Halla

Margar af peysunum mínum eru frekar síðar.

Núna vantaði mig styttri peysu undir hjólajakkann og útivistarjakkann. Það veitir ekki af að vera vel klæddur þó það sé sumar.

Uppskriftin af þessari peysu heitir Halla og er í Prjónafjöri 2.

Ég notaði Karisma frá Drops í staðinn fyrir léttlopa sem gefinn er upp.

Stór prjónataska

Aftur er ég búin að sauma verkefnatösku fyrir prjónaskapinn.

Nú vantaði mig stóra tösku. 

Venjulega hef ég geymt svona stór verkefni í körfum, en svona töskur eru miklu þægilegri.

Hér rúmast allt sem þarf í fullorðinspeysu.

Efnin eru gömul frá IKEA og keypti ég þau nýlega á bílskúrssölu í Borgarnesi.

Bútateppi úr restum

Stundum langar mig bara að sitja við saumavélina og sauma og sauma, án þess að þurfa að hugsa of mikið.

Þess vegna tók ég fram körfu með “ruslefnum” sem ég vissi í rauninni ekki hvað ég átti að gera við. 

Þau voru mörg eldgömul, mörg ekki falleg, jólaefni, litir sem ég nota ekki og svo framvegis. Hins vegar fæ ég mig ekki til að fleygja efnum. Þannig að ég tók gamla símaskrá og skar niður ferninga úr nokkrum síðum og notaði sem pappírsundirlag til að sauma á.  Flokkaði svo í ljóst og dökkt og saumaði út í eitt.

Þegar ég var svo búin að setja vatt og bak langaði mig að stinga það líka án þess að hugsa of mikið, þannig að ég stakk það með öllum sporunum sem eru í æðislegu Husqvarna Sapphire 965Q saumavélinni minni. Ég lét bara vaða.

Meira að segja bakið er úr sömu körfu, allt notað sem hægt var að nota. Líka kanturinn.

Ég gerði teppið í vetur og ætlaði ekki að sýna það hér á blogginu, en ákvað svo að gera það.

Ekkert augnayndi, en ég skemmti mér vel á meðan ég sat við vélina.

Eplapottaleppar

Sumarlegir pottaleppar í eldhúsið. Sumum finnast þeir kannski jólalegir, en ekki mér.

Sniðið keypti ég hjá Timotei.

Fleiri prjónaveski

Nú er ég búin að sauma fleiri prjónaveski.

Yfirleitt er ég með fleiri en eitt prjónaverkefni í gangi í einu, svo það er gott að hafa eitt veski í hverri verkefnatösku.

Það er fljótlegt og einfalt að sauma þau, og skemmtilegt að velja saman efnin.

Sniðið er hægt að kaupa hjá Timotei.

Prjónuð pils

Þessi pils prjónaði ég á stelpurnar mínar fyrir sumarið.

Eldri stelpurnar tvær eru tæplega þriggja ára, og pilsin eru á 4 ára, en passa alveg núna.

Sú yngsta er akkúrat ársgömul, pilsið hennar er í 2 ára stærð, pínu stórt ennþá en verður fínt þegar hún fer að ganga.

Ég notaði Drops merino extra fine frá Gallery Spuna, sem er alveg frábært að prjóna úr.

Uppskriftin birtist í Bændablaðinu fyrir einhverjum mánuðum síðan, en hún er líka hér á Garnstudio.com.

Heklaðar hreinsiskífur

Ég tók mig til um daginn og heklaði mér bómullarskífur til að hreinsa með andlitið.

Ég átti nóg af bómullarafgöngum, og reyndi að nota sem flesta liti.

Mér finnst mjög gott að nota þær.

Nú er bara ein hrein eftir, svo þá er bara að skella þeim á suðu í þvottavélinni og setja þær aftur inn í baðskáp.

Ég studdist við þetta myndband.

Prjónaveski

Ég er öll fyrir skipulagið. 

Búin að sauma mér nokkrar verkefnatöskur fyrir prjónadótið, þar sem ég set allt sem ég þarf í eitt verkefni, allt garnið og alla prjóna sem þarf að nota.

En fyrir nokkrum dögum pantaði ég snið af þessu bráðsniðuga veski fyrir prjónana sjálfa. Þarna má líka setja skæri og prjónamát.

Efnin sem ég notaði voru keypt í Storkinum, og eru frá Kaffe Fasset og Amy Butler.

Höfundur veskisins er bloggarinn Timotei, tengill á bloggið hennar er hér til hliðar á síðunni minni. 

Hún er mikil handavinnukona, saumar og prjónar, og hefur hannað nokkur snið sem eru til sölu í Epla búðinni hennar.

Hér er tengill í búðina hennar.

Lítil budda

Mér finnst gaman að gera buddur og töskur.

Uppskriftina af þessari sá ég bara á myndum einhvers staðar á netinu, man ekkert hvar, og það stendur ekkert á uppskriftinni.

Aðferðin er skemmtileg, og mjög einföld.

Ég nota hana fyrir það sem ég þarf alltaf að hafa á mér þegar ég fer úr húsi, og set hana með öllu dótinu í þá tösku sem hentar hverju sinni.

Mjög praktískt.

Ég læt fylgja myndakennsluna sem ég fór eftir, ef einhvern langar til að prófa.