Viskastykki og fleira

 Alltaf sest ég við útsaumsvélina öðru hverju og oft verða viskastykki fyrir valinu. Það er mjög þægilegt að sauma í hvítt efni, en mér finnst líka gaman að sauma í köflótt og röndótt og að finna þá munstur og liti sem koma vel út í þeim.

Yngsta ömmustelpan, átta ára, teiknaði mynd þegar hún var í heimsókn og bað mig að búa til púða með myndinni. Það er svo gaman þegar þau biðja mig um svona greiða og ég geri það með gleði. Þetta er mjög auðvelt í framkvæmd í gegnum app í símanum frá Creativate. Maður tekur mynd og sendir í vélina sem saumar myndina. Hún valdi litinn.

Einhvern tíma saumaði ég þessa nálapúða í útsaumsvélinni og gaf elstu stelpunni þann græna í stíl við grænu Husqvarnavélina hennar. Ég hélt þeim bleika sem er í stíl við mína bleiku Husqvarna Epic vél. 

Allt í stíl.

Tvær ömmustelpnanna minna fengu sérherbergi fyrir síðustu jól. Þær fengu að velja sér liti á veggina sjálfar og fleira í herbergin.
 

Svo fannst þeim vanta púða í stíl við nýju litina og báðu ömmu sína að sauma fyrir þær púða sem þær teiknuðu sjálfar, eins og ég hef áður gert. Amman varð voða glöð yfir að vera beðin um þetta og hönnunarvinna systranna hófst um leið.

Aðalatriðið er að hafa teikninguna frekar einfalda með hreinar línur og engin aukastrik, allt sem sést á myndinni verður saumað. Ég fer svo sjálf ofan í blýantsstrikin með tússpenna.

Þær völdu sér efnin alveg sjálfar og líka hvar hvert efni átti að vera í hvorum púða. 

Þetta er sem sagt gert í appi frá MySewnet sem ég hleð niður í iPhone símann, vinn myndina aðeins í símanum, hreinsa aukastrik og svoleiðis, og sendi svo úr honum í útsaumsvélina, sem sér um restina.

Sumarpúði

Þegar ég keypti Husqvarna útsaumsvélina mína fylgdu með henni tveir efnisbútar og undirlag til að setja í útsaumsramma og sauma. Mig langaði alltaf að nota þá í eitthvað fallegt.

Svo var það þessi mynd….mér fannst hún alveg sérlega falleg, og þegar ég fór að tína til tvinna í hana til að vita hvort ég ætti eitthvað af litunum og hvað ég þyrfti þá að kaupa í viðbót, þá kom í ljós að ég átti hér um bil öll réttu litanúmerin í hana og þurfti engu að bæta við.

 Annar búturinn varð þá að þessum sumarlega púða sem prýðir nú sófa á heimilinu. Hann átti fyrst að fara á hjónarúmið en passaði svo vel þar sem ég fleygði honum niður til að taka mynd að hann hefur legið þar síðan.  Ég notaði stærsta rammann sem fylgdi vélinni, 36x20 rammann. Munstrið er í vélinni minni.

Krosssaumspúðar

Langamma tveggja barnabarnanna minna í móðurætt lést fyrir um tveimur og hálfu ári. Hún var mikil handavinnukona, og í vetur, þegar gamla heimilið var selt og geymslur tæmdar, kom í ljós ýmis efniviður tengdur handavinnu. Það sem nánustu aðstandendur gátu ekki nýtt sér var mér fært til að fara í gegnum og nota. 

 Þar fann ég meðal annars fallegan löber með þessum glaðlegu myndum á hvorum enda, fullsaumuðum, en ramminn í kringum dúkinn var ókláraður. Ég fékk þá hugmynd að gera úr löbernum púða handa krökkunum úr þessum myndum. Gula efnið í rammanum kom frá langömmunni líka. Ég hafði sitt hvort efnið í bakið svo þeir þekktust í sundur.

15 ára bloggafmæli

Um þessar mundir á handavinnubloggið mitt 15 ára afmæli. Af því tilefni ætla ég að bregða aðeins út af vananum og segja frá einhverju öðru en handavinnunni minni. Tvisvar hef ég sýnt úr saumaherberginu af svona tilefni, og væri alveg hægt að sýna ýmislegt nýtt og spennandi þaðan, en nú vil ég heldur monta mig af tveimur elstu ömmustelpunum, sem eru báðar 8 ára sonadætur mínar.

Önnur þeirra saumaði þessa mynd í skólanum síðasta vor, og finnst mér það vel af sér vikið hjá barni sem þá var í 2. bekk. Ég hef sjálf kennt börnum á þessum aldri að sauma krosssaum og veit að það vefst fyrir mörgum. Mig langaði svo að myndin hennar yrði að einhverju og bauð henni að sauma púða utan um hana, og valdi hún sjálf öll efnin og líka hvernig ég ætti að raða þeim upp. Hún var mjög ánægð með þetta og talaði sérstaklega um hvað það væri gaman að myndin væri orðin að einhverjum hlut.

Hún hefur líka hannað og sniðið Barbie föt hjá mér sem ég hjálpaði henni svo með.

Hin átta ára ömmustelpan mín er búin að læra að prjóna hjá mér, og er meira að segja örvhent, en ég kenndi henni þetta rétthent eftir að hafa ráðfært mig við hóp textílkennara á fb. Nú er hún að læra að hekla og fór heim um daginn með poka sem í voru garn og heklunál sem langamma hennar átti, hef ekki frétt af því meira.

Síðast þegar hún kom í pössun var hún ákveðin í að hún vildi fá að sauma á saumavélina, og sneið ég fyrir hana efni í hárteygjur sem hún saumaði svo sjálf.

Hún saumaði fjórar fyrir sig og systur sína, og hefði alveg getað haldið áfram hefði amman mátt vera að. En báðar fóru heim með heimasaumaðar teygjur í hárinu. Nú bíður hin átta ára daman eftir að fá að gera það sama. 

Hún sneri stykkinu sjálf við og lærði líka að fletja út sauminn með fingrunum (fannst það reyndar óþarfa pjatt), og ég hjálpaði henni að loka endunum.

Það verður spennandi að fylgjast með þeim báðum, og líka hinum tveimur sem eru sex ára stelpa og fjögurra ára strákur, sem eru ekki síður skapandi fólk. Sjálf var ég farin að prjóna og sauma á þessum aldri og á ennþá Barbieföt sem ég bjó til. Gaman að sjá barnabörnin fara í þessa átt😊
 

Haustlauf

Snemma í haust tók ég í þriðja sinn þátt í leyniverkefni hjá Kathleen Tracy, sem bæði heldur úti bloggsíðu og fb hóp, og er bútasaumshönnuður. Verkefnið hét Autumn Leaves. Einhverja fimm eða sex föstudaga fengum við fyrirmæli um hvað við ættum að gera næstu vikuna, en miðjan kom fyrst og svo bættist utan á teppið.

Ég gat auðvitað ekki hugsað mér annað en að sauma þetta með pappírssaum, auðvelt að teikna þessar blokkir í EQ8. Enda kom það í ljós að margar konur áttu í mestu erfiðleikum með ysta rammann, þar sem þarf að viðhafa mikla nákvæmni bæði við að klippa og sauma. Þetta var leikur einn með pappírssaum.

Ég hafði merkimiðann í haustlegum litum, og fann munstrin í forritinu mínu. Prófaði að sauma með sprengdum tvinna, kom vel út í svona smágerðum hlutum í munstrunum, ekki þar sem voru stærri fletir, prófaði það líka.

 Prentarinn stríddi mér aðeins þegar ég prentaði sniðin úr EQ8 forritinu. Þau voru ekki alveg í réttri stærð, aðeins of lítil. Komst ekki að því fyrr en ég var búin að sauma alla miðjubútana. Ég byrjaði þess vegna upp á nýtt þegar búið var að uppfæra prentarann, en notaði það sem ég hafði saumað í púða í stíl. Hvort tveggja prýðir nú forstofuna á heimilinu.

Fleiri litlir púðar

Ég saumaði nokkra litla púða fyrir nokkru og hafði í körfu fyrir barnabörnin með leikföngunum hér heima.  Þau hafa leikið sér ótrúlega mikið með þá, og ein ömmustelpan bað mig um að gera einn handa sér til að taka með heim. Þá saumaði ég auðvitað handa öllum og urðu þeir tveir á mann fyrir rest. Aðal málið hjá þeim var að fá að velja sér dýr og litinn á tvinnanum. Myndirnar eru ekki flóknar, en höfða greinilega til þeirra. Einfalt er stundum best.

Myndirnar eru úr Super designs í útsaumsforritinu mínu. 

 

Hreindýrapúði

Milli jóla og nýárs saumaði ég þennan púða. Hreindýramunstrið fékk ég í blogginu sem birtist í saumavélinni minni. Þetta er ætlað til að sauma í jólapeysu, dálítið grófgert og gisið, en mig langaði að prófa það, enda alltaf hrifin af krosssaumi. Ég minnkaði það samt töluvert.

Snúrukantinn í kringum púðann gerði ég úr venjulegu, tilbúnu skábandi sem ég átti, og notaði til þess bestu aðferðina sem ég kann, en hún er sú að renna því í gegnum overlockvélina með snúrunni sem liggur þá á hárréttum stað í snúrufætinum sem hægt er að kaupa á vélina. Hún fylgir nytjasaumspakkanum, og svo er líka til skrautsaumspakki. Þegar ég sauma svo púðann saman nota ég mjóa, langa rennilásafótinn á saumavélinni.

 

Fleiri litlir púðar

 Um daginn sýndi ég hérna púða sem varð til af sérstakri ástæðu, og lét ég hann í dúkkuvagninn á heimilinu. Fljótlega kom í ljós það sem ég bjóst við, að einn púði er ekki nóg fyrir þrjár stelpur og þrjár dúkkur, svo ég bætti þessum við og hafði þá í sama stíl.

Skæri og mús

Hér eru tvær litlar útsaumsmyndir sem mig langaði til af vissum ástæðum að yrðu að einhverju en ekki bara prufur ofan í skúffu. Skæramunstrið var nefnilega fyrsta útsaumsmunstrið sem ég prófaði að kaupa á netinu. Það var að vísu ókeypis, en mér tókst þetta. Síðan hef ég keypt eða hlaðið niður nokkrum í viðbót.

Þarna á skæramottan heima því mér finnst svo þægilegt að leggja skærin frá mér á sjálfa vélina, því harpan á Epic vélinni er svo stór. Ég set oft títuprjónasegulinn eða klemmuboxið þarna líka.

 Hitt munstrið sem mig langaði að búa eitthvað til úr var þessi mús. Sapphire 85 útsaumsvélin mín er nettengd og getur tekið við munstrum úr tölvunni gegnum netið. Þetta var fyrsta munstrið sem ég reyndi að senda úr tölvunni í vélina og það tókst í fyrstu tilraun!  Úr varð þessi dúkkupúði, set hann í dúkkuvagninn.

Púðar handa barnabörnunum

Fyrir 1-2 árum horfði ég á vídeo frá Stoff og Sy í Danmörku þar sem Lene sýndi hvernig hún gat tekið mynd af einfaldri teikningu á spjaldtölvuna sína í gegnum ákveðið app, sent saumavélinni myndina sem saumaði hana síðan í útsaumsramma. Vá, hvað mér fannst þetta geggjað. Þetta var hins vegar Epic útsaumsvél og ég vissi að ég var ekki á leiðinni þangað, tvær Epic vélar væru of mikið.

Ég var hætt að hugsa um þetta þegar kona, sem tók þátt í norsku saumakeppninni fyrir þremur árum og ég fylgi á Instagram, gerðist Husqvarna sendiboði í Noregi, eða ambassador eins og þeir kalla það. Hún var að nota Sapphire 85 útsaumsvélina og í einni færslunni sýndi hún hvernig hún teiknaði mynd, saumavélin saumaði myndina og úr varð prjónapoki. Það var sem sagt búið að setja þennan fídus í ódýrari vélarnar líka! Þessi staðreynd hjálpaði mér verulega við að taka ákvörðun um að kaupa þessa vél.

Ástæðan var fyrst og fremst sú að mig langaði að taka myndir teiknaðar af barnabörnunum og sauma þær. Um daginn voru Ylfa og Una í heimsókn, ég útskýrði fyrir þeim hvað mig langaði að gera og bað þær að teikna myndir. Ég átti mynd frá Auði sem ég notaði, vissi ekki hvenær ég myndi hitta hana næst, og Bjarki er bara tveggja ára og ekki farinn að teikna myndir handa ömmu sinni, svo ég saumaði handa honum mynd systur hans.

Appið heitir QuickDesign App og fæst það ókeypis í Appstore, fæst líka fyrir Android. Maður þarf að vera skráður inn í MySewnet til að geta notað það. Ég miklaði þetta aðeins fyrir mér, hélt að eitthvað myndi klikka, en það gerðist ekki. Tók mynd, vann hana aðeins í appinu og sendi á vélina og saumaði hana! Ekkert flókið. 

Og mikið var þetta gefandi verkefni fyrir mig og börnin, þau voru hissa og þótti vænt um að fá púðana. Ég sendi þeim líka vídeó af því þegar vélin var að sauma þeirra púða.

Ég er með ýmsar hugmyndir að fleiri verkefnum með þeim, ætla smám saman að safna myndum frá þeim sem henta í þetta.

 

Púði úr gömlum gallabuxum

Í gegnum tíðina hef ég hirt eitt og eitt par af gallabuxum til að sauma eitthvað úr því seinna.  Þessi púði varð til í vikunni. Hann á að fá það hlutverk að styðja við bakið á mér í löngum húsbílaferðum.

Ég ákvað að fegra hann aðeins með því að bródera smá í hann með útsaumsvélinni minni góðu (sem er svo skemmtilegt, ég stari hugfangin á hana á meðan hún vinnur).

Svo var ég löngu búin að ákveða að prófa að gera miðseymi líka (e. piping) því ég held að ég hafi bara aldrei á minni lífsfæddri saumaæfi gert svoleiðis, man alla vega ekki eftir því.

Ég lærði það á netinu um daginn að það er alveg hægt að líma litla búta á undirlagið í útsaumsrammanum í staðinn fyrir að spenna allt í hann. Gallaefni er þykkt og reynir kannski dálítið á rammann og svo var ég að sníða úr skálmum og erfitt að klippa stór stykki vegna saumfara. Þess vegna klippti ég alla bútana í rétta stærð fyrst og bróderaði á eftir. Ég er reyndar stórhrifin af þessum taulímpenna, nota hann mikið.

Og þetta virkaði bara mjög vel, efnið hreyfðist ekki, og límið þornar og losnar frá, og ég setti það bara á brúnirnar, alls ekki þar sem nálin fór í.

Það þarf bara að passa að finna miðjurnar á efnisbútnum og láta passa við miðjustrikin á rammanum.

Svo bjó ég til miðseymið sjálf með Amber 400 overlockvélinni minni. Það er hægt að gera svo margt fleira en að sauma saman með henni. Það er hægt að kaupa með henni tvenns konar pakka með aukafótum, annars vegar sett fyrir nytjasauma og hins vegar fyrir sauma til að skreyta með. Hérna notaði ég fót sem er ætlaður til að sauma fast miðseymi eða búa til miðseymisbönd.Hann hefur djúpa rauf á botninum sem myndar pláss fyrir snúruna þannig að raufin stýrir því sem fer í gegnum fótinn og nálin saumar fast upp við snúruna.

Þetta finnst mér bara tær snilld. Ég þarf ekkert að vera mjög nákvæm með að klippa efnið, hafði það ca. 2 tommur á breidd. Vélin sker þannig að eftir stendur alveg passlega breitt saumfar. Innan í notaði ég anorakksnúru.

Svo notaði ég rennilásfótinn til að sauma miðseymið á púðann. Ég notaði þrjár af fjórum vélunum mínum í þetta verkefni og skemmti mér vel.