánudagur, 23. mars 2009

Húfa

Þá er ég búin að prófa að nota Fabel garnið í rendur með rauðu Lanett garni. Svo prjónaði ég núna snúrurnar eins og kennt er hér. Það er mjög fljótlegt og auðvelt, og ég tek upp þessar fjórar lykkjur, sem á að fitja upp, úr húfunni sjálfri, og þá þarf ekki að sauma bandið á. Uppskriftin af húfunni er svo hér.

 

föstudagur, 20. mars 2009

Sætir sokkar

Ég varð að prjóna þessa sokka. Þeir eru svo pínulitlir, fyrir sex mánaða, en svo fullorðinslegir í laginu. Það er hægt að prjóna þá minni, og svo alveg upp í fjögurra ára. Þessir eru prjónaðir úr Trysil ungbarnagarni frá Europris á prjóna nr. 2,5.
Í uppskriftinni eru þeir prjónaðir úr Fabel og verða því marglitir. Hér er hægt að nálgast uppskriftina.

 

mánudagur, 16. mars 2009

Fitjað upp

Fyrir helgina fitjaði ég upp á peysu, því mig vantað eitthvað til að hafa á prjónunum. Þetta ætti að duga mér í nokkra daga, því ég á að prjóna 80 sentímetra slétt og brugðið á prjóna nr. 4, og það eru 162 lykkjur í umferðinni. Eins og ég er hrifin af rauðu, þá er ég afskaplega treg til að nota það í flíkur á sjálfa mig, svo nú ætla ég að ögra sjálfri mér.

sunnudagur, 15. mars 2009

Legghlífar

Þessar legghlífar var ég að ljúka við að prjóna. Ég notaði svartan léttlopa, og saumaði svo áttablaðarós í báðar á annarri hliðinni. Uppskriftin er úr prjónablaðinu Lopi 27 frá Ístex.

fimmtudagur, 12. mars 2009

Dúkur úr prufubútum

Um tíma var ég áskrifandi að prufum af nýjum efnum hjá versluninni Bót á Selfossi. Þessar prufur urðu nokkuð drjúgar, og náði ég að gera þrjú verkefni úr þeim, þar á meðal þennan dúk.

Prufurnar urðu að 4 tommu ferningum, og enginn þeirra eins, oft sama munstur í mismunandi litum.
Myndirnar fyrir ásauminn fékk ég í EQ6 forritinu mínu.

Svona leit dúkurinn út í EQ6 forritinu, þegar ég var búin að hanna hann þar.




þriðjudagur, 10. mars 2009

"Redwork"

Ég hef alltaf verið hrifin af svona saumi, og áður er ég gifti mig saumaði ég puntuhandklæði í eldhúsið með rauðu útsaumsgarni, fyrir 28 árum.

Þessa mynd saumaði ég um síðustu helgi. Hún er saumuð með aftursting í óbleikjað léreft, og aftan á straujaði ég fyrst flíselín. Ég nota perlugarn no. 8 til að sauma svona myndir. Oft er gert ráð fyrir að maður noti árórugarn, og það er líka ágætt, ef margir litir eru í myndinni. En mér finnst þægilegra að nota perlugarn. Mynstrið er af netinu. Svo er bara að sjá hvað ég geri við þetta. Það kemur í ljós.

sunnudagur, 8. mars 2009

Klukka

Þá er ég búin að prjóna léttlopaskokkinn, eða klukkuna.
Ég er af þeirri kynslóð sem klæddist klukku þegar hún var lítil. Það var prjónaður kjóll, til að hafa innan undir kjól eða pilsi.
Ég stillti mig um að kaupa svartan léttlopa eins og ég var fyrst að hugsa um, en tók bláan í staðinn. Svart er alltaf það sem mér dettur fyrst í hug. Blúndan neðst átti líka að vera í ljósari lit, en ég ákvað að einfalda útlitið og nota aðeins þrjá liti. Uppskriftin er úr blaðinu Lopi 27, sem Ístex gefur út.

fimmtudagur, 5. mars 2009

Stjörnur


Þetta litla teppi hannaði ég sjálf fyrir daga EQ6. Þá vantaði mig mynd á mjóan vegg í forstofunni, og fann snið af pappírssaumuðum stjörnum í einhverri bók, og fann svo þríhyrningana annars staðar, og raðaði þessu saman. Svo notaði ég Thimbleberries efni í stjörnurnar. Stjörnur eru uppáhaldsmótíf hjá mér eins og húsin.

þriðjudagur, 3. mars 2009

Mars

Þá er marsmyndin komin upp á vegg. Hún er vorleg, þótt vorið sé ekki í augsýn sem stendur.
Hér er hægt að fá mynstrið.

sunnudagur, 1. mars 2009

Buckeye Beauty komið upp á vegg

Þá er "Buckeye Beauty" komið upp á vegg.


Helgin hefur farið í að ljúka við að stinga það.

Ég hef sjaldan stungið teppi svona mikið í vél, en ég er um leið að æfa mig í því. Ég hef notað ýmsar aðferðir í þessu teppi. Ég hef stungið gegnum pappír, stungið meðfram kanti með fætinum góða, gert skapalón og strikað í kringum þau með bleki, sem hverfur eftir dálítinn tíma, og svo notaði ég bútasaumsspor úr saumavélinni til að stinga mjóa rammann. Síðast en ekki síst notaði ég svo krákustíg.



Litirnir í teppinu eru ekki þeir litir sem ég er vön að velja, heldur keypti ég óséðan pakka með 50 stykkjum af 5 tommu bútum af einlitum efnum frá Thimbleberries.


Þess vegna er svo gaman að hengja það upp og sjá hvernig þessir litir virka á heimilinu.