Saumað í viskastykki og fleira

Ég tók nokkur eldhúshandklæði og saumaði á þau með útsaumsvélinni. Ég hafði ekki prófað að sauma í svona “vöffluvefnað” og vildi prófa það. Þetta eru handklæði sem ég hef við vaskinn, keypt í Ikea.
 

Trikkið var að setja uppleysanlegt handklæðaplast yfir handklæðið, og þá flaut myndin ofan á efninu í stað þess að sökkva ofan í það.

Þá vatt ég mér í að sauma út í viskastykki sem er líka úr svona “vöffluefni”.  Ég sé svona viskastykki mikið notuð í útsaum, en þetta var í fyrsta sinn sem ég prófaði það. Þetta saumaði ég handa vinkonu okkar sem býr á samnefndri jörð fyrir norðan.

Ég tók líka nýja svuntu frá Ikea og setti skemmtilega mynd efst á hana. Það þarf að passa að gera ekki of mikið eða litríkt á svona röndótt efni. Bara eitthvað einfalt.

Cosmo

Ein ömmustelpan mín, hún Auður Katla, er mikill aðdáandi Sanrio karakteranna, og safnar þeim og ýmsu sem þeim tilheyrir. En hún er líka mjög skapandi stelpa og býr allt mögulegt til sem hún lærir á Youtube, og saumar á saumavél sem hún á sjálf ásamt bróður sínum, vél sem hin amma þeirra gaf þeim í vor.

Í sumar gerði hún þennan haus sem tilheyrir Cosmo úr Sanrio fjölskyldunni, en er hér karakter í Roblox leiknum Dandys World. Hún gerði hann alveg sjálf úr pappa sem var ekki auðvelt og var með alveg sér vinnuborð í bílskúr foreldra sinna. En hana vantaði hettubolinn sem persónan klæðist og bað mig um hjálp. 

Svo vel vill til að langamma hennar í móðurætt skildi eftir sig dálítið af ónotuðum efnum sem voru sett í mína vörslu og þar fann ég efni í peysuna. Þetta var samvinnuverkefni okkar Auðar, ég tók upp snið, hún klippti út, en ég saumaði allt.  Ætlaði fyrst að láta hana sauma eitthvað, en sá að tíminn leyfði það ekki fyrir utan að ég notaði overlock vélina að mestu, sem er ekki fyrir börn. Svo klúðraði ég saman vettlingum í restina sem voru bara fyrir útlitið.

Afi hjálpaði líka við að setja tjullið fyrir augun, erfitt að líma niður tjull.
 

Ég gat notað sniðið af Hildas Hoodie hettupeysunni frá Ida Victoria, minnstu kvenstærðina, enda er daman orðin 10 ára. Ég breytti hettunni aðeins að framan til að geta sett bönd. Þetta heppnaðist sem sagt og allir glaðir. Svo hef ég heyrt að hún noti peysuna líka dags daglega.

Cantaloupe sjal

Ég átti afgang af grænu Drops Air sem ég ákvað að nota í þetta litla sjal þegar mig vantaði eitthvað til að prjóna. Uppskriftin er frá Garnstudio og heitir Cantaloupe Shawl. Þetta garn var afgangur frá peysuprjóni, og ég lét ömmustelpuna sem fékk þá peysu líka fá sjalið.

 

Og af því að mér þótti svo gott að hafa það um hálsinn, þá keypti ég í annað sjal fyrir sjálfa mig. Passlega lítið til að hafa þegar ekki er of kalt en samt ekki nógu hlýtt.

Teppi úr gömlum efnum

Ég á mikið af efnum og eru mörg þeirra áratuga gömul, og voru gamaldags á þeim tíma sem ég fékk þau.

Ég ákvað einhverntíma að halda þeim sér og sauma eitthvað úr þeim sérstaklega og mörg þóttu mér ekki falleg. En þegar þau eru svona saman hefur samsetningin ákveðið yfirbragð sem ég er sátt við.

Þetta munstur rakst ég á einhvers staðar á netinu og ákvað að nota það fyrir gamaldags efnin mín. Þetta eru 4 tommu ferningar, heilir og samsettir. Ég skar út með 4,5” og 2,5” stikum, mjög þægilegt að nota stikur í réttri stærð.

Bakið gerði ég líka úr sömu efnum til að minnka birgðirnar, samt er slatti eftir ennþá.

Merkið er á sínum stað, saumað í útsaumsvélinni eins og ég geri alltaf núorðið. Hafði það einfalt.

                         Una Lóa, yngsta ömmustelpan mín, aðstoðaði við myndatökuna í dag.

Húsdýr

 Það er svo margt til hjá Kreative Kiwii sem gaman er að vinna í útsaumsvélinni. Ég féll alveg fyrir þessum kisum sem eru í rauninni bollamottur en geta líka verið bókamerki eða bara hvað sem er. Þær fóru til barnabarnanna enda búa þau á kattaheimilum.

Svo freistaðist ég til að sauma restina af bústofninum, gat ekki skilið þessi eftir.

Hér eru þau svo öll samankomin. Þette er mjög fljótlegt og skemmtilegt verkefni og fæst eins og áður sagði á síðu Kreative Kiwii.

Vettlingar

 Einhvern tíma á útmánuðum prjónaði ég vettlinga á barnabörnin fjögur. Ég sá nýtt garn frá Drops í Gallery Spuna og langaði að prufa það. Finnst það koma skemmtilega út í svona vettlingum. Ég notaði uppskriftina góðu sem er frí á heimasíðu Storksins, Randalíus. Garnið heitir Fiesta.

Páskaskraut

Um leið og ég tek niður páskaskrautið ætla ég að sýna það sem ég saumaði í útsaumsvélinni fyrir nýliðna páska. Munstrið kemur frá Kreativ Kiwii eins og margt annað sem ég geri.

Minni lengjan er 30 sm og var sú minnsta, og sú stærri um 46 sm, en hægt er að hafa þær ennþá stærri.

Ég er ekki viss um að myndirnar sýni alveg réttu hlutföllin, munurinn er ekki alveg eins mikill og þær sýna. 

 

Kanínubangsar

 Nýlega sá ég þessa sætu kanínubangsa á síðu Kreativ Kiwii og saumaði handa barnabörnunum. Þau virðast aldrei fá nóg af mjúkdýrum og alls konar böngsum. Bangsarnir eru alfarið saumaðir í útsaumsvélinni fyrir utan eitt lítið op fyrir fyllinguna sem þarf að handsauma.

Ég notaði flísefni sem ég átti og kom það mjög vel út. Bangsarnir koma í nokkrum stærðum og saumaði ég þá minnstu.

Uppskriftin er frí hjá Kreativ Kiwii.

Aðventusjal/Adventsjal

 Ég hef áður prjónað þessa uppskrift. Mér finnst gaman að prjóna hana og stærðin og lagið á sjalinu er akkúrat eins og ég vil hafa það. Það heitir Aðventusjal, en þegar komið er svona nálægt páskum finnst mér hálf skrítið að vera að sýna sjal með þessu nafni. En það var prjónað fyrir þó nokkru síðan, ég hef það mér til afsökunar.  Hér eru allar upplýsingar um hvar uppskriftina er að finna. Ég man ekkert hvaðan garnið er, átti það í handlitaða garnsafninu mínu, en prjónarnir voru nr. 4.