Haust og hrekkjavaka 🕷️🕸️👻🎃 í 3D

 

Þrívíddarprentarinn stoppar ekki. Nú er það haustið og hrekkjavakan sem gefa tilefni til að búa til eitthvað skemmtilegt. Hér að ofan er haustlegt gluggaskraut sem prýðir eldhúsgluggana. Ég skipti út nokkrum sinnum á ári í þessum gluggum, bæði eftir árstíðum og hátíðum.
 

Graskerin á efri myndunum eru svo skemmtileg því þau eru tvískipt og lokast í spíral þannig að það er hægt að færa miðjustykkið á milli og fá alls konar samsetningar.

Kettirnir eru svo vígalegir og skemmtilegir ofan á hurðakörmunum að ég held ég leyfi þeim að vera aðeins áfram.

Svo eru hérna tvær gerðir af fiktidóti handa barnabörnunum. Mjög vel hannað og hægt að snúa hverjum hluta í allar áttir, hvolfa og setja í hvaða stöðu sem er. 

Vélútsaumur

Það er alltaf gaman að setjast við útsaumsvélina og sauma út í handklæði og viskastykki. Ég á mörg góð viskastykki sem er upplagt að sauma í og mér finnst skemmtilegast að prófa mig áfram með munstur í marglit eða röndótt og köflótt viskastykki. Hér sést munstrið ekki mikið en samt nóg.

 

Þegar ég saumaði í þetta hér að ofan vandaði ég mig sérstaklega við að setja í rammann svo munstrið kæmi í miðjuna á röndinni, en svo kom það svona skakkt út. Ég skildi ekkert í þessu og rannsakaði málið og kom þá í ljós að það er ekki miðjusett í útsaumsskránni sem ég keypti. Ég hef ekki lent í þessu áður og er búin að kaupa nýtt stykki því ég ætla að þrjóskast við að fá þetta rétt. Ætla samt alveg að nota þetta í eldhúsinu heima hjá mér.

Ég hef ekki prófað svona munstur áður. Þetta er svokallað “embossed” munstur þar sem myndin kemur í ljós þar sem ekki er saumað. Mikið notað í handklæði.

Vorflétta tvö

 Í fyrra prjónaði ég sjaltrefil eftir uppskrift sem heitir Vorflétta og er eftir Auði Björt. Ég notaði hann svo til látlaust síðasta vetur svo ég prjónaði annan til að eiga til skiptanna. Uppskriftin gerir ráð fyrir að ekki þurfi meira garn en eina 400 metra og 100 gramma hespu, og það gekk upp og vel það. Ég notaði 4 mm prjóna og handlitað garn úr litla lagernum mínum og man ekkert hvaðan það kom.  Það skemmtilega við uppskriftina er að sjaltrefillinn er eins á réttunni og röngunni.

Skólavettlingar, framhald

 Í síðustu færslu skrifaði ég um vettlinga sem ég prjónaði á barnabörnin fjögur. Þegar þau fengu þá afhenta kom í ljós að þeir sem ég prjónaði á strákinn, sem er nýlega orðinn 7 ára, voru of litlir, aðallega of stuttir. Fyrst ætlaði ég bara að lengja þá, en hætti við það og prjónaði tvö ný pör á hann. Ég bætti við 2 lykkjum á víddina (var með miðstærð á hann af Randalíusi) lengdi þumalinn og hafði lengdina á vettlingnum öllum næstum eins og á stærstu stærðinni. Þeir smellpössuðu á hann og hefðu alls ekki mátt vera minni. Hann er greinilega með lengri hendur en ég áttaði mig á.

Svo færði ég merkin af minni vettlingunum yfir á þá nýju. Þeir minni koma í góðar þarfir annars staðar.

Annað sem ég breytti núna í uppskriftinni eftir að hafa mátað á eina af stelpunum á meðan ég var að prjóna, var að taka örar úr í lokin. Í uppskriftinni segir að alltaf eigi að prjóna eina umferð á milli úrtökuumferða, en ég gerði það núna eftir þrjár fyrstu úrtökurnar en tók síðan úr í hverri umferð. Hún vildi ekki hafa svona mikla totu fremst á vettlingnum, og ég var alveg sammála henni, þetta er miklu betra svona.

Skólavettlingar

Ég prjóna alltaf nýja vettlinga handa barnabörnunum á haustin. Tvö pör á hvert. Átta pör samtals.

 

Ég hef notað sömu uppskriftina undanfarið, Randalíus, sem er frí á heimasíðu Storksins. Hún er mjög fín, og það besta er að þumallinn kemur út úr hliðinni þannig að það er sama á hvora hendina vettlingurinn fer.  Svo er það gríðarlegur kostur að þumallinn er kláraður áður en belgurinn er prjónaður áfram niður.

Svo merki ég hvern einasta vettling, hef alltaf gert það og lítið sem ekkert hefur týnst.

Ég prjóna alltaf núna úr Fiesta frá Drops, mikið af mislitu og sprengdu garni sem gaman er að prófa. Dokkurnar nýtast líka mjög vel, ein dokka er nóg í eitt par, og lítill afgangur.

Hulltights og Minsten jakke

Litla daman sem fæddist í lok júlí var skírð í byrjun september. 

Ég prjónaði þessi föt handa henni í skírnargjöf.

Buxurnar eru eftir uppskrift sem heitir Hulltights og er í bókinni Klompelompe, strikk til hele familien.

Uppskriftin af peysunni er í sömu bók og heitir hún Minsten jakke. Hef ég prjónað nokkrar svona. Bæði buxurnar og peysan eru í stærð 6-12 mánaða.

Garnið er Drops baby merino.

Svo þrívíddarprentaði ég auðvitað pakkaskrautið. Ég hef reyndar prentað fleiri pakkaskreytingar en ég gleymi oft að taka myndir af því sem ég geri í prentaranum.

Fleiri vinkonupeysur

Ég sýndi hérna peysu aðeins neðar á síðunni sem heitir Vinkonupeysan. Hún fer það vel á mér að ég gerði aðra í gráu, en ákvað að bleyta hana og leggja til svona eins og maður gerir við prjónaðar og heklaðar flíkur. Ég þvoði hana í köldu vatni í vaskafati og vatt á vægri stillingu í þvottaneti í vél. Og viti menn, hún hljóp svo illa að ellefu ára sonardóttir mín fór heim í henni, ég komst ekki einu sinni í hana. En hún var fín á henni. En svo er ég auðvitað vinkona þessarar ömmustelpu eins og allra hinna barnabarnanna þannig að peysan fór á réttan stað.

Ég átti peysu uppi í skáp sem ég hafði lengi ætlað að rekja upp því ég notaði hana ekkert, og það gerði ég. Ég hafði ekki einu sinni fyrir því að bleyta garnið til að slétta það heldur heklaði aðra peysu úr því eins og það var. Þetta garn má þvo í vél, ég hef notað það í barnaföt með góðum árangri. Hún er hér að ofan. Garnið í henni er Drops cotton merino, heklunálin no. 6 og ég saumaði hana saman, var að bilast á að hekla stykkin saman eins og gert er ráð fyrir í uppskriftinni.

Svona leit upprakið út…..

Heimferðarsett

 Þetta heimferðarsett  prjónaði ég handa lítilli vinkonu sem fæddist í lok júlí. Móðirin valdi litina og líka uppskriftirnar, sem voru að mestu þær sömu og ég prjónaði á eldri bróður hennar fyrir nokkrum árum.

Uppskriftirnar eru að mestu leyti úr hefti Prjónajónu með heimferðarsettum sem hún gaf út fyrir nokkrum árum. Bleika húfan er þó úr heftinu Babystrik på pinde 3, 1. hefti, eftir Lene Holme Samsøe.

 

Dekkri liturinn er ekki eins grár og hann virðist á sumum myndanna heldur meira út í grænt.  Garnið er Drops Baby Merino, sem ég elska að prjóna úr.

Svo lét ég fylgja með lestarsokka í öðrum lit. Uppskriftina má finna á netinu með einfaldri leit.

Þrívíddarprentað fyrir handavinnuna

Mjög fljótlega eftir að ég fékk þrívíddarprentarann fann ég þessar körfur í gagnasafninu sem fylgir prentanum og gerði fyrst þessa bleiku. Hún er svo frábær í alla staði að ég fór með mína gömlu keramikskál beint á nytjamarkað. Ég bjó svo til aðra minni til að geta geymt hana ofan í hinni, en ég þarf oft að vera með tvær í gangi.

 

Prjónamerki, bæði opin og lokuð, hef notað þau mikið. Þau sem ég gerði sjálf eru fínlegri en þessi gömlu.

Í fyrradag prentaði ég box þar sem ég geymi eingöngu prjónamerki, en þau voru innan um nálar, skæri og margt annað í ágætri dós, en það er betra að hafa þau sér.

Dúllustrekkjara af alls konar gerðum og stærðum er hægt að prenta eftir þörfum og smekk, og hvítu körfuna, sem er með svokölluðu býkúpumynstri, get ég notað undir allt mögulegt.

Svona körfubotnar eru til með alls konar lögun og af ýmsum stærðum. Mig langaði til að prófa að hekla í svona og notaði fjórfalt bómullargarn, alls konar afganga og skipti bara um lit þegar einhver kláraðist. Nóg eftir samt.

Svo er það þessi snilld. Ég á slatta af rennilásum í metratali og þetta eru rúllur til að geyma þá á. Það er svo miklu auðveldara að hafa yfirlit yfir þá á svona rúllum í plastboxinu þar sem þeir eru geymdir heldur en í pokum á sama stað.

Sleðarnir eru svo geymdir í miðjunni og lokað fyrir, ekkert ruglast saman. Allt á sínum stað.

Og ég hafði allt í mismunandi litum bara af því að það er skemmtilegra fyrir augað.

Ég var búin að kaupa einhverja græju úr málmi til að festa á borð til að auðveldara væri að setja sleðann á rennilásinn en hef ekki einu sinni prófað hana. Sá að ég gat prentað þessa og það var ekki spurning um að gera það frekar.  Svínvirkar.