Heildartala yfir síðuflettingar

mánudagur, 16. september 2019

Gromguttbukse


Gromguttbukse heita þessar strákalegu buxur, sem ömmustrákurinn fékk.
Þær eru á 3 mánaða.
Garnið er Merinoull frá Sandnes og uppskriftin er úr Klompelompe - strikk til hele familien.
 

sunnudagur, 15. september 2019

Heimferð


Þetta er peysan Heimferð úr bókinni Prjónað af ást.
Það var alveg sérlega gaman að prjóna hana.  Uppskriftin er mjög skýr, þurfti aldrei að rekja neitt upp. Ég ákvað að hafa hana í stærð 6 mánaða, og auðvitað er hún prjónuð á litla ömmustrákinn minn.
 

Svo passaði að gera lestarsokka og hjálmhúfu í stíl, og stærð húfunnar er líka á 6 mánaða.


Ég prjónaði úr Drops baby merino frá Gallery Spuna.

laugardagur, 14. september 2019

Garngönguhúfan 2019


Ég prjónaði mér garngönguhúfuna í ágúst, skömmu eftir að uppskriftin kom út.
Ég notaði Kambgarn og prjóna 3,5, og passar hún mér ágætlega.
Þetta var ágætis kennsla í stuttum umferðum, og  uppskriftin mælti með að nota "German Short Rows".  Mér finnst sú aðferð koma ótrúlega vel út.
Ég komst hins vegar ekki í garngönguna að þessu sinni, en ætla að nota húfuna þegar fer að kólna.

þriðjudagur, 10. september 2019

Heimferðarsett


Fjórða barnabarnið okkar hjóna bættist í hópinn þann 4. september.
Í þetta sinn var það drengur, en við eigum þrjár stelpur fyrir.
Foreldrarnir völdu uppskriftir og liti í heimferðarsettið.
Peysan, buxurnar, vettlingarnir og  húfan með tölunum er úr Klompelompe bókunum, hjálmhúfan úr Babystrik pa pinde 3 og sokkarnir og trefillinn eru í grunninn frá Prjóna Jónu, en með munstrinu úr peysunni, og eins hef ég sokkana aðeins grynnri en uppskriftin segir til um.
Drengurinn fór heim í fötunum, þau eru aðeins of stór ennþá, en hann vex fljótlega upp í þau og upp úr þeim.

mánudagur, 2. september 2019

Sporabók - Stitch Bible


Fyrir nokkru saumaði ég öll sporin sem eru í Husqvarna Epic 980Q saumavélinni minni.
Ég hef gert þetta áður með aðrar vélar sem ég hef átt, en ekki svona skipulega.

Vélin hefur helling af saumum, og í þessu verkefni kom í ljós að ég á allt sem ég þarf til að geta saumað það sem hún býður upp á.

Svo er gott að fara í gegnum alla sauma. 
Maður lærir af því, og er þá búinn að prófa allt.


Sporunum er skipt í 19 flokka í saumavélinni.

Þeir eru merktir með bókstöfum.

Ég notaði ákveðinn lit á tvinna fyrir hvern flokk, og setti bókstafinn fremstan þegar nýr flokkur byrjaði. Ég hafði alltaf flíselín undir efninu.
Þegar öll sporin voru saumuð þá saumaði ég saman tvö spjöld, þannig að til varð framhlið og bakhlið.


Hér að ofan eru spor sem gera ráð fyrir litlum steinum sem maður límir á efnið.
Keypti þá í Twill í nokkrum litum.

Svo eru pallíettuspor, vélin saumar pallíettuna á.
Lenti reyndar í vandræðum með að finna réttar pallíettur, hún tekur ekki kúptar, og ég fann hvergi annað en þannig í búðunum hér.  Endaði á að kaupa sléttar á Ebay.

Ég get saumað þvottaleiðbeiningar.....

Svo er hægt að sauma í ýmsar áttir án þess að snúa efninu.

Og hér er eitt dæmi um hvað hægt er að gera, notaði grófan ullarþráð.

Hér geymi ég svo allar prufurnar.

þriðjudagur, 27. ágúst 2019

Vinterkonglegenser


Leikskólapeysa á 4 ára ömmustelpu.
Uppskriftin er í Klompelompe strikk aret rundt.
 

Ég prjónaði stærð fyrir 4 ára, og passar peysan vel, aðeins rúm en ekkert meira.
Garnið er Klompelompe Tynn Merinoull, keypt í Rokku.

fimmtudagur, 22. ágúst 2019

Baby Born dúkkuföt


Hér er ég búin að prjóna dress á dúkkur ömmustelpnanna þriggja.
 

Þær verða allar að fá eins, að sjálfsögðu.
 

Uppskriftirnar eru allar úr Klompelompes sommerbarn.
Prjónaði flest úr bómullargarni, allt nema peysuna og húfuna á síðustu myndinni, þar notaði ég ullargarn.
 

Það skemmtilega er að öll fötin eru dúkkuútgáfur af barnastærðum af sömu flíkum.

miðvikudagur, 14. ágúst 2019

Borðmottur


Við notum mikið svona mottur undir allt mögulegt í eldhúsinu, bæði fyrir matardiska og ýmislegt annað.  Borðplöturnar eru úr eikarlímtré og eldhúsborðið líka, svo okkur finnst gott að hafa eitthvað undir ílátum t.d. með heitum mat.
Sniðið af þessum fékk ég í EQ8 forritinu mínu og saumaði með pappírssaum.
 

miðvikudagur, 7. ágúst 2019

Fjölnota innkaupapokar


Í vikunni fór ég upp á háaloft og fann til efni til að sauma úr fjölnota innkaupapoka.
Við notum bara svona poka núna undir matarinnkaup og fleira.
Hef líka látið börnin mín fá svona poka.
Mest eru þetta gardínuefni og svo ein svört saumuð upp úr flík.
Svona pokar eru mjög þægilegir, bara að muna að henda þeim í þvottavél öðru hverju.