Skólapeysur

Það var alveg kominn tími á að prjóna nýjar peysur á litla flokkinn minn. Nú eru börnin 5, 7 og 9 ára og ég þurfti að róa aðeins á önnur mið en venjulega eftir uppskriftum út af elstu stelpunum. Fyrr á árinu keypti ég bókina Skólapeysur sem Prjónafjelagið gaf út. Stærðirnar í henni eru fyrir 6-14 ára.

Þar valdi ég uppskriftina Selás til að prjóna eftir á stelpurnar. Ég var hins vegar með fínna garn en gefið er upp þannig í stað þess að fara eftir lykkjufjölda í stærð 10 ára fitjaði ég upp fyrir stærð 12 ára á þær elstu en hélt sídd á ermum og bol fyrir 10 ára. Það sama gerði ég hjá þeirri sjö ára, fitjaði upp fyrir 10 ára en hélt sídd fyrir 8 ára. Notaði uppgefna prjónastærð, no.6.

Þetta heppnaðist, allt passaði vel á þær. Hafði hálsmálið líka lægra og víðara en í uppskriftinni.

Mér hefur aldrei fundist gaman að prjóna upphækkanir með stuttum umferðum en þessi uppskrift bæði byrjar og endar á upphækkunum. Hins vegar fann ég íslenskt vídeó með aðferð sem gekk svona svakalega vel hjá mér að nota að upphækkanirnar urðu það skemmtilegasta í prjóninu.

Fimm ára pilturinn fékk peysu eftir annarri uppskrift úr bókinni Prjónað af ást eftir Lene Holme Samsøe. Uppskriftin heitir Uppáhaldspeysa Sveins, stærð 6 ára.

Og hér eru allir komnir í peysurnar…..

Ég notaði Drops Air í stelpupeysurnar og prjóna no.6 og Drops Merino Extrafine í strákapeysuna. Öll börnin völdu sjálf lit fyrir sig.

 

🎃 👻 Hrekkjavaka 🕷️ 🕸️ 🎃

 

Það er alltaf svolítið gaman að gera smá hrekkjavökuskraut, sérstaklega þegar maður fylgist með erlendum facebook hópum. Kreative Kiwi er með mjög virkan og skemmtilegan hóp á fésinu og þar fær maður hugmyndir. Þessi graskersstæða kemur í nokkrum stærðum, mín er 45 sm á lengd. Þetta er sama munstur og í færslunni hér aðeins neðar en þar sleppti ég andlitunum.

 

Blýantaskrautið er úr filti. Margar í hópnum saumuðu svona til að gefa börnum, sem von var á að bönkuðu upp á, í staðinn fyrir sælgæti. Ég gaf barnabörnunum mínum fjórum það sem ég gerði, fjögur á mann.

Svo stóðst ég ekki þessar sætu vofur. Þær eru bókamerki, en ég setti líka lykkju efst.

Önnur útgáfa af graskerjunum, stök í mörgum stærðum, alveg upp í diskamottustærð.

Svo bætti ég fjórum laufblöðum eftir að ég var búin að sýna fimm önnur neðar á síðunni. Læt þau fljóta hér með.

Að lokum skelli ég líka þessu hjarta með, sem ég saumaði fyrir tæpum tveimur árum en hef aldrei sett hér inn á bloggið. Þá var ég nýbúin að eignast MySewnet forritið og var að prófa allt mögulegt skemmtilegt, þar á meðal þetta. Það er sem sagt hægt að setja texta inn í margvísleg form, ég valdi hjartað. Svo raðast orðin á ýmsan hátt með ýmsum leturgerðum, og þegar maður er ánægður með það sem maður sér er vinnan fólgin í að teygja og toga stafina þannig að orðin fylli upp í flötinn. 

Að sjálfsögðu valdi ég nöfnin á litla uppáhaldsfólkinu mínu. 

Tvær Erlur

Seint í sumar prjónaði ég tvö pör af vettlingunum eftir uppskriftinni “Erla” í bókinni Íslenskir vettlingar.

Ég hugsa að pörin af Erlu sem ég hef gert séu að verða hátt á annan tuginn. Flest þeirra hef ég prjónað úr Flora frá Drops, en eitthvað úr sokkagarni frá Vatnsnesi. 

Í þessa notaði ég Flora og prjóna nr. 2.

 

🍂 Haust 🍁

Ég hef gaman af því að skreyta smávegis eftir árstíðum. Þetta haustföndur varð til í útsaumsvélinni. Haustlitirnir í efnunum skila sér ekki alveg í útibirtunni, eru í rauninni dýpri og hlýrri.

Lengjan er um 45 cm, en hún kemur í styttri og nokkrum lengri útgáfum í munstrinu.

Hún er gerð í fjórum skrefum þar sem þarf að tengja allt saman jafnóðum.

 Svo saumaði ég nokkur laufblöð í tveimur stærðum, koma stærri líka. Þessi eru fín sem glasamottur eða bara til að fleygja á borð til að skreyta.  Bæði munstrin eru frá Kreativ Kiwi.

Dúkkukjólar

Einhvern tíma í sumar prjónaði ég þessa kjóla á dúkkurnar. Ég var ekki með sérstakar uppskriftir af þeim, heldur notaði ég uppskriftirnar af dúkkupeysum og kjól sem ég skrifaði um í þessari færslu, sem grunn til að miða við. Þar fæ ég lykkjufjöldann og skiptingu í ermar og bol, þar sem byrjað er að prjóna ofan frá. Svo er bara að hafa stuttar eða langar ermar, útvítt eða beint o.s.frv. Mjög auðvelt að spinna þetta upp jafnóðum. 

Allir kjólarnir eru hnepptir að aftan.

 

Húfur og ennisbönd

Ég fann dálítið sniðuga leið til að nýta afganga af jersey bómullarefnum. Ég keypti snið hjá Stofflykke af húfu, ennisbandi og hálskraga, og prófaði að sauma tvö bönd í barnastærð og eitt fullorðins og mátaði og fóru þau til þeirra sem þau pössuðu. Þurfti aðeins að aðlaga stærðir.

Svo fengu barnabörnin að velja sér efni í húfu eða ennisbönd eða bæði, eins mörg og þau vildu, allt eftir smekk.

Til urðu þrjár húfur og ellefu ennisbönd.

Húfurnar og böndin eru tvöföld, og í saumaferlinu er merkimiða stungið í saumfarið á réttum stað.

Sniðið fæst HÉR.

 

Vettlingar fyrir veturinn

Haustið nálgast og kominn tími til að prjóna skólavettlinga á barnabörnin fjögur. Ég hef undanfarið prjónað eftir uppskrift úr Leikskólafötum, en sú uppskrift nær aðeins upp í sex ára aldur. Börnin eru á aldrinum 5-9 ára og þurfti ég að finna aðra uppskrift. Hana fann ég á síðu Storksins. Hún er frí og heitir Randalíus. Mjög góð að fara eftir og rétt í stærðum.

Í vettlingana hér að ofan notaði ég Smart garn úr Rúmfatalagernum, endurnýjaði kynni mín við það, hef ekki prjónað úr því síðan synir mínir voru litlir fyrir nokkrum áratugum. Garnið í ljósu vettlingana er Merino Blend DK, keypt á sama stað. Prjónarnir voru nr. 4. Að sjálfsögðu saumaði ég merkimiða inn í hvern einasta vettling.

 

Dúkkuföt

Ég hef nóg að gera við dúkkufatagerð. Hér eru það sumardress á dömurnar. Þær þurfa jú að eiga eitthvað til skiptanna.

Sniðið af þessum bolum fann ég frítt á netinu frá Liberty Jane Clothing. Koma í tveimur stærðum, 14” og 18”. Þeir eru alveg opnir að aftan og lokað með fínum riflás. Myndirnar framan á þeim skar ég sjálf út úr HTV vinyl í skurðarvélinni minni.

 Stuttbuxurnar gerði ég eftir sniði frá Kreativistine. Þær eru síðar á sniðinu en ég hafði þær bara stuttar.

Melkorka

 Þessi mynd heitir Melkorka. Hún er frá Saumakassanum eins og aðrar þrjár myndir sem ég hef saumað. Ég splæsti henni á mig í vor þegar ég sá fram á að verða ein í húsinu í tæpa viku í júní þegar eiginmaðurinn og synirnir tveir færu í feðgaferð til Lissabon, gjöf frá sonunum til pabba síns í tilefni stórafmælis hans fyrir nokkru. Ég er ekki vön því að vera ein og eiginmannslaus heima svona lengi, og hlakkaði ekki til þess, en ákvað að eiga myndina tilbúna svo ég hefði eitthvað til að hlakka til, og byrjaði ekki á henni fyrr en þeir voru farnir. Hún er frekar fljótsaumuð, enda mikið um beinar, samsíða línur. Skemmtilegt verkefni.

Hilda hoodie

 Ég saumaði mér þriðju flíkina eftir sniðinu Hilda hoodie frá Ida Victoria. Núna hafði ég hvorki hettu né háan kraga heldur bara mjótt stroff í hálsinn, og stytti ermarnar í 3/4 lengd því ég kippi alltaf ermum upp ef þær eru í fullri lengd og gengur misvel að halda þeim uppi. Þá er bara eins gott að stytta þær. Ég síkkaði þennan peysukjól eins og þá fyrri, en er jafnvel að spá í að stytta hann aðeins. Sé til með það. Kjóllinn er að öllu leyti saumaður á overlockvélina og efnið keypt í Noregi.

Meira af dúkkufötum

Ég held áfram að auka aðeins fataeign dúkknanna á meðan ömmustelpurnar hafa gaman af því að leika sér með þær. Leikurinn gengur mikið út á að klæða þær upp á fyrir alls konar tilefni. Þær eru ýmist að fara í partý, ferðalög eða annað.

Mér var bent á að þær ættu ekki almennileg sumarföt og ég var beðin um að redda því áður en þær kæmu næst. Svo opnuðu þær skúffu með efnum frá mér og völdu efni í hvelli áður en þær fóru heim. Sniðið fann ég frítt á netinu, það er frá Bankky/Craftymom. Sniðið er af stuttbuxum en kemur meira út eins og buxnapils á stærri dúkkunum, en passar betur á þá minni, en stelpurnar voru sáttar.

Svo var ég búin að prjóna þessar peysur, kannski ekki mjög sumarlegar, en það verður að hafa það. Þær eru bara prjónaðar af fingrum fram, byrja efst á þeim öllum og svo getur maður bara gert alls konar útgáfur, stuttar eða síðar ermar, mismunandi kraga, hneppt að framan eða aftan, stroff eða garðaprjón og líka kjóla. 

 

Hlýrabolir á börnin

Ég hef átt sniðið af þessum hlýrabolum nokkuð lengi, aðallega til að sauma bol á sjálfa mig, sem hefur ekki orðið ennþá. Datt þá í hug í vor að sauma á barnabörnin mín fjögur, sem eru 5, 7 og tvær 9 ára á þessu ári, því sniðið kemur í stærðum bæði fyrir börn og fullorðna.

Sniðið heitir Ida Victoria Singlet. Efnin eru frá Litlu músinni. Ég lét öll börnin velja sér sjálf efni á netinu.

Bakið kemur í tveimur útfærslum, þessari hér að ofan og svo með heilu, venjulegu baki. Ég saumaði þessa útgáfu á stelpurnar þrjár, en með venjulegu baki á strákinn. Bolinn hans hafði ég líka beinan í hliðum, en sniðið gerir ráð fyrir að hliðarnar komi aðeins inn í mittið. Fyrst saumaði ég prufuboli í öllum stærðunum úr gömlu jerseylaki til að tékka á hvernig sniðið passaði þeim, og gerði smá breytingar þar sem þurfti.

                                    Allt smellpassaði og krakkarnir sáttir❤️
 

Hilda Hoodie

Ég hef áður saumað mér svona eins konar peysukjól eftir þessu sniði. Núna hafði ég hann með hettu og úr venjulegu bómullarjerseyi. Hafði líka ermarnar aðeins styttri. Önnur breyting sem ég hef gert á báðum er að hafa kjólinn sjálfan lengri en mjókka aðeins stroffið að neðan. Þessi verður fínn í húsbílaferðalög sumarsins.

                      Sniðið heitir Hilda Hoodie og er frá Ida Victoria, og ég keypti efnið hjá henni líka.

Fleiri dúkkuföt

Þessar dúkkur geta alltaf bætt við sig fötum. Mér finnst líka gaman að taka smá rispur í dúkkufatagerð, enda þurfa ömmustelpurnar að hafa úr einhverju að velja. Þessar tvær stærri eru 18” dúkkur og sú minni 14” að stærð. Ég nota tommumálin frekar því þá finn ég miklu meira úrval þegar ég leita að sniðum og uppskriftum.

Buxnasniðið á þessa litlu bjó ég nú eiginlega til sjálf, var með einhvern grunn sem passaði engan veginn þannig að ég breytti og minnkaði þangað til þetta varð sæmilegt.

Peysurnar á stærri dúkkurnar eru eftir fríum uppskriftum á Ravelry, og þá bleiku reyndi ég að hafa í stíl við hinar en þurfti að gera tvær tilraunir til að láta hana passa. Þá gulu gerði ég svo bara eftir sama grunni.

Sniðin af buxunum á stærri dúkkurnar eru hins vegar úr sniðapakka fyrir 18” dúkkur frá Kreativistine í Noregi. Hún gerir snið á fullorðna og börn, og hefur gert dúkkufatasnið í stíl við barnafatasniðin.

 

Sumarpúði

Þegar ég keypti Husqvarna útsaumsvélina mína fylgdu með henni tveir efnisbútar og undirlag til að setja í útsaumsramma og sauma. Mig langaði alltaf að nota þá í eitthvað fallegt.

Svo var það þessi mynd….mér fannst hún alveg sérlega falleg, og þegar ég fór að tína til tvinna í hana til að vita hvort ég ætti eitthvað af litunum og hvað ég þyrfti þá að kaupa í viðbót, þá kom í ljós að ég átti hér um bil öll réttu litanúmerin í hana og þurfti engu að bæta við.

 Annar búturinn varð þá að þessum sumarlega púða sem prýðir nú sófa á heimilinu. Hann átti fyrst að fara á hjónarúmið en passaði svo vel þar sem ég fleygði honum niður til að taka mynd að hann hefur legið þar síðan.  Ég notaði stærsta rammann sem fylgdi vélinni, 36x20 rammann. Munstrið er í vélinni minni.