Heildartala yfir síðuflettingar

Sýnir færslur með efnisorðinu Buddur. Sýna allar færslur
Sýnir færslur með efnisorðinu Buddur. Sýna allar færslur

miðvikudagur, 8. júlí 2026

Símatöskur í útsaumsvél



Ég var búin að horfa lengi á þessar hliðartöskur eða símatöskur frá Kreative Kiwi og langaði að gera þær fyrir barnabörnin áður en þau yrðu of gömul fyrir þennan stíl. Þau eru núna ellefu, níu og sjö ára, ein orðin og hin að verða. 

 

Það hefur líka staðið í mér að yngsta er strákur, og en mamma hans sagði mér bara að gera eins handa honum. Hann er reyndar ekki kominn með síma, en allar stelpurnar eiga iphone þannig að þær setja símana sína í þetta. Ég hafði hans tösku bara strákalegri á litinn.


Ég gerði prufutösku og fannst hún of lítil og vissi að ein stelpan var með frekar stóran síma, svo ég lengdi töskurnar og stærðin reyndist mjög fín fyrir alla. Bakið var samkvæmt uppskriftinni einfalt, en ég sá í prufutöskunni að það væri ekki fallegt og hafði það því úr tvöföldu efni. Eins voru böndin í upphaflega munstrinu bara einfaldar bómullarsnúrur eða satínbönd, í fastri lengd. Ég ákvað að setja á þær almennileg bönd, fjórföld með flíselíni og festa þau á D-hringi og hafði þau stillanleg hvað lengdina varðar. 


Þegar ég hafði verið að kíkja eftir svona íhlutum ef ég átti leið í föndurbúðir þá sá ég ekki neitt sem passaði. Þá datt mér það snjallræði í hug að kannski væri hægt að þrívíddarprenta það sem mig vantaði, og ég fann það sem ég leitaði að og gat ráðið breiddinni! Ég miðaði við að böndin yrðu 2,5 cm á breidd og prentaði íhlutina fyrir þá breidd.


Að gamni mínu prentaði ég svo töskuskraut og hengdi í rennilásana.


Útsaumsmunstrið gerði ráð fyrir að stafur yrði saumaður í mitt blómið þannig að hver taska hafði sitt eigið útsaumsskjal. Hvert barn fékk því tösku með upphafsstafnum í sínu nafni.

 

Ég hefði getað prentað D-hringina og lengdarstillinn í ýmsum litum, en ég stillti mig og hafði allt lítið áberandi til að þetta yrði ekki of mikið. En ég hefði getað það…..


Töskurnar sjálfar eru semsagt gerðar alfarið í útsaumsvélinni og þar festi ég líka böndin sem halda D-hringjunum með þeim á, en restina græjaði ég svo í öðrum vélum.

föstudagur, 29. mars 2024

Rennilásabuddur

Þessar buddur saumaði ég fyrir forvitnis sakir því mér finnst aðferðin svo skemmtileg. Ég hef rekist á þær nokkrum sinnum á netinu en ákvað að prófa að sauma þær þegar ég sá góðar myndir af aðferðinni í fb hóp Íslenska bútasaumsfélagsins.

Ég valdi að sauma í heilt efni, en það má líka nota efni sem búið er að setja saman úr bútum. Setti vatt og bak líka, og stakk það með tvíburanál, en það hef ég ekki gert áður svo ég muni. Stærðin á stykkinu hjá mér var 30x40 sm, en það fann ég bara út sjálf, hægt að ráða stærðinni sjálfur. Svo er skorið skáhallt frá vinstra, efra horni en skurðurinn látinn enda sem svarar ca. 1/3 af lengd hliðarinnar fyrir ofan neðra hægra horn (alla vega gerði ég það). Úr þessu stykki fást sem sagt tvær buddur, önnur stærri en hin.

Þá eru skurðarbrúnirnar á báðum stykkjum kantaðar með 2,5” strimli eins og maður væri að kanta bútasaumsteppi, saumað við á röngunni og stungið niður á réttunni. Því næst notaði ég aðra hliðina á rennilásalengju sem seld er í metratali og saumaði á skákantinn.

Loks setti ég sleða á lásinn og saumaði buddurnar saman á röngunni. Í þá stærri festi ég skáband með saumunum til að hylja saumförin, en sikksakkaði bara saumförin á þeirri minni því skáböndin taka pláss.

                                 Stærri buddan varð 19x19 sm og sú minni 12x14 að stærð.

 

mánudagur, 25. mars 2024

Hákarlapennaveski


Einhvern tíma á vafri mínu um netheima rakst ég á myndband þar sem kennt var að sauma svona pennaveski í gervi hákarla. Ég varð strax voða skotin í þeim og byrjaði á að sauma einn til prufu, sem heppnaðist ágætlega, þannig að ég skellti mér í að sauma handa ömmubörnunum fjórum. Ég hafði ytra byrðið eins á þeim öllum en mismunandi liti á efnunum innan í. 


Uppskriftin gerir ráð fyrir rennilásum sem seldir eru í metratali og klipptir í rétta lengd og sleði settur á. Sá sem ég notaði er með mislitar tennur, kemur mjög flott út.


Ég fyllti hákarlana með trélitum, 24 stykki í hvern, og var nóg pláss eftir til að bæta öðru í. Hér eru þeir komnir í notkun hjá krökkunum, sem voru mjög ánægðir með þá. Merkti líka trélitina með ákveðnum lit fyrir hvert barn (sem reyndur yngri barna kennari) þannig að allir þekkja sitt.


Hér er prufustykkið sem ég byrjaði á. Það besta við þessa uppskrift er að það fylgir vídeó um hvernig á að sauma hann og sniðið er ókeypis. Allt um það HÉR. Það var samt dálítið erfitt að láta munnvikin koma vel út þar sem tennurnar mætast í efri og neðri skolti, þó það tækist þokkalega hjá mér. En áður en ég hélt áfram með hina fjóra þá rakst ég á annað myndband þar sem búið er að endurhanna munnvikin og notaði ég þá aðferð, sem heppnaðist mjög vel. HÉR er hún sýnd.
 

laugardagur, 26. nóvember 2022

Pennaveski

Ég sá þetta regnbogaefni í Bóthildi um daginn og keypti smá með það í huga að gera eitthvað handa ömmustelpunum mínum úr því, og svo fékk ég Hvolpasveitarefni handa þeim yngsta. Ég var svo sem ekki búina að útfæra þetta neitt nánar í huganum, nema að ég ætlaði að sauma nöfnin þeirra allra í veskin.

Stelpurnar voru allar staddar hér í heimsókn og ráku augun í efnið inni í saumaherberginu mínu og komust að því að ég ætlaði að sauma pennaveski eða buddu handa þeim. Þær fóru á flug og höfðu alveg skoðanir á því hvað þær vildu. Tvær vildu hafa kisu á sínum, ein vildi slaufu og nafnið sitt með útlínustöfum. Mér tókst að uppfylla óskirnar að mestu leyti og þetta varð útkoman. Efnið í veski stráksins þurfti ekki neinn skrautsaum og setti ég bara nafnið hans á það.



 Svo keypti ég smá dót, skriffæri og þess háttar og setti í þau. Allir kátir með þetta.

þriðjudagur, 30. ágúst 2022

Pennaveski


Ég er mikið fyrir að skrifa hjá mér alls konar hluti í ýmsar bækur, hef t.d. haldið dagbók núna í rúm 13 ár þar sem ég skrifa niður það helsta sem hefur borið við þann daginn. Svo á ég skissubækur, skipulagsbækur o.fl. 

En stundum þarf að leita að penna eða blýanti til að skrifa með, pínu vesen alltaf.


Ég rakst á þessi frábæru pennaveski á Instagram um daginn og fann svo uppskrift á Pinterest.


Teygjunni er smeygt yfir bókarkápuna, skriffærum skutlað í veskið og svo fylgja þau bara bókinni. Snilld!!



Þetta var svo skemmtilegt verkefni að ég gat ekki hætt. Þetta hefði ég viljað hafa þegar ég var í kennslu, mjög kennaravænt.

sunnudagur, 9. janúar 2022

Taska með rennilás

Þessi herralega taska var hluti af jólagjöf, merkt eigandanum. Hún er fóðruð með vatti og stungin að innanverðu.


 

miðvikudagur, 6. október 2021

Verkefnataska

Ég hef endalausa þörf fyrir verkefnatöskur af öllum stærðum og gerðum. Þessi varð til fyrir stuttu, og var mig lengi búið að langa til að nota þetta munstur í Pfaff 1.5 útsaumsvélinni minni góðu.

Ég notaði hör frá Ikea og bútasaumsefni í sjálfa töskuna og gamlan rennilás, sem ég átti.

Ég hafði hana svo til eins báðum megin, gerði örlitlar litabreytingar á seinni hliðinni. 

Svo setti ég vatt undir fóðrið og stakk í saumavélinni. Mér finnst alltaf betra að hafa smá fyllingu í fóðrinu.


 

miðvikudagur, 15. september 2021

Hvítt í hvítt

Ég á mikið safn af alls konar blúndum og böndum, og draumurinn hefur lengi verið að sauma teppi í “heirloom” stíl með alls konar hvítum efnum, skrautsaumi, perlum og pallíettum.En núna ákvað ég að gera poka með blúndum og skrautsaumi, en bara í hvítu. 

Ég þurfti ekkert að kaupa nema perlurnar, allt hitt átti ég. Pokinn er eins að aftan og framan. Hann er tvöfaldur og í innri pokann notaði ég gamalt og slitið lak.

Til að sauma perlurnar á að ofan notaði ég sérstakan perlusaumsfót sem fylgir með skrautsaumasettinu (Embellishment Feet Set) sem hægt er að kaupa með Husqvarna Amber Air overlockvélinni minni. Fóturinn stýrir perlubandinu algjörlega og ég þurfti bara að stilla vélina samkvæmt leiðbeiningum og sauma. Snilld!

Svo notaði ég útsaumstvinna í allan skrautsaum til að fá glansinn á munstrið.

Loks prófaði ég fót sem ég hef átt lengi með Epic 980 vélinni minni góðu en aldrei prófað almennilega. Hann saumar lek (Pin Tuck fótur). Til að fá þau skarpari er hægt að setja þráð undir og stýrir litla járnið fyrir framan fótinn þræðinum. Ég notaði heklugarn úr bómull. Undir fætinum eru svo raufar sem stýra því hvar næsta lek er saumað. Þessi poki varð því æfing í ýmsu sem ég hef ekki gert áður, og það er svo gaman.


 

þriðjudagur, 19. janúar 2021

Veski fyrir heyrnartól

Ég hef lengi ætlað að sauma svona veski fyrir símaheyrnartólin. Hver þekkir ekki að hafa heyrnartólin laus í töskunni eða hanskahólfinu í bílnum þar sem þau flækjast í það sem er þar fyrir. Þessi veski leysa málið. Saumaði núna eitt fyrir mig og annað fyrir eiginmanninn. Ég setti hring fyrir lyklakippu á þau en þess þarf ekki. Ég á haug af þessum tólum en setti þau sem ég nota mest í veskið. Læt hér fylgja tengil á myndband sem kennir aðferðina við saumaskapinn.


 

föstudagur, 20. nóvember 2020

Verkefnataska


Enn ein verkefnataskan orðin til. Ég hef alltaf þörf fyrir þessar undir prjónadót og ýmislegt annað.  Þessi er stór og góð.

Munstrið saumaði ég í útsaumsvélinni minni góðu í hör, og er það eins framan og aftan á töskunni. 


 

föstudagur, 3. apríl 2020

Snúrupokar


Í síðustu viku vantaði mig svo eitthvað til að sauma, svo ég bað vinkonu mína að lána mér snið sem hún á af snúrupoka.
Minni pokinn er gerður eftir uppskriftinni.
Eini feillinn sem ég gerði var að hafa of stíft flíselín í honum.
Annars er hann fínn fyrir ýmislegt smálegt, t.d. nett prjón.


Mig langaði að prófa aftur, gerði hann stærri. Skar kringum stiku sem ég á og kom fín stærð með henni.  Svo hafði ég þynnra flíselín. Mjög ánægð með útkomuna. Gat notað efni í vasann sem ég hef átt lengi en ekki notað. Snúruna í hann keypti ég í John Lewis í Edinborg fyrir mörgum árum.
Sniðið heitir Little Drawstring Bag frá Sarah J Patterson _designs.

föstudagur, 14. febrúar 2020

Prjónaveski fyrir Addi trio prjóna


Ég er voða gamaldags hvað varðar prjónaáhöld, nota mína gömlu prjóna og er bara sátt við þá. 


Það er samt ein nýung sem ég hef fallið fyrir, og það eru Addi trio prjónarnir.
Mér hefur alltaf leiðst að nota fimm prjóna, og nú er ég á góðri leið með að skipta þeim út fyrir Addi prjónana.


Og til að hafa eitthvað yfirlit yfir prjónaeignina þurfti ég að sauma veski undir þá.
Ég stefni á að fylla þetta veski smám saman. Af sumum stærðum á ég nú þegar tvö pör, því mér finnst best að prjóna ermar, skálmar, sokka og vettlinga samtímis hvað öðru.
Ég saumaði hvítan borða á hólfin til að skrifa prjónastærðirnar á þegar ég veit betur hvað kemur í þau.
Aftari hólfin eru fyrir lengri gerðina.


Svo rúlla ég þessu saman.
Fyrirmyndin er prjónaveski sem mér var gefið fyrir nokkrum árum og ég hef notað síðan.
Efnin keypti ég á útsölu hjá Panduro í vetur.