Bambu Lab A1 mini og prentaraherbergið

Í næst síðustu færslu sagði ég frá því að synir mínir og þeirra fólk gáfu mér þrívíddarprentara í sjötugsafmælisgjöf. Prentarinn heitir Bambu Lab A1 mini, alveg frábær græja. Þegar ég hafði átt hann í tvo mánuði hafði ég prentað samtals í 155 klukkustundir, hvorki meira né minna!  Allt hefur tekist vel, engin vandræði, bara gleði.

 

Þegar ég fékk hann sá ég strax að prentarinn þurfti að fá að standa uppi við, ávallt reiðubúinn, og því lagði ég höfuðið í bleyti. Í húsinu okkar er lítil innigeymsla inn af holinu og var hún stöðugt að fyllast af dóti sem við þurftum ekki beinlínis að hafa við hendina. Þarna var líka töluvert af leikföngum sem barnabörnin voru hætt að nota. Við ákváðum því að endurskipuleggja hana, rifum allt út, máluðum (sem varð útundan þegar við fluttum hingað), eiginmaðurinn flotaði gólfið, setti vínilflísar og gólflista, svo nú átti ég glænýtt prentaraherbergi. Þetta flotta og stöðuga borð keyptum við í Ikea, alveg frábært fyrir prentarann.

Ég fækkaði hillum, tók samt þrjár hillur frá fyrir prentrúllur, samt nóg pláss fyrir allt sem þarf að vera þarna. Prentrúllurnar sem ég nota eru úr PLA plasti sem búið er til úr maíssterkju og getur brotnað hratt niður í náttúrunni. Ég er reglulegur gestur í 3D verk sem selur prentara og efni í þá og bæti smám saman í litasafnið. Allt sem ég hef prentað er fengið úr appi sem fylgir prentaranum og er sent í hann gegnum wifi. Svo fylgir líka forrit, Bambu studio, þar sem hægt er að vinna með og stilla ýmislegt. Það þriðja er aðgangur að Maker world þar sem er ógrynni af hlutum sem hægt er að prenta og opna í Bambu Studio, en ég nota appið mest, sem heitir Bambu Handy og ég er með í ipadinum. Þar fæ ég endalausar hugmyndir að verkfnum og safna þeim saman í möppu í appinu.

Ég prentaði svona statíf fyrir rúllurnar sem tengjast saman innbyrðis og get komið smtals 27 rúllum fyrir í þessum þremur hillum.

Þessa Mexíkómöndrur (Aaxolotl) gerði ég 14 stykki af, barnabörnin fengu eina hvert, restina gaf ég í verkefnið Jól í skókassa sem konurnar frá Úkraínu sjá um ásamt íslenskum konum. Þær gerði ég úr mjög skemmtilegu efni sem skiptir litum.

Það er alveg ógrynni af svona liðamótadýrum sem hægt er að prenta í 3D prentara og gaman að fygjast með hvernig hann gerir það.

Hér er sitt lítið af hverju: kettirnir eru með prjónaáferð, mjög flottir, þeir hafa allir eignast nýtt heimili. Sitjandi hjörtun eru ætluð litla fólkinu mínu og boxin líka.

Hvítu körfuna langaði mig til að prófa og hekludótið passaði vel í hana. Hjartaparið hef ég þar sem það á heima. Svo gerði ég fjórar svona langar Mexíkómöndrur því allir vildu fá eina.

Hér er ég að prenta lítinn vorkrans því það var nagli í vegg en ekkert á honum. Svo er ég endalaust hrifin af krönsum og er rétt að byrja.

Það væri hægt að hafa hann í vorlegri lit, en einhvern vegin finnst mér alltaf fallegt að hafa svart sem áherslulit á heimilinu. Allt verður fallegra ef svörtu er blandað inn á milli.

Hér eru nokkrar verur í prentun og myndin sýnir svolítið hvernig þetta verður til. Þær eru líka með liðamótum.

Svo er það Barbídótið.  Ömmustelpurnar leika sér ekki mikið með Barbí en ég var (og er) Barbístelpa og á nóg af dóti og þær taka oft allt fram þegar þær eru í heimsókn og raða öllu svo flott upp að ég tími varla að taka það saman á eftir. Þess vegna er gaman að bæta aðeins í smáhlutina fyrir þær. Þvottakörfur, náttborð, hundaskálar og prentari sem var prentaður svona í einu lagi með opnanlegu loki og lausum blaðabakka. Ótrúlegt. Maðurinn minn skar svo út blöð sem pössuðu. Hann sér líka um að líma augu í smádýrin og fleira, þetta er svona fjölskyldusamvinna. Á kassnum sem prentarinn kom í var límdur borði frá 3D verk þar sem á stóð: Varúð, 3D prentun er ávanabindandi. Það er alveg gild aðvörun.

Hér er svo að lokum mynd af nýja herberginu, litlu kompunni, sem er ekki nema 3,5 fermetrar og í hinum endanum er hún áfram geymsla, reyndar að miklu leyti fyrir mitt dót, eins konar framlenging af saumaherberginu, eitthvað af leikföngum og svo því sem tilheyrir heimilinu. Gott skipulag er aðalatriði, og svo er auðvitað háaloft og bílskúr líka. En ég er ekkert á leiðinni þangað😉

Kusk 2

 Önnur Kusk peysa datt af prjónunum hjá mér. Garnið keypti ég á Garngleðinni. 

 Garngleðin er haldin í Haukahúsinu í Hafnarfirði fyrstu helgina í mars og er í göngufæri frá heimili mínu sem mér finnst alveg frábært. 

Ljósa garnið er frá Dóttur Dyeworks og það gráa frá Hex Hex. Svo setti ég bleikan afgang í stroff á hálsmáli og ermum. Ég prjónaði þessa með sömu breytingum og ég gerði á uppskriftinni á fyrri Kuskpeysunni. Ermarnar hafði ég líka í 3/4 sídd.

Uppskriftin er frá Eddu Lilju.

Þrívíddarprentun

Ég átti stórafmæli í byrjun mars. Synir mínir og þeirra fólk komu mér algjörlega á óvart og færðu sjötugri móður sinni þrívíddarprentara í afmælisgjöf. Það datt næstum af mér andlitið og ég vissi ekki alveg hvernig ég átti að taka þessu. Annar þeirra notar þrívíddarprentara í kennslu og ég vissi að hann var að gera margt sniðugt og ég hef örugglega einhvern tíma sagt í hálfkæringi að svona þyrftum við að eignast einhvern tíma. Ég hélt upp á afmælið 21. mars og hafði mig ekki í að opna kassann fyrr en daginn eftir. En það er skemmst frá því að segja að eftir að ég prentaði hvíta bátinn, sem er eins konar prufustykki fyrir prentara almennt til að bera saman gæði, þá hef ég ekki stoppað. Ég hef prentað alla daga síðan þá nema tvo. Þá daga var ég að búa mér til lítið prentunarherbergi í innigeymslu í húsinu, bar allt út úr því, raðaði svo því sem mátti fara inn aftur, sneri öllu við og setti inn flott vinnuborð fyrir prentarann. Svo verður málað og dúklagt. Ég byrjaði svo til gamans á Barbíhúsgögnum sem komu mjög vel út.

Páskarnir voru á næsta leiti svo ég vatt mér í páskaskrautið. Ég þurfti að kaupa mér töluvert af litarúllum en fékk líka nokkrar að gjöf með prentaranum. Gula skrautið er hvort í sínum eldhúsglugganum.

Smá skraut var hengt upp í glugganum í prentaraherberginu. Ætlaði fyrst að nota glæran tvinna til að hengja upp með en það fór allt í óleysanlega flækju svo ég greip gamalt sláturgarn og setti upp með því, finn kannski eitthvað annað seinna.

Nú á ég tvo ketti og eiginmaðurinn geymslu fyrir batterí. Ég gerði tvö svona kattarandlit í viðbót fyrir tvær ömmustelpur sem langaði svo í þau.

Ég er alltaf veik fyrir svona álfum og þessir prýða eldhúsgluggana tilbúnir í vorverkin. Svo er bara svo margt skemmtilegt sem hægt er að gera eins og þessa litlu “hjartavini” og box fyrir þá eða eitthvað annað, endalausir möguleikar.

Ég mun segja meira frá prentaranum og sýna myndir af honum þegar við erum búin að koma litla prentaraherberginu í betra horf, mála og þess háttar.

Það er orðið þannig hjá mér núna að í staðinn fyrir að spá í hvað ég eigi að hafa í kvöldmatinn þá spyr ég sjálfa mig: Hvað ætti ég að prenta í dag?
 

Gleðilega páska💛

Ég saumaði páskalegar myndir í viskastykki í fyrradag og nú punta þau eldhúsið okkar. 

Munstrin eru frá Embroidery Library.

 

Viskastykki og fleira

 Alltaf sest ég við útsaumsvélina öðru hverju og oft verða viskastykki fyrir valinu. Það er mjög þægilegt að sauma í hvítt efni, en mér finnst líka gaman að sauma í köflótt og röndótt og að finna þá munstur og liti sem koma vel út í þeim.

Yngsta ömmustelpan, átta ára, teiknaði mynd þegar hún var í heimsókn og bað mig að búa til púða með myndinni. Það er svo gaman þegar þau biðja mig um svona greiða og ég geri það með gleði. Þetta er mjög auðvelt í framkvæmd í gegnum app í símanum frá Creativate. Maður tekur mynd og sendir í vélina sem saumar myndina. Hún valdi litinn.

Einhvern tíma saumaði ég þessa nálapúða í útsaumsvélinni og gaf elstu stelpunni þann græna í stíl við grænu Husqvarnavélina hennar. Ég hélt þeim bleika sem er í stíl við mína bleiku Husqvarna Epic vél. 

Allt í stíl.

Kisuteppi

 Fyrir nokkrum árum saumaði ég veggteppi til að hafa fyrir ofan eldhúsborðið. Var það fyrst og fremst gert til að skemmta barnabörnunum. Það hefur verið fastur liður að ákveða hvaða kokkur hver og einn ætlar að vera í hvert skipti.

Nú var alveg kominn tími til að breyta aðeins til og fann ég þessar myndir hjá Embroidery Library. Þær eru sjö talsins því upphaflega er gert ráð fyrir því að sauma þau í viskastykki ásamt nafni vikudagsins. Ég varð því að nota tvær myndir tvisvar og sneri þeim bara svo þær yrðu ekki alveg eins. Krakkarnir hafa ekki séð teppið tilbúið ennþá en sáu það í vinnslu og sendu frá sér eitt samhljóða og langdregið “noooooooo”, enda öll frá kattaheimilum.

Kusk

Mig langaði alltaf að prjóna peysuna Kusk, bæði vegna sniðsins og eins til að nota þessar stöku hespur mínar í eitthvað annað en sjöl. Ég átti tvær hespur sem voru mjög líkar og þær mynda dökku, breiðari rendurnar. Þær voru hvor frá sínum litaranum, en samt meira ljóst í annarri, og svo bleika. Hún kláraðist næstum alveg, ég var komin með plan B ef hún skyldi ekki duga, en það slapp.

 

Fyrst prjónaði ég peysuna alveg eftir uppskriftinni, með uppgefinni prjónastærð sem eru númer 4 fyrir meðal prjónafestu nema ég jók út með reglulegu millibili í hliðunum á bolnum, því það fer betur mínum vexti. Við mátun fannst mér berustykkið alltof stórt og hálsmálið of vítt og ná of langt niður á bak. Þá varð ég fegin að hafa ekki klippt þræðina á milli litaskipta eins og ráðlagt er í uppskriftinni því ég rakti hana alla upp. Fitjaði aftur upp á hálsmálinu á prjóna nr. 3 í stað 3,5, og prjónaði fast. Svo gerði ég upphækkun að aftan og prjónaði svo berustykkið á prjóna 3,5 vel niður fyrir síðustu útaukningarumferð. Eftir það notaði ég prjóna nr. 4 og smellpassar peysan núna. Á myndinni hér að ofan sést upphækkunin. Hálsmálið varð miklu meira að mínu skapi svona þrengra og með upphækkun. Ermarnar hafði ég í 3/4 sídd.

Uppskriftin er frá Eddu Lilju Guðmundsdóttur.

Þvottastykki

Ég saumaði að gamni mínu í nokkur þvottastykki og gaf barnabörnunum, tvö hverju. Passaði bara að ekki færu tvö eins á hvort heimili. Gott að þekkja sundur hver á hvað. 

Þessar myndir eru í lítilli Brother saumavél sem ég á og er hún líka er útsaumsvél. Ég hef hana handa krökkunum til að sauma á ef þau langar til. Brother hefur einkarétt á Disneymyndum til útsaums og því freistaði það að hafa þær í aukavél sem ég þarf að hafa í saumaherberginu. Þvottastykkin keypti ég í Ikea.

Nálarþæfing

Í haust bað önnur tíu ára ömmustelpan mig að kenna sér að þæfa. Hana langaði svo til að geta búið til alls konar dýr og verur, og okkur kom saman um að þæfing væri góð aðferð. Sjálf hafði ég aðeins prufað að þæfa og voru það kúlur í hálsmen en þá var ekki notuð nál.

Ég kíkti því aðeins á youtube og fór svo í Liti og föndur og keypti þæfingarnál og ullarkembu í ýmsum litum og svo átti afinn stíft plast til að hlífa borðinu. Ég sýndi henni aðeins aðferðina og svo tók hún við og skildi eins og skot út á hvað þetta gekk og byrjaði á að þæfa kött (en ekki hvað) og notaði nokkra liti. Hún er mjög flink og skapandi og notar netið til að læra hvernig á að gera allt mögulegt.

Hér er kötturinn kominn og auðvitað þurfti að hann að fá félagsskap og þess vegna var búin til mús.

Svo hélt framleiðslan áfram þegar hún var komin heim.