Þvottastykki

Ég saumaði að gamni mínu í nokkur þvottastykki og gaf barnabörnunum, tvö hverju. Passaði bara að ekki færu tvö eins á hvort heimili. Gott að þekkja sundur hver á hvað. 

Þessar myndir eru í lítilli Brother saumavél sem ég á og er hún líka er útsaumsvél. Ég hef hana handa krökkunum til að sauma á ef þau langar til. Brother hefur einkarétt á Disneymyndum til útsaums og því freistaði það að hafa þær í aukavél sem ég þarf að hafa í saumaherberginu. Þvottastykkin keypti ég í Ikea.

Tvær ömmustelpnanna minna fengu sérherbergi fyrir síðustu jól. Þær fengu að velja sér liti á veggina sjálfar og fleira í herbergin.
 

Svo fannst þeim vanta púða í stíl við nýju litina og báðu ömmu sína að sauma fyrir þær púða sem þær teiknuðu sjálfar, eins og ég hef áður gert. Amman varð voða glöð yfir að vera beðin um þetta og hönnunarvinna systranna hófst um leið.

Aðalatriðið er að hafa teikninguna frekar einfalda með hreinar línur og engin aukastrik, allt sem sést á myndinni verður saumað. Ég fer svo sjálf ofan í blýantsstrikin með tússpenna.

Þær völdu sér efnin alveg sjálfar og líka hvar hvert efni átti að vera í hvorum púða. 

Þetta er sem sagt gert í appi frá MySewnet sem ég hleð niður í iPhone símann, vinn myndina aðeins í símanum, hreinsa aukastrik og svoleiðis, og sendi svo úr honum í útsaumsvélina, sem sér um restina.

15 ára bloggafmæli

Um þessar mundir á handavinnubloggið mitt 15 ára afmæli. Af því tilefni ætla ég að bregða aðeins út af vananum og segja frá einhverju öðru en handavinnunni minni. Tvisvar hef ég sýnt úr saumaherberginu af svona tilefni, og væri alveg hægt að sýna ýmislegt nýtt og spennandi þaðan, en nú vil ég heldur monta mig af tveimur elstu ömmustelpunum, sem eru báðar 8 ára sonadætur mínar.

Önnur þeirra saumaði þessa mynd í skólanum síðasta vor, og finnst mér það vel af sér vikið hjá barni sem þá var í 2. bekk. Ég hef sjálf kennt börnum á þessum aldri að sauma krosssaum og veit að það vefst fyrir mörgum. Mig langaði svo að myndin hennar yrði að einhverju og bauð henni að sauma púða utan um hana, og valdi hún sjálf öll efnin og líka hvernig ég ætti að raða þeim upp. Hún var mjög ánægð með þetta og talaði sérstaklega um hvað það væri gaman að myndin væri orðin að einhverjum hlut.

Hún hefur líka hannað og sniðið Barbie föt hjá mér sem ég hjálpaði henni svo með.

Hin átta ára ömmustelpan mín er búin að læra að prjóna hjá mér, og er meira að segja örvhent, en ég kenndi henni þetta rétthent eftir að hafa ráðfært mig við hóp textílkennara á fb. Nú er hún að læra að hekla og fór heim um daginn með poka sem í voru garn og heklunál sem langamma hennar átti, hef ekki frétt af því meira.

Síðast þegar hún kom í pössun var hún ákveðin í að hún vildi fá að sauma á saumavélina, og sneið ég fyrir hana efni í hárteygjur sem hún saumaði svo sjálf.

Hún saumaði fjórar fyrir sig og systur sína, og hefði alveg getað haldið áfram hefði amman mátt vera að. En báðar fóru heim með heimasaumaðar teygjur í hárinu. Nú bíður hin átta ára daman eftir að fá að gera það sama. 

Hún sneri stykkinu sjálf við og lærði líka að fletja út sauminn með fingrunum (fannst það reyndar óþarfa pjatt), og ég hjálpaði henni að loka endunum.

Það verður spennandi að fylgjast með þeim báðum, og líka hinum tveimur sem eru sex ára stelpa og fjögurra ára strákur, sem eru ekki síður skapandi fólk. Sjálf var ég farin að prjóna og sauma á þessum aldri og á ennþá Barbieföt sem ég bjó til. Gaman að sjá barnabörnin fara í þessa átt😊
 

Veggteppi

Á veggnum bak við borðið þar sem ég hef úsaumsvélina saumaði ég teppi sem var að hluta gert í þeirri vél. Nú er ég búin að taka af plássinu sem teppið hafði, teppið orðið of stórt og hefur fengið annan stað. Það er nefnilega þannig að þegar maður á útsaumsvél safnast að manni smátt og smátt töluverður tvinni. 

Útsaumstvinnakeflin eru frekar stór og finnst mér best að geyma þau í hillu. Ég keypti tvær smíðajárnshillur fyrir nokkrum árum á netinu, ætlaðar fyrir naglalakk. Þær taka samtals 60 kefli og eru fullar. Þá bætti ég við myndahillu úr Ikea, fyrst einni. Þær eru akkúrat nógu djúpar til að hægt sé að koma fyrir tveimur röðum af keflum í hillu. Svo bætti ég annarri við í vor og þá saumaði ég þetta litla teppi og lét það passa á vegginn. Blokkina fékk ég í EQ8 forritinu og saumaði með pappírssaumi. Eftir á sá ég að litapallettan í því passar við tvinnakeflin sem hanga allt í kringum það í þessu horni.

 Merkið komið á sinn stað, búið til í Spíralprógramminu í Platínum útsaumsforritinu,

Bútasaumurinn merktur

Þegar ég tók niður jólabútasauminn núna í janúar greip ég tækifærið og merkti öll ómerkt teppi sem ég gekk frá, og hélt svo bara áfram með ýmis önnur teppi. T.d. hafði ég gleymt að merkja kokkateppið sem ég gerði fyrir ári síðan, skil nú reyndar ekkert í því. Ég tók bara minnstu útgáfuna af einni myndinni og minnkaði hana ennþá meira og bjó til merkimiða.

Í janúar fannst mér alveg kominn tími til að eignast flott útsaumsforrit og keypti My Sewnet Platinum forritið í Pfaff. Síðan er ég búin að skemmta mér vel við að skoða það, og sé að ég hef nóg að læra og prófa í útsaum. Hringlaga myndirnar eru allar úr Spiral fídusnum í því, endalausir möguleikar, og letrið tekið úr forritinu líka. Jólamyndirnar eru einnig þaðan, úr Super Design, en það passar svo vel í þessar merkingar því myndirnar eru svo litlar.

Það var hins vegar þrautin þyngri að finna út úr ártölunum á teppum sem ég saumaði áður en ég hóf þetta blogg árið 2009. Bloggið er handavinnudagbókin mín og þar get ég flett upp öllu mögulegu, en bútasaumurinn á sér sögu a.m.k. 15 ár lengra aftur í tímann. Ég lagðist í rannsóknarvinnu og notaði myndaalbúmin á heimilinu til að sjá hvort ég gæti lesið eitthvað út úr þeim, og niðurstaðan varð sú  að sumt var ég nokkuð örugg með en annað varð ég bara að tímasetja eftir tilfinningu. Ég kíkti til dæmis á útgáfuár einnar bókar sem ég sneið og saumaði eftir og sá að teppið var alla vega ekki eldra en hún. Svo hafði ég notað EQ forritið við sum teppin þannig að þar hafði ég viðmið, þó ég muni ekki alveg hvaða ár ég fékk það, en það var örugglega eftir að ég fékk fyrsta saumaherbergið mitt árið 2005. En þar með er þetta bara afgreitt.
 

Hreindýrapúði

Milli jóla og nýárs saumaði ég þennan púða. Hreindýramunstrið fékk ég í blogginu sem birtist í saumavélinni minni. Þetta er ætlað til að sauma í jólapeysu, dálítið grófgert og gisið, en mig langaði að prófa það, enda alltaf hrifin af krosssaumi. Ég minnkaði það samt töluvert.

Snúrukantinn í kringum púðann gerði ég úr venjulegu, tilbúnu skábandi sem ég átti, og notaði til þess bestu aðferðina sem ég kann, en hún er sú að renna því í gegnum overlockvélina með snúrunni sem liggur þá á hárréttum stað í snúrufætinum sem hægt er að kaupa á vélina. Hún fylgir nytjasaumspakkanum, og svo er líka til skrautsaumspakki. Þegar ég sauma svo púðann saman nota ég mjóa, langa rennilásafótinn á saumavélinni.

 

Pottaleppar

Þessir pottaleppar hafa aldrei ratað hér inn á bloggið mitt þótt nokkur ár séu síðan ég saumaði þá. Ég notaði venjulega saumavél, enda hafði ég ekki eignast útsaumsvél þá. Þetta munstur er úr bók sem heitir Redwork Designs, og venjan er að sauma þannig munstur með aftursting. En mér finnst svo miklu skemmtilegra að nota saumavél en að sauma svona myndir í höndum. Það er seinlegt, ég notaði þrefalda beina sauminn í vélinni og fór svo spor fyrir spor í strikin. 

 

Jólaálfur

Husqvarna Sapphire 85 saumavélin mín, sem ég nota eingöngu sem útsaumsvél, er nettengd og á henni birtist blogg frá Husqvarna Viking með ýmsum verkefnum og stundum útsaumsmynstrum sem hægt er að opna í vélinni. Í fyrra sendu þeir saumavélaeigendum þrjár útgáfur af þessum jólaálfi. Ég hef lengi ætlað að sauma hann í eitthvað, og gerði það augljósa í gær og setti hann í viskastykki, sem ég keypti í Bakgarðinum hjá Jólahúsinu í Eyjafirði í sumar eða fyrrasumar.

Hann saumaðist vel út, en ég fór tvisvar yfir skeggið og hjartað til að hylja rendurnar í efninu.

 

Dúkkuföt

Mig langaði svo að sauma eitthvað um daginn svo ég stakk hendinni ofan í afklippukassann og valdi efni í þessa dúkkusamfestinga og saumaði. Sniðið er úr bókinni Sy og strikk dukkeklær eftir Anne Grethe Gaaserud. Ég notaði svo til eingöngu overlockvélina í verkefnið og lokaði að aftan með smellu.

Handþurrkur

Þegar almennar sóttvarnir hófust fyrir bráðum þremur árum vegna covid og handþvottur og sprittnotkun voru nauðsynlegar varúðarráðstafanir reyndi maður að sjálfsögðu að hafa þetta í lagi á heimilinu líka. Ég tíndi til niðurklippt handklæði sem ég hafði faldað og rúllaði þeim saman og setti í körfu á baðvaskinn. Þannig gátu allir tekið sér hreint handklæði eftir handþvott ef þeir vildu. En þótt þessi tími sé liðinn þá mun ég ekki snúa til baka til þess þegar allir þurrkuðu sér á sama handklæðinu, það er hægt að velja þetta líka. Nú er ég búin að endurnýja tuskurnar, keypti hræódýr þvottastykki í Rúmfó og bróderaði í eitt hornið á þeim öllum. 

Barnabörnin hafa alltaf valið sér tusku og muna þá hver á hvað hverju sinni, og ein þeirra var úr bleiku handklæði sem ég átti sem stelpa, og var með stafnum mínum sem mamma hafði saumað á það. Yngsta ömmustelpan hélt sérstaklega upp á þessa. Þess vegna datt mér í hug að merkja þeim öllum eina handþurrku með upphafsstafnum í nafni þeirra.

Stafina fann ég í Quick Font forritinu, og ég notaði minnsta segulrammann, 10x10 cm, í verkefnið. Nauðsynlegt að eiga þá í öllum stærðum. Munstrin eru öll í Sapphire 85 útsaumsvélinni minni, og var þetta upplagt tækifæri til að prófa að sauma minnstu munstrin í henni.
 

Lítið teppi með kaleidoscope munstri

Mér finnst alltaf jafn nærandi að sauma afgangateppi, og vinna úr afgöngum almennt. Ég sá svona teppi einhvers staðar á netinu í vor og langaði að sauma svipað, sérstaklega af því að þessi blokk er ein af mínum uppáhalds. Svo litlu afgangarnir voru dregnir fram einu sinni enn, og hafist handa. Mörg þessara efna eru áratuga gömul svo það er eins og að ferðast aftur í tímann að skoða bútana.

Ég bjó blokkina til í EQ8 forritinu, fann einhvern veginn út úr því, og sneið svo alla 576 þríhyrningana eftir skapalóni úr pappa sem ég prentaði út, strikaði i kring með blýanti og klippti út með skærum. Þarna kláruðust sum efni alveg. Reglan er sú að skipta efnunum í ljós og dökk, og mega dökkar eða ljósar hliðar aldrei liggja saman. Þetta gekk upp og var skemmtilegt að gera. 

 Og merkið fór á sinn stað, saumað í útsaumsvélinni minni góðu.  Hver blokk er 23x23 cm og allt teppið ca. 92x92 cm.

Karin hverdagscardigan

Fjórða peysan sem ég sauma eftir sniðinu sem ég keypti hjá Ida Victoria. Nota hinar svo mikið að mér þótti sjálfsagt að bæta við einni bleikri. Yngsta ömmustelpan sem er mjög bleik og hefur mikinn fataáhuga sá mig fara í hana í gær og sagði strax: flott peysa, amma, viltu vera í henni í afmælinu mínu (sem er reyndar nýbúið), já, en þá bara í Ylfu afmæli….  Tek sko alveg mark á þessari dömu, reyni oft að vera í bleiku þegar von er á að hitta hana.

 Efnið er kallað vöfflujersey vegna vefnaðarins og er bómull með 5% teygju, en það teygist frekar mikið. Ég lét því saumaráðgjafann í Husqvarnavélinni velja rétta sporið til að falda með teygjuefni og hann valdi þetta spor. Efnið pantaði ég að utan.

Síðar peysur

Ég tók mig til um daginn og saumaði mér þrjár síðar peysur til að nota í sumar. Ekki það að ég eigi ekki nóg af prjónuðum peysum, mig langaði bara í þynnri og mýkri peysur.  Ég keypti snið sem ég hef lengi ætlað að eignast og saumaði prufupeysu úr efni sem ég keypti í töluverðu magni, hræódýrt, í Álnavörubúðinni í Hveragerði þegar hún var að hætta með efni. 

Sniðið smellpassaði, en það eina sem ég gat sett út á var að listinn að framan var heldur stuttur og kipraði peysuna aðeins kringum hálsmálið. Ég tók hann af, bætti 5 cm inni í hann og saumaði aftur á, og nú var hann miklu betri. Svo sleppti ég líka vösum sem fylgdu sniðinu, hef ekkert að gera við vasa á flíkum nema utanyfirflíkum eins og úlpum og kápum. Sniðið kemur í þremur síddum, og valdi ég þá síðustu.

Þótt þetta efni hafi verið ódýrt þegar ég keypti það, þá er það alveg þrusugott, og hef ég varla farið úr þessari gráu.

Næst var svo að gera aðra, verð að eiga bláa líka. Efnið í hana keypti ég í Litlu músinni og gerði mér ferð upp á Akranes til að kaupa það, á mjög erfitt með að kaupa efni án þess að koma við það fyrst. En efnin hjá henni eru mjög góð, og hef ég pantað tvisvar síðan og verið mjög ánægð. Þetta bláa er lífrænt bómullarjersey, mjög gott að vera í henni. Nota hana líka mikið.

Svo bætti ég við einni hvítri, passar vel að eiga eina slíka fyrir bjarta sumardaga. Efnið pantaði ég frá Litlu músinni og er það sams konar og bláa efnið.

Peysurnar voru saumaðar svo til eingöngu á overlockvélina, stakk bara axlarsauma og faldaði ermar í Epic vélinni.

Þetta spor úr Epic saumavélinni er mjög fínt til að falda jerseyefni og lokar kantinum að innan. Nennti ekki að taka fram coverlockvélina fyrir svona lítið.

Sniðið pantaði ég frá Ida Victoria í Noregi og tók það ekki nema viku að fá það í hús.  Huggulegt að fá svona fallegt kort með 🤍

 

“Crazy” bútateppi með útsaumsívafi

Það höfðu safnast fyrir hjá mér ýmsar prufur úr útsaumsvélunum sem tóku pláss í skúffum en ég tímdi ekki að henda. Hvað gerir bútasaumari þá? Jú, býr til blokkir og gerir teppi. Flestar prufurnar voru reyndar úr Pfaff creative 1.5 vélinni, aðeins tvær úr nýju Sapphire 85 saumavélinni. Ég tók þær sem hægt var að nota og setti þær í miðjuna á “crazy quilt” blokk. Ákvað að finna blokkir í EQ8 forritinu og sauma með pappírssaum, hafði tvær gerðir sem ég raðaði upp til skiptis. Svo notaði ég enn einu sinni afganga en skipti efnunum í tvennt til að forðast að sama efni snertist í tveimur blokkum þegar ég saumaði þær saman.

Síðan valdi ég nokkra af þeim fallegu og fjölmörgu skrautsaumum sem eru í Epic 980Q vélinni til að stinga og notaði til þess Cotty 30 tvinna. Stungan varð að vera “crazy” líka, og svakalega var gaman að sitja við og klára þetta.

Merkimiðann aftan á saumaði ég að sjálfsögðu í útsaumsvélinni, og yfirleitt reyni ég að velja liti í myndina á miðanum sem passar við bakefnið. Það er skýringin á frekar skrítnu litavali hjá mér að þessu sinni, en bakefnið er mjög litríkt og skrautlegt.

 

Sporabækur

Þegar ég fékk Sapphire 85 útsaumsvélina mína gerði ég ráð fyrir að skrautsporin í henni væru nokkurn vegin þau sömu og í Epic 980Q vélinni, og það yrði óþarfi að gera sérstaka sporabók fyrir hana. Ég fór nú samt að nördast aðeins og bera saman sporaflokkana. Þá kom í ljós nokkuð sem ég átti ekki von á: það voru fleiri spor í Sapphire vélinni en í Epic vélinni. Þetta kallaði á sporabók fyrir hana líka, en ég ákvað að sauma bara þau spor sem ekki voru í Epic vélinni og merkja þau með flokki og númeri. Öll sporin í Epic vélinni voru líka í Sapphire vélinni. Þegar upp var staðið voru þetta um 100 spor sem munaði.

Svo gerði ég forsíður fyrir hverja vél í útsaumsvélinni. Munstrin fékk ég ókeypis hjá Kreativ Kiwi.

Mér finnst mjög gaman að að fara í gegnum það sem vélin getur gert, prófa það allt. Mæli með þessu.

 

Kokkateppi

Þetta teppi hefur hangið í nokkrar vikur í borðkróknum fyrir ofan eldhúsborðið. Ég hef alltaf verið hrifin af “Redwork” útsaumi og hef saumað mörg þannig verkefni gegnum tíðina. Samt finnst mér aldrei neitt sérstaklega gaman að sauma þau í höndunum út af fyrir sig, þótt ég vilji eiga afraksturinn. Og nú slapp ég alveg við að sauma myndirnar sjálf, því Sapphire 85 útsaumsvélin gerði þetta fyrir mig🙂

Uppskriftina fékk ég á netinu, frá Kreative Kiwi, og er hún ókeypis á síðunni þeirra. Þar heitir hún Redwork Chefs. Ég saumaði 4x4” mynstrin, og blokkin varð 8,5x8,5” að stærð. Mjög skemmtilegt verkefni.

Ég valdi þetta munstur aðallega til að skemmta barnabörnunum þegar þau sitja við eldhúsborðið hjá okkur. Þau velja sér þá þann kokk sem þau ætla að “vera” þann daginn. Sama gera þau stundum þegar þau koma inn til okkar, því í forstofunni hangir þetta húsateppi og þau byrja oft á að “velja sér hús”.