Kisuteppi

 Fyrir nokkrum árum saumaði ég veggteppi til að hafa fyrir ofan eldhúsborðið. Var það fyrst og fremst gert til að skemmta barnabörnunum. Það hefur verið fastur liður að ákveða hvaða kokkur hver og einn ætlar að vera í hvert skipti.

Nú var alveg kominn tími til að breyta aðeins til og fann ég þessar myndir hjá Embroidery Library. Þær eru sjö talsins því upphaflega er gert ráð fyrir því að sauma þau í viskastykki ásamt nafni vikudagsins. Ég varð því að nota tvær myndir tvisvar og sneri þeim bara svo þær yrðu ekki alveg eins. Krakkarnir hafa ekki séð teppið tilbúið ennþá en sáu það í vinnslu og sendu frá sér eitt samhljóða og langdregið “noooooooo”, enda öll frá kattaheimilum.

Fljúgandi gæsir

Þetta teppi varð til alveg óvart. Ég hef stundum mikla þörf fyrir að sitja bara við saumavél og sauma. Þess vegna var ég byrjuð að sauma litlar blokkir af fljúgandi gæsum sem ég vissi ekkert hvað yrði úr.

 

Þær voru (auðvitað) saumaðar með pappírssaumi og sniðið kom úr EQ8 forritinu mínu.

Þá gerðist það sem gerist næstum aldrei að ég ráfaði inn á nytjamarkað og kíkti á handavinnublöðin, fann blað frá 2004 frá McCalls og keypti það ásamt einhverju fleiru. Í þessu blaði var mynd af teppinu fyrir ofan og frásögn af því hvernig það hafði verið samvinnuverkefni kvenna sem allar komu með nokkra búta.

Ég fór nú að skoða bútana mína og sá möguleikana, taldi hversu margar gæsablokkir væru í teppinu í blaðinu og þær reyndust vera 100. Það var því ekki um annað að ræða en að spýta í lófana, prenta út pappírssniðið og halda áfram að sauma. Svo teiknaði ég teppið í EQ8 og prentaði út vinnublað til að ruglast nú ekki við samsetninguna.

Eins og sjá má eru margir ljósir ferningar á milli gæsablokkanna. Ég fann efni sem ég keypti annað hvort á bílskúrssölu eða úr dánarbúi og var búið að klippa niður í stóra ferninga. Mér tókst að fá fjóra litla ferninga úr hverjum þessara stóru svo þeir nýttust vel. Að lokum hófst ég svo handa við að gera það sem ég hef ætlað lengi að prófa en það var að stinga að hluta í útsaumsvélinni, því mér fannst að það yrði að vera eitthvað fallegt í þessum blokkum. Þetta eru 40 ferningar, auk þess sem þríhyrningarnir á jöðrunum eru líka stungnir, stakk þá eins og þeir væru heilir en fór útfyrir á vattið og skar svo af. Þannig þurfti ég að setja teppið 60 sinnum á segulrammann og í vélina. Þetta gekk ótrúlega vel, ekkert klikkaði. Tók nokkra daga en varð líka léttara með æfingunni.

Efnin eru öll afklippur og afgangar sem hafa safnast upp og virðast aldrei klárast. Útsaumsmunstrið er frá Kreativ Kiwii. Svo tek ég fram að fyrst stakk ég meðfram öllum blokkunum á venjulegan hátt.

Teppi úr gömlum efnum

Ég á mikið af efnum og eru mörg þeirra áratuga gömul, og voru gamaldags á þeim tíma sem ég fékk þau.

Ég ákvað einhverntíma að halda þeim sér og sauma eitthvað úr þeim sérstaklega og mörg þóttu mér ekki falleg. En þegar þau eru svona saman hefur samsetningin ákveðið yfirbragð sem ég er sátt við.

Þetta munstur rakst ég á einhvers staðar á netinu og ákvað að nota það fyrir gamaldags efnin mín. Þetta eru 4 tommu ferningar, heilir og samsettir. Ég skar út með 4,5” og 2,5” stikum, mjög þægilegt að nota stikur í réttri stærð.

Bakið gerði ég líka úr sömu efnum til að minnka birgðirnar, samt er slatti eftir ennþá.

Merkið er á sínum stað, saumað í útsaumsvélinni eins og ég geri alltaf núorðið. Hafði það einfalt.

                         Una Lóa, yngsta ömmustelpan mín, aðstoðaði við myndatökuna í dag.

Northeasterly úr útsaumsgarni

Í gegnum tíðina hefur safnast upp hjá mér mikið af útsaumsgarni. Ég var búin að koma því fyrir uppi á háalofti og það pirraði mig að vita af því þarna og engin plön um að nota það.

 

Síðasta sumar vantaði mig eitthvað á prjónana til að hafa með í húsbílaferð og sótti garnið upp á háaloft. Valdi mér aftur uppskriftina Northeasterly sem ég hef prjónað áður, en hún hentar svo vel þegar garnið er allavega og mismikið af hverjum lit.

Ég notaði einungis ullargarn, geymdi allt annað. Svona leit bakhliðin út hjá mér, en uppskriftin gerir ráð fyrir að gegnið sé frá endum jafnóðum með því að vefa þá í prjónið jafnóðum, en það er ekki almennilegur frágangur í mínum huga. Hins vegar er þráðurinn í einni dokku ekki langur, ég tala nú ekki um ef búið er að taka af henni, þannig að endarnir urðu mjög margir sem ganga þurfti frá.

Ég saumaði niður hvern einasta enda. Þetta lítur ekki vel út í byrjun, en þá er bara að hefjast handa og annaðhvort hlusta eða horfa á eitthvað skemmtilegt og svo er þetta bara allt í einu búið.

Uppskriftin heitir sem sagt Northeasterly og fæst á Ravelry.

Lítið teppi með kaleidoscope munstri

Mér finnst alltaf jafn nærandi að sauma afgangateppi, og vinna úr afgöngum almennt. Ég sá svona teppi einhvers staðar á netinu í vor og langaði að sauma svipað, sérstaklega af því að þessi blokk er ein af mínum uppáhalds. Svo litlu afgangarnir voru dregnir fram einu sinni enn, og hafist handa. Mörg þessara efna eru áratuga gömul svo það er eins og að ferðast aftur í tímann að skoða bútana.

Ég bjó blokkina til í EQ8 forritinu, fann einhvern veginn út úr því, og sneið svo alla 576 þríhyrningana eftir skapalóni úr pappa sem ég prentaði út, strikaði i kring með blýanti og klippti út með skærum. Þarna kláruðust sum efni alveg. Reglan er sú að skipta efnunum í ljós og dökk, og mega dökkar eða ljósar hliðar aldrei liggja saman. Þetta gekk upp og var skemmtilegt að gera. 

 Og merkið fór á sinn stað, saumað í útsaumsvélinni minni góðu.  Hver blokk er 23x23 cm og allt teppið ca. 92x92 cm.

Teppi heklað úr afgöngum

Eitt af því óhjákvæmilega sem fylgir prjónaskap er að afgangar safnast fyrir. Ég kaupi reyndar aldrei garn “til að eiga.” Kaupi bara í ákveðin verkefni og skila heilum dokkum ef ég hef keypt of mikið. Eina undantekningin er ef um handlitað garn er að ræða. Ég kaupi það einstaka sinnum ef mér finnst það fallegt og veit að ég get notað það. Þessar hespur eru þó teljandi á fingrum annarrar handar (næstum).

Eins og einhverjir vita kaupi ég mikið af Drops merino extra fine í barnaföt þar sem gert er ráð fyrir grófleika fyrir prjóna nr. 4. Finnst það garn bara á allan hátt svo skemmtilegt. Og eftir að ég var búin að prjóna vettlingapör í alls konar litasamsetningum á barnabörnin var samt alltaf að bætast í afgangapokann og orðið erfiðara að loka skúffunni. Í sumar horfði ég á vídeó hjá Gunnlaugu Hannesdóttur á youtube, sem hannar undir nafninu gunnhann, alveg frábær vídeó fyrir handavinnufólk, þar sem hún hafði heklað afgangateppi með stuðlahekli. Ég hermdi eftir teppinu hennar, en málið var að það voru litaskipti í hverri umferð sem hefur í för með sér gífurlega frágangsvinnu.

En hún leysti það með tvöföldum kanti, sem er lokað í restina, og þar með lokast endarnir inni. Að sjálfsögðu þarf að tryggja þá með því að binda saman tvo og tvo, en að öðru leyti þarf ekkert að gera. Að sjálfsögðu er líka tímafrekt að hekla tvöfaldan kant, en skemmtilegra en endafrágangur og fallegra. Gunnlaug var svo vinsamleg að láta mig fá slóðina að myndbandi þar sem þetta er kennt.

Garnið er sem sagt Drops merino extra fine að mestu leyti, ég hreinsaði líka upp smávegis af svipuðum grófleika af öðru garni og heklaði á heklunál nr. 4. Í kantinn notaði ég hins vegar alls konar baby garn og var þá með heklunál nr. 3.  Teppið vegur 884 grömm sem samsvarar tæpum átján 50 gramma dokkum. Ég náði að hafa það ferning, ca.1,20 x 1,20.

P.s. Það er strax farið að safnast fyrir aftur af Drops merino extra fine afgöngum.

Bútasaumsteppi handa systrum

Þessi tvö teppi saumaði ég handa 4 ára og tæplega 6 ára ömmustelpum sem eru systur. Áður hafði ég saumað handa systkinunum sem verða bráðum 6 ára og 2 ára. Teppin þeirra eru neðar á síðunni. Teppið hér að ofan fékk sú eldri.

Þessi tvö teppi eru mjög lík, en það munar samt einu efni, ef grannt er skoðað. En ég vildi hafa þau mjög svipuð.

Dömurnar eru nýfarnar að sofa í koju, og teppin eru í fullri stærð, ca. 2,15 x 1,40. Merkimiðann saumaði ég í útsaumsvélinni minni góðu.

Efnin keypti ég á útsölu hjá Panduro þegar þau lokuðu fyrir rúmu ári síðan, og hafði þetta munstur í huga þegar ég keypti þau.

Þetta er teppi yngri systurinnar. Bakefnið keypti ég hjá Bóthildi. Sá það á síðunni hennar og var ekki lengi að ákveða mig. Skiptir miklu máli að hafa bakefni sem passar, sérstaklega á rúmteppum sem er verið að þvælast með.

Ég stakk í öll saumför, og síðan í kross yfir allt, notaði málningarlímband til að fá beinar línur og í þær stungur notaði ég Cotty 30 stungutvinna frá Pfaff.

Nú prýða teppin kojuna og fara mjög vel þar. Nú eiga öll barnabörnin rúmteppi í fullri stærð.

 Hér fyrir neðan er sýnishorn af teppunum þeirra allra. Ég reyndi að láta litaval passa hverju og einu.

Dómínóteppi úr afgöngum

Fyrir nokkrum mánuðum flokkaði ég alla garnafganga vel eftir tegundum og setti í glæra poka. Ég á mikið af ungbarnagarni, og ég tók alla minnstu hnyklana og hafði þá sér og fylltu þeir alveg gráan ikea renniláspoka, eins og maður notar í eldhúsinu. Á aðventunni vantaði mig eitthvað að prjóna og greip þessa afganga og byrjaði að prjóna ferninga með dómínóprjóni, þar sem ekkert þarf að sauma saman. Ég átti nú alveg eins von á að ekkert yrði úr þessu en svona varð útkoman. Þetta er ekki stórt, 70x88 sm, en ömmustelpurnar tóku það til handargagns þegar þær voru hjá mér í vikunni og önnur þeirra lagði sig undir því. Garnið kláraðist alveg, pokinn er tómur, en ég bætti aðeins við rauða litinn í kantinum til að klára.

 

Northeasterly afgangateppi

  

Ég er mikið fyrir að nýta vel afganga, og hef búið til fullt af teppum, bæði prjónuðum og saumuðum, bara úr afgöngum.

Uppskriftin að þessu fæst á Ravelry, og snilldin við hana er sú að renningarnir eru prjónaðir saman jafnóðum.

Ég notaði litla hnykla af ungbarnagarni sem höfðu safnast fyrir.  Litirnir þurfa að passa nokkkuð vel saman, það gekk ekki að hafa t.d. rautt með þessum litum.  Gæti trúað að sprengt garn  í ýmsum litum kæmi best út í þessari uppskrift.

Ég prjónaði þangað til litlu hnyklarnir voru búnir, og þetta varð svona þokkalegt dúkkuteppi.

Teppi úr léttlopaafgöngum

Alltaf safnast afgangar fyrir. Það eru tvö til þrjú ár síðan ég byrjaði á þessu teppi og ætlunin var að klára sem mest af léttlopanum.

Ég notaði dómínóprjón. Hef gert það áður til að nýta afganga.

Þegar teppið var búið átti ég enn afganga, og gerði þennan bleðil, hugsaði hann sem kisuteppi eða eitthvað svoleiðis.

Að lokum prjónaði ég bara allt sem eftir var í tvo bleðla í viðbót, kannski fyrir kisur líka.

Þetta er léttlopinn sem ég á núna. Þessar dokkur eru sérlitaðar, keyptar í Handprjónasambandinu, og tímdi ég ekki að setja þær í þetta.

Dúkkuteppi

Litlu stelpurnar mínar vantaði teppi fyrir dúkkurnar sem þær fengu í jólagjöf frá ömmu og afa.

Teppin heklaði ég úr afgöngum af bómullargarni, og hafði þetta munstur til hliðsjónar.