Vinkonupeysan

Þetta er Vinkonupeysan frá Flóði og fjöru. Ég keypti garnið í hana, uppskrift og heklunál, allt í einum pakka, á Garnival í byrjun mars. Uppskriftin gerir ráð fyrir að maður mæli sjálfan sig aðeins út og byrji svo á að hekla eins og maður haldi að passi. Ég heklaði peysuna og setti hana saman og komst að því að ég vildi hafa mína víðari, en á módelinu er hún þröng og frekar stutt. Ég tók hana því aftur í sundur og rakti upp fram- og bakstykki, og bætti inn í fjórum kössum alls á víddina. Ermarnar víkkaði ég jafnmikið. Svo hafði ég peysuna síðari að aftan og alla síðari í heildina. Í mína peysu fóru ca. 350 grömm eða þrjár og hálf dokka. Hún smellpassar og er alveg eins og ég vil hafa hana.

Garnið heitir Friendly Yarn frá Bobbiny. Ég hef líka séð það í Skartsmiðjunni í Reykjanesbæ. Heklunálin er nr. 6, og stykkin eru hekluð saman með nál nr. 5,5. 

Peysan er alveg svört þótt hún virðist gráleit á myndinni. Það er fljótlegt og gaman að hekla hana en heldur leiðinlegra að setja hana saman, ég endaði á að nota nál nr. 4,5 í það verk.

Sitt lítið af hverju

Mig hefur lengi langað til að styrkja verkefnið Jól í skókassa en ekki fundið mig í því að tína til allt sem til þarf og passa nú vel upp á að ekkert vanti í kassann og yfirleitt að taka ákvarðanir um hvað eigi að velja. Ég veit af starfi meðal flóttakvenna frá Úkraínu sem hafa það sem verkefni allt árið að útbúa jólagjafir í skókassa handa börnum í heimalandi sínu sem eiga um sárt að binda. Starfið er í umsjón öflugra, íslenskra sjálfboðaliða þar sem ein er fremst í flokki.

 

Ég finn mig frekar í að aðstoða þær við að búa til hluti sem hægt er að láta í kassana og þangað fór allt það sem er á þessum myndum. Þvottastykkin eru úr Ikea og saumað í þau í Brother Disney vélinni minni. Ég spretti efstu brúninni upp og fjarlægi stóra miða sem eru á þeim og færi til hankana ef þeir eru ekki almennilega miðjusettir, og sauma svo brúnina niður aftur. Hundarnir eru prentaðir í Bambu Lab þrívíddarprentaranum. Vettlingarnir eru prjónaðir úr Drops Fiesta og eftir vettlingauppskriftinni einu sem ég nota, Randalíus, sem er frí á heimasíðu Storksins.

Símatöskur í útsaumsvél

Ég var búin að horfa lengi á þessar hliðartöskur eða símatöskur frá Kreative Kiwi og langaði að gera þær fyrir barnabörnin áður en þau yrðu of gömul fyrir þennan stíl. Þau eru núna ellefu, níu og sjö ára, ein orðin og hin að verða. 

 

Það hefur líka staðið í mér að yngsta er strákur, og en mamma hans sagði mér bara að gera eins handa honum. Hann er reyndar ekki kominn með síma, en allar stelpurnar eiga iphone þannig að þær setja símana sína í þetta. Ég hafði hans tösku bara strákalegri á litinn.

Ég gerði prufutösku og fannst hún of lítil og vissi að ein stelpan var með frekar stóran síma, svo ég lengdi töskurnar og stærðin reyndist mjög fín fyrir alla. Bakið var samkvæmt uppskriftinni einfalt, en ég sá í prufutöskunni að það væri ekki fallegt og hafði það því úr tvöföldu efni. Eins voru böndin í upphaflega munstrinu bara einfaldar bómullarsnúrur eða satínbönd, í fastri lengd. Ég ákvað að setja á þær almennileg bönd, fjórföld með flíselíni og festa þau á D-hringi og hafði þau stillanleg hvað lengdina varðar. 

Þegar ég hafði verið að kíkja eftir svona íhlutum ef ég átti leið í föndurbúðir þá sá ég ekki neitt sem passaði. Þá datt mér það snjallræði í hug að kannski væri hægt að þrívíddarprenta það sem mig vantaði, og ég fann það sem ég leitaði að og gat ráðið breiddinni! Ég miðaði við að böndin yrðu 2,5 cm á breidd og prentaði íhlutina fyrir þá breidd.

Að gamni mínu prentaði ég svo töskuskraut og hengdi í rennilásana.

Útsaumsmunstrið gerði ráð fyrir að stafur yrði saumaður í mitt blómið þannig að hver taska hafði sitt eigið útsaumsskjal. Hvert barn fékk því tösku með upphafsstafnum í sínu nafni.

 

Ég hefði getað prentað D-hringina og lengdarstillinn í ýmsum litum, en ég stillti mig og hafði allt lítið áberandi til að þetta yrði ekki of mikið. En ég hefði getað það…..

Töskurnar sjálfar eru semsagt gerðar alfarið í útsaumsvélinni og þar festi ég líka böndin sem halda D-hringjunum með þeim á, en restina græjaði ég svo í öðrum vélum.