Sitt lítið af hverju

Mig hefur lengi langað til að styrkja verkefnið Jól í skókassa en ekki fundið mig í því að tína til allt sem til þarf og passa nú vel upp á að ekkert vanti í kassann og yfirleitt að taka ákvarðanir um hvað eigi að velja. Ég veit af starfi meðal flóttakvenna frá Úkraínu sem hafa það sem verkefni allt árið að útbúa jólagjafir í skókassa handa börnum í heimalandi sínu sem eiga um sárt að binda. Starfið er í umsjón öflugra, íslenskra sjálfboðaliða þar sem ein er fremst í flokki.

 

Ég finn mig frekar í að aðstoða þær við að búa til hluti sem hægt er að láta í kassana og þangað fór allt það sem er á þessum myndum. Þvottastykkin eru úr Ikea og saumað í þau í Brother Disney vélinni minni. Ég spretti efstu brúninni upp og fjarlægi stóra miða sem eru á þeim og færi til hankana ef þeir eru ekki almennilega miðjusettir, og sauma svo brúnina niður aftur. Hundarnir eru prentaðir í Bambu Lab þrívíddarprentaranum. Vettlingarnir eru prjónaðir úr Drops Fiesta og eftir vettlingauppskriftinni einu sem ég nota, Randalíus, sem er frí á heimasíðu Storksins.

Haustverkin

Hjá mér eru haustverkin ekki sláturgerð eins og áður eða berjatínsla, heldur vettlingaprjón á barnabörnin.

 

Að þessu sinni notaðist ég næstum eingöngu við afganga frá vettlingaprjóni undanfarinna missera. Það urðu margar rendur og litaskipti og þar af leiðandi margir endar að ganga frá. En það er ekki leiðinleg vinna, bara handavinna eins og annað.

Ég safna afgöngum af sama grófleika saman í poka, og blanda ekki neinu sem þófnar saman við. Þetta urðu 9 pör, tvö fyrir hverja stelpu og þrjú fyrir strákinn. Prjónaði 5-7 ára stærð á strákinn en 8-10 ára stærð á stelpurnar þrjár. Svo var allt merkt inni í stroffinu eins og ég geri alltaf.

Ég fór eftir uppskriftinni Randalíus eins og ég hef gert undanfarið, kann hana utanað, og er hún frí á heimasíðu Storksins.

Vettlingar

 Einhvern tíma á útmánuðum prjónaði ég vettlinga á barnabörnin fjögur. Ég sá nýtt garn frá Drops í Gallery Spuna og langaði að prufa það. Finnst það koma skemmtilega út í svona vettlingum. Ég notaði uppskriftina góðu sem er frí á heimasíðu Storksins, Randalíus. Garnið heitir Fiesta.

Vettlingar og sokkar

Fyrir utan kragann sem 5 ára leikskólastrákinn minn vantaði og ég sýndi í síðustu færslu, þurfti hann líka sokka og vettlinga. Amman hefur greinilega sofið á verðinum í prjónaskapnum og því var ekki um annað að ræða en að sitja dálítið við og prjóna. Vettlingarnir eru eftir uppskrift frá Storkinum sem heitir Randalíus og er frí á heimasíðu hans. Garnið er Drops merino extra fine.
 

Sokkarnir eru prjónaðir úr Fabel frá Drops eftir uppskriftinni Pitter Patter frá garnstudio.com.  Ég hef oft prjónað þessa uppskrift áður og hef sokkabolinn aðeins víðari en uppskriftin segir.

Allt sem ég prjóna á barnabörnin merki ég eins og hér að ofan, enda týnist fátt ef nokkuð.

Tvær Erlur

Seint í sumar prjónaði ég tvö pör af vettlingunum eftir uppskriftinni “Erla” í bókinni Íslenskir vettlingar.

Ég hugsa að pörin af Erlu sem ég hef gert séu að verða hátt á annan tuginn. Flest þeirra hef ég prjónað úr Flora frá Drops, en eitthvað úr sokkagarni frá Vatnsnesi. 

Í þessa notaði ég Flora og prjóna nr. 2.

 

Vettlingar fyrir veturinn

Haustið nálgast og kominn tími til að prjóna skólavettlinga á barnabörnin fjögur. Ég hef undanfarið prjónað eftir uppskrift úr Leikskólafötum, en sú uppskrift nær aðeins upp í sex ára aldur. Börnin eru á aldrinum 5-9 ára og þurfti ég að finna aðra uppskrift. Hana fann ég á síðu Storksins. Hún er frí og heitir Randalíus. Mjög góð að fara eftir og rétt í stærðum.

Í vettlingana hér að ofan notaði ég Smart garn úr Rúmfatalagernum, endurnýjaði kynni mín við það, hef ekki prjónað úr því síðan synir mínir voru litlir fyrir nokkrum áratugum. Garnið í ljósu vettlingana er Merino Blend DK, keypt á sama stað. Prjónarnir voru nr. 4. Að sjálfsögðu saumaði ég merkimiða inn í hvern einasta vettling.

 

Erlur

Ég datt aftur í vettlingaprjón og prjónaði tvö pör af Erlu úr bókinni Íslenskir vettlingar. Þetta er eina vettlingauppskriftin sem ég nenni að prjóna, alla vega um stundarsakir. Uppskriftin er vel gerð og vettlingarnir fara svo vel á hendi. Ég er með nokkur pör í gangi núna í ýmsum litum og þeir halda ágætlega hita á höndum í kuldanum.

 Garnið er eins og oftast áður Flóra frá Drops og prjónastærðin er 2,0.

Vettlingar fyrir veturinn

Um miðjan maí vantaði mig eitthvað að prjóna, og ákvað að kaupa garn í vettlinga á barnabörnin fjögur, sem eru 4, 6 og tvær 8 ára, og dúlla mér við að prjóna þá í sumar. Verkefnið entist þó ekki nema til maíloka.

Mér fannst sniðugt að prjóna tvö pör á hvert en hafa þau þannig að allir fjórir vettlingarnir gætu gengið hver með öðrum. Heppilegt ef einn eða tveir týnast (sem gerist reyndar nánast aldrei hjá þeim).

Þótt ég hafi lokið prjónaskapnum í vor er ég samt tiltölulega nýbúin að ganga frá þeim og afhenda þá, því ég þurfti að anda aðeins djúpt áður en ég settist niður og handskrifaði á 16 taumiða nöfnin þeirra og saumaði inn í hvern vettling (reyndar voru þeir 24 því ég merkti líka prjónaða sokka á þau öll sem ég á eftir að sýna hér). 

 Ég prjónaði úr Drops Big Delight Print, sem ég var svo heppin að ná í, því það er hætt í framleiðslu. Ég fékk rauða garnið í Gallery Spuna, en það bláa í Skartsmiðjunni.

Uppskriftin er úr Leikskólafötum, aðeins aðlöguð að mér, og snilldin er sú að vettlingurinn passar á hvort sem er hægri eða vinstri hendi, allir eins. Notaði prjóna nr. 3,5 og 4

Vettlingar

Þessa vettlinga prjónaði ég einhvern tíma á þessu og síðasta ári, en setti þá aldrei hér inn. En af því að þetta er handavinnudagbókin mín og hér set ég inn allt það helsta sem ég geri, þá ætla ég að ljúka árinu með því að hreinsa upp það sem eftir var að láta hér á bloggið.

Vettlingarnir hér að ofan eru prjónaðir eftir uppskriftinni Erla sem eru í bókinni Íslenskir vettlingar. Garnið er Merino fingering frá Vatnsnesyarn og liturinn var jólaliturinn í fyrra, minnir mig, og heitir Bjart yfir jólum. Að sjálfsögðu voru þeir notaðir mikið nú í desember.

Svo prjónaði ég þessa herravettlinga úr kambgarni eftir lettnesku munstri sem Ístex gaf út í litlu hefti.

Að lokum eru enn aðrir eftir Erlu uppskriftinni, prjónaðir úr Flóru frá Drops.

Öll vettlingapörin eru prjónuð á prjóna nr. 2. 

Fleiri Trítlar

Ég tók fram pokann með Drops merino extra fine afgöngunum og prjónaði fleiri vettlinga á barnabörnin mín fjögur. Tvö stærstu pörin prjónaði ég á prjóna nr. 3,5 og 4, og stærstu uppskriftina á sex ára, en í miðjuparið, fyrir fjögurra ára, hafði ég prjónana nr. 3 og 3,5, en notaði lykkjufjöldann úr stærstu uppskriftinni, hafði þá bara aðeins styttri. Minnstu eru svo á tveggja ára, notaði uppskrift fyrir 3-4 ára hvað varðaði lykkjufjöldann, en hafði líka minni prjóna, nr. 3 og 3,5. Allt passaði vel á alla. Mér finnst mesta áskorunin í vettlingaprjóni að hafa vettlinga alls ekki of stóra, ekki sniðugt að prjóna þá “aðeins við vöxt”. Þeir verða að passa strax. 

 Hver einasti vettlingur merktur, eins og venjulega. Uppskriftin er úr Bókinni Leikskólafötum, mín uppáhalds.

Vorlilja og Erla

Endurnýjaði kynni mín við Vorlilju og prjónaði þessa handa annarri tengdadótturinni í jólagjöf. Alltaf gaman að prjóna þessa uppskrift. Hún valdi sjálf litina, enda fara þeir henni mjög vel.

Garnið, sem er frá Rohrspatz & Wollmeise, kemur í 150 gr. hespum og þess vegna gat ég prjónað eitt par af Erlu í stíl, en það mátti ekki tæpara standa, tveir örlitlir hnyklar afgangs. Litirnir heita Krafla (sá dekkri) og Total edel (sá ljósari). Keypti garnið í Handprjóni og prjónastærðin var 3,5.

 

Trítill

 Í desember prjónaði ég vettlinga á litla flokkinn minn. Þau eru tveggja, fjögurra og tvær sex ára. Uppskriftin er Trítill úr leikskólafötum, sem mér finnst besta vettlingauppskriftin fyrir börn. Bæði passar hún vel og svo er sama á hvora hendina vettlingurinn fer, hann passar á báðar. Garnið heitir Hot Socks Lazise frá Gründl, keypt í Rokku, og prjónarnir nr. 3 og 3,5. 

Erla - Íslenskir vettlingar

Vettlingarnir Erla úr Íslenskum vettlingum hafa verið sjónvarpsprjónið mitt undanfarnar vikur. Mér finnst ennþá gaman að prjóna þá og kann uppskriftina nokkurn vegin utanað núna. Allir eru þeir prjónaðir úr Flóru frá Drops á prjóna no. 2, og nota ég alltaf Addi trio prjónana mína.

 

Íslenskir vettlingar - Erla og Rúna

Ég datt í vettlingaprjón snemma í sumar. Mér finnst alltaf frekar krefjandi að prjóna vettlinga, sérstaklega tvíbandavettlinga, og líka að láta þá passa á eigandann. 

En þegar ég var búin með eitt par af vettlingunum Erlu úr bókinni Íslenskir vettlingar, þá langaði mig strax að prjóna annað par og svo það þriðja. Og þeir passa mjög vel á mína hendi og annarrar sem fékk þá grænu. Það er líka prjónuð útaukning, eða kíll, fyrir þumalinn, og það finnast mér bestu vettlingarnir.

Þessir hvítu, sem heita Rúna, eru úr sömu bók, en ég er ekki eins hrifin af sniðinu á þeim. Það var reyndar mjög skemmtilegt að prjóna þá, munstrið lærðist strax, en þeir eru of langir. Úrtakan á belgnum er mjög aflíðandi og löng, og erfitt að stytta hana. Ég prófaði að byrja fyrr á henni en þá urðu þeir of fljótt þröngir. En ég get alveg notað þá, bara smámunasemi hjá mér.

 Ég notaði Drops Flora frá Gallery Spuna í öll pörin, og Addi trio prjóna nr. 2, og gerði alltaf báða vettlingana samhliða, vatt bara garnið í tvo hnykla áður. Verð að hrósa bókarhöfundi fyrir afskaplega vandaða útfærslu á uppskriftum.

Barnavettlingar

 Mér hættir til að gleyma að setja barnavettlinga hér á bloggið, sennilega af því að þetta er svo hversdagslegt og lítið verkefni. Ég á myndir af sokkum og vettlingum á barnabörnin sem aldrei hafa ratað hér inn, og þessum var ég næstum búin að gleyma. 

Við vorum að úti með ömmu- og afastrákinn og systur hans snemma í vor og þá sá ég að vettlingar sem ég hafði prjónað á hann eftir íslenskri uppskrift keyptri á netinu pössuðu engan veginn á hann, of víðir og hann tolldi ekki í þumlinum. Ég átti svo sem að geta sagt mér þetta sjálf þegar ég prjónaði þá. Ég greip því prjónana og notaði uppskrift frá Drops sem ég hafði áður aðlagað að yngstu ömmu- og afastelpunni og skrifað hjá mér allar breytingar. Passaði bara að hafa þá nógu litla og þennan þumal sem kemur út á hlið. Þannig þumlar eru bestir. Ég hef líka notað mjög góða uppskrift úr bókinni Leikskólaföt. Og viti menn, þessir vettlingar smellpössuðu á litla manninn. Þeir eru prjónaðir úr Drops Karisma.

Mér finnst yfirleitt erfiðast af öllu að prjóna vettlinga, ekki af því að prjónaskapurinn sé svo erfiður, heldur verða þeir að passa vel þeim sem á að nota þá, hvorki of víðir né þröngir, og mátulega langir.

Vettlingar

Eftir áramót prjónaði ég tvö pör af vettlingum. Herravettlingarnir eru eftir uppskrift úr litlu hefti sem Ístex gaf út þar sem lettnesk prjónamunstur eru aðlöguð að íslenska kambgarninu. Að sjálfsögðu notaði ég kambgarn og prjóna nr. 2 og prjónaði stærð L. Mér fundust þeir ætla að verða heldur langir svo ég stytti þá um hálft munstur eða sex umferðir og þurfti þá að teikna munstrið fremst á þeim aftur upp með nýrri úrtöku. En þeir smellpössuðu líka á eigandann.

Dömuvettlingarnir eru hins vegar upp úr nýju vettlingaprjónabókinni, Íslenskir vettlingar, sem kom út fyrir jólin og heitir uppskriftin Salka. Í þá notaði ég Drops Flora. Eigandinn er frekar handsmár svo ég notaði prjóna nr. 2,25, en þeir urðu heldur þröngir yfir hendina á móts við þumalinn, en passlega langir. Það er líka alltaf hættan þegar þumallinn er settur í án þess að aukið sé út við hann, þ.e. prjónaður kíll. Ég ætla að hafa það í huga í framtíðinni.

 

Alma, Víðir og Þórólfur

Þær hjá Prjónakistunni hafa boðið upp á samprjón á fb frá því snemma á tímum samkomubannsins.

Þær voru svo rausnarlegar að gefa uppskriftir, og eru enn að.

Þetta er það sem ég gerði í samprjóninu.

Þær nefna uppskriftirnar eftir þríeykinu okkar.

Fyrsta uppskriftin, sú hér að ofan, heitir Alma.

Prjónaði úr léttlopa á prjóna nr. 3,5. Urðu heldur litlir, hefði þurft nr. 4, en þeir voru líka gefnir upp í uppskriftinni.

Svo var það Víðir.

Þessir vettlingar eru úr tvöföldum lopa, á prjóna nr. 5. Ætla að þæfa þá.

Prufaði líka að prjóna þá úr afgöngum af Spuna.

Þá kom sokkauppskriftin Þórólfur.

Í hana ákvað ég að nota Robust sokkagarn sem ég hef lengi átt, og í munstrið afganga af Drops merino extra fine. Prjónastærðin var 3,5, og passa sokkarnir á stálpað barn.

Það síðasta sem ég prjónaði í þessu samprjóni í bili voru vettlingarnir Þórólfur.

Hér notaði ég sama garn og í sokkana og með sömu prjónastærð.

Ég gerði þá með ömmustelpurnar í huga og hafði eitt parið aðeins minna, en þurfti þá að breyta mynstrinu og hnoðaði saman annað sem minnti á það upprunalega.

Þarf eitthvað geyma þessa, eru á aðeins eldri en mínar eru núna.

Leikskólavettlingar

Ég fann hjá mér mikla þörf um daginn fyrir að prjóna úr afgöngum. 

Garnið mitt er flokkað eftir grófleika og efni, og ég greip poka með afgöngum úr Karisma og Lima frá Drops, og Lamaull frá Litlu prjónabúðinni.

Marga liti notaði ég upp til agna, prjónaði báða vettlinga í sama pari samtímis.

Ég náði að klára hér um bil allt sem var í pokanum, 265 grömm af garni, sem svarar til rúmlega 5 dokka.

Merkti svo alla með því að sauma merkimiða innan í, 14 stykki.

Uppskriftin er blanda úr ýmsum áttum, af Drops vefnum, Bændablaðinu og Leikskólafötum.

Ég vil hafa þumalinn þannig að ekki skipti máli á hvorri hendinni vettlingurinn er.

Prjónarnir voru nr. 3,5.

Sokkar, vettlingar og hálsaskjól

Prjónaði sokka á ömmustrákinn, næst minnstu stærðina af Snær sokkar frá Petit knitting.

Vettlingarnir eru líka frá Petit knitting og heita Sindri vettlingar.

Stærðin er á 1-2 ára.

Svo vantaði hann kraga fyrir vetrarveðrið.

Uppskriftin er aftur frá Petit knitting og heitir Skorri hálsskjól.

Ég valdi minnstu stærðina, 6-12 mánaða, en sleppti stroffi neðst. Svo hafði ég 1 sl og 1 br í kraganum sjálfum til að hann héldi betur að hálsinum, en í uppskriftinni er perluprjón.

Kraginn passar mjög vel á hann svona.

Notaði Drops merino extra fine í allt.