“Crazy” bútateppi með útsaumsívafi

Það höfðu safnast fyrir hjá mér ýmsar prufur úr útsaumsvélunum sem tóku pláss í skúffum en ég tímdi ekki að henda. Hvað gerir bútasaumari þá? Jú, býr til blokkir og gerir teppi. Flestar prufurnar voru reyndar úr Pfaff creative 1.5 vélinni, aðeins tvær úr nýju Sapphire 85 saumavélinni. Ég tók þær sem hægt var að nota og setti þær í miðjuna á “crazy quilt” blokk. Ákvað að finna blokkir í EQ8 forritinu og sauma með pappírssaum, hafði tvær gerðir sem ég raðaði upp til skiptis. Svo notaði ég enn einu sinni afganga en skipti efnunum í tvennt til að forðast að sama efni snertist í tveimur blokkum þegar ég saumaði þær saman.

Síðan valdi ég nokkra af þeim fallegu og fjölmörgu skrautsaumum sem eru í Epic 980Q vélinni til að stinga og notaði til þess Cotty 30 tvinna. Stungan varð að vera “crazy” líka, og svakalega var gaman að sitja við og klára þetta.

Merkimiðann aftan á saumaði ég að sjálfsögðu í útsaumsvélinni, og yfirleitt reyni ég að velja liti í myndina á miðanum sem passar við bakefnið. Það er skýringin á frekar skrítnu litavali hjá mér að þessu sinni, en bakefnið er mjög litríkt og skrautlegt.

 

Húfur

Tvær ömmustelpur langaði í nýjar húfur, og amma var ekki lengi að prjóna þær handa þeim. Þessi að ofan er húfan Bella úr bókinni Prjónað af ást eftir Lene Holme Samsø. Hún er prjónuð úr Drops merino extra fine á prjóna nr. 4 og 3,5. Stærðin er á 4-8 ára.

Þessi hér að ofan heitir Hubbabubba-lue. Hún er úr Klompelompes vinterbarn, líka prjónuð úr Drops merino extra fine á prjóna nr. 3 og 3,5. Stærðin er á 3-6 ára.

Báðar dömurnar völdu bæði uppskrift og lit sjálfar. Garnið valdi ég því mér finnst það alveg sérlega skemmtilegt í húfuprjón.

 

Sporabækur

Þegar ég fékk Sapphire 85 útsaumsvélina mína gerði ég ráð fyrir að skrautsporin í henni væru nokkurn vegin þau sömu og í Epic 980Q vélinni, og það yrði óþarfi að gera sérstaka sporabók fyrir hana. Ég fór nú samt að nördast aðeins og bera saman sporaflokkana. Þá kom í ljós nokkuð sem ég átti ekki von á: það voru fleiri spor í Sapphire vélinni en í Epic vélinni. Þetta kallaði á sporabók fyrir hana líka, en ég ákvað að sauma bara þau spor sem ekki voru í Epic vélinni og merkja þau með flokki og númeri. Öll sporin í Epic vélinni voru líka í Sapphire vélinni. Þegar upp var staðið voru þetta um 100 spor sem munaði.

Svo gerði ég forsíður fyrir hverja vél í útsaumsvélinni. Munstrin fékk ég ókeypis hjá Kreativ Kiwi.

Mér finnst mjög gaman að að fara í gegnum það sem vélin getur gert, prófa það allt. Mæli með þessu.

 

Golftreyja - Tynn Lilly-jakke

Ömmustelpu, sem verður sjö ára í sumar, vantaði nýja golftreyju, var vaxin upp úr þeirri sem ég prjónaði á hana þegar hún var fjögurra ára. Sú peysa hefur verið í stanslausri notkun og tekur tæplega fimm ára systirin glöð við henni. En þessi sem ég prjónaði núna er úr bókinni Klompelompe - Strikkefest og heitir Tynn Lilly-jakke. Hún er prjónuð þannig að bekkurinn efst er prjónaður sem lengja, síðan eru teknar upp lykkjur  á efri kantinum og hálsmálið prjónað, svo er tekið upp á neðri kantinum og prjónað niður. 

 Peysan er prjónuð fram og til baka og fannst mér það dálítið puð, en fínt bíla- og sjónvarpsprjón.  Ég prjónaði úr Lanett, daman valdi sjálf litinn og uppskriftina. Prjónarnir voru nr. 3 og 2,5, og í hnappalistann notaði ég prjóna nr. 2. Stærðin er á 8 ára. 

Svona leit munsturbekkurinn út þegar ég var búin að bleyta hann og strekkja, og taka upp lykkjur fyrir hálsmálið. Í uppskriftinni er manni ráðlagt að pressa bekkinn, en mér finnst betra að bleyta prjón, pressa aldrei.

Kokkateppi

Þetta teppi hefur hangið í nokkrar vikur í borðkróknum fyrir ofan eldhúsborðið. Ég hef alltaf verið hrifin af “Redwork” útsaumi og hef saumað mörg þannig verkefni gegnum tíðina. Samt finnst mér aldrei neitt sérstaklega gaman að sauma þau í höndunum út af fyrir sig, þótt ég vilji eiga afraksturinn. Og nú slapp ég alveg við að sauma myndirnar sjálf, því Sapphire 85 útsaumsvélin gerði þetta fyrir mig🙂

Uppskriftina fékk ég á netinu, frá Kreative Kiwi, og er hún ókeypis á síðunni þeirra. Þar heitir hún Redwork Chefs. Ég saumaði 4x4” mynstrin, og blokkin varð 8,5x8,5” að stærð. Mjög skemmtilegt verkefni.

Ég valdi þetta munstur aðallega til að skemmta barnabörnunum þegar þau sitja við eldhúsborðið hjá okkur. Þau velja sér þá þann kokk sem þau ætla að “vera” þann daginn. Sama gera þau stundum þegar þau koma inn til okkar, því í forstofunni hangir þetta húsateppi og þau byrja oft á að “velja sér hús”.

 

Armhlífar

Við erum með tvo hægindastóla úr taui í stofunni, og sit ég mikið í öðrum þeirra og prjóna. Ég var farin að setja litla bútasaumsdúka á armana til að hlífa þeim.

Þá fékk ég þá hugmynd að sauma bara hlífar á alla fjóra armana. Átti efni í lagernum mínum sem ég gat notað. Vildi ekki hafa þær áberandi, áttu helst að falla vel saman við litinn á stólunum.

Stakk allt í tígla horna á milli með bómullarvatti á milli. Notaði málningarteip til að fá beinar línur. Ég á auðvitað járn til að festa á vélina mína sem hjálpar við að sauma svona samsíða, beina sauma, en gleymdi þeim. Teipið virkar líka mjög vel. Prófa járnin næst.

Svona er bakið á hlífunum, skrautlegra, en getur líka verið flott að láta snúa upp.

 

Hringtrefill

Þennan hringtrefil prjónaði ég handa öðrum syni mínum sem pantaði hann í afmælisgjöf.  Uppskriftin er í bókinnu Sjal og skjerf - strikking hele året eftir Bitte Mikkelborg. Garnið pantaði ég frá Kristínu í Vatnsnesi (sem er uppáhalds) og heitir liturinn Even Flow. Þetta er BFL garn í DK grófleika, prjónað á prjóna 4. Ég náði stærðinni nákvæmlega samkvæmt uppskriftinni, og trefillinn smellpassaði á eigandann. Hann valdi litinn sjálfur, að sjálfsögðu, en liturinn er ekki eins gulleitur og á myndinni, sem er tekin í janúar við slæm birtuskilyrði.

 Ég læt hér fylgja með mynd af treflinum úr bókinni, en þar heitir hann Vinterbølger skjerf.

Kaffiálfur

Ég sá mynd af þessum álfi í íslenskum vélsaumshóp á Facebook og ákvað að þennan yrði ég að eignast. Ég keypti munstrið, en gekk illa að sauma það út, og gafst að lokum upp.

Þá rakst ég á hann í erlendum vélsaumshóp þar sem hann var keyptur annars staðar frá, á Etsy, og keypti ég hann þar. Og viti menn, hann saumaðist svona glimrandi vel út. Nú er hann á borði við stólinn þar sem ég fær mér morgunbollann og býður mér góðan daginn.

 Svo passar hann svo vel við bollana mína sem eru frá Ingu Elínu. Litlu hlutirnir í lífinu skipta máli ☕️

Bleikur stelputrefill

 Fyrir stuttu hringdi önnur sex ára ömmustelpan sjálf í mig (hún er með númerið mitt á hreinu og hringir oft) og bað mig um að prjóna á sig trefil, bleikan. Amman skundaði í Gallery Spuna og keypti fallega bleikar dokkur af Drops merino extra fine. Aftur hringdi daman, amma sagðist vera búin að kaupa bleikt garn, en þá sagðist hún elska dökkbleikan. Úps, amman af stað aftur í búðina til að kaupa dökkbleikt garn, sem sú stutta valdi eftir mynd. Svo varð þessi trefill til og hún sátt. Ég notaði einfalt munstur sem ég kann. Fitjaður er upp lykkjufjöldi sem er deilanlegur með 4 og einni lykkju svo bætt við. Svo eru prjónaðar þrjár sléttar og ein brugðin út prjóninn, allar umferðir eru prjónaðar eins.