Býkúpa

Ömmustrákinn vantaði nýjan kraga til að halda á sér hita í leikskólanum. Þessi heitir Býkúpa og er úr bókinni Prjónað af ást eftir Lene Holme Samsøe. Svo prjónaði ég húfu í stíl. Uppskriftin gefur upp húfu bæði með eyrnaskjólum og án.

Garnið er Drops merino extra fine (kemur engum á óvart), prjónarnir nr. 3 og 4 og stærðin passar á 6-8 ára.

 

Hringtrefill

Þennan hringtrefil prjónaði ég handa öðrum syni mínum sem pantaði hann í afmælisgjöf.  Uppskriftin er í bókinnu Sjal og skjerf - strikking hele året eftir Bitte Mikkelborg. Garnið pantaði ég frá Kristínu í Vatnsnesi (sem er uppáhalds) og heitir liturinn Even Flow. Þetta er BFL garn í DK grófleika, prjónað á prjóna 4. Ég náði stærðinni nákvæmlega samkvæmt uppskriftinni, og trefillinn smellpassaði á eigandann. Hann valdi litinn sjálfur, að sjálfsögðu, en liturinn er ekki eins gulleitur og á myndinni, sem er tekin í janúar við slæm birtuskilyrði.

 Ég læt hér fylgja með mynd af treflinum úr bókinni, en þar heitir hann Vinterbølger skjerf.

Húfur og hálskragar

Stelpurnar mínar stækka og þurfa ný föt. Ég hef prjónað húfu eftir þessari uppskrift á eina þeirra áður en hún er úr Klompelompe - Strikkefest og heitir Lillemors duskelue.

Ég náði ekki að mynda þær allar saman því sú síðasta var prjónuð þegar búið var að afhenda hinar tvær.

Kragarnir eru úr Prjónað af ást og heitir uppskriftin Hálskraginn Bella. Ég prjónaði úr Drops merino extra fine.

 Ein daman vildi ekki hafa dúsk á sinni húfu. Ég nota alltaf smelludúska, langbest að festa þá á og auðvelt að losa ef það þarf að þvo húfuna.

Sokkar, vettlingar og hálsaskjól

Prjónaði sokka á ömmustrákinn, næst minnstu stærðina af Snær sokkar frá Petit knitting.

Vettlingarnir eru líka frá Petit knitting og heita Sindri vettlingar.

Stærðin er á 1-2 ára.

Svo vantaði hann kraga fyrir vetrarveðrið.

Uppskriftin er aftur frá Petit knitting og heitir Skorri hálsskjól.

Ég valdi minnstu stærðina, 6-12 mánaða, en sleppti stroffi neðst. Svo hafði ég 1 sl og 1 br í kraganum sjálfum til að hann héldi betur að hálsinum, en í uppskriftinni er perluprjón.

Kraginn passar mjög vel á hann svona.

Notaði Drops merino extra fine í allt.

Heklaðir kragar

Þegar ég ætlaði að fara að leita á þessum krögum á blogginu, fann ég þá hvergi, hafði gleymt að setja þá hér inn. 

Ég heklaði þá á ömmustelpurnar þrjár í janúar á þessu ári.

Þeir eru í tveimur stærðum, heklaðir úr Mandarin petit og aðferðina sá ég á Youtube.

Hálskragar

Prjónaði svona hálskraga á báðar tveggja ára ömmustelpurnar mínar, og þeir passa ljómandi vel.

Ég notaði sama garn og í húfunum í færslunni á undan, og sama lit, en myndin af húfunum kom allt öðruvísi út. 

Þetta er rétti liturinn.

Uppskriftin er hér.

Rumputuski

 

Já, það er skrítið nafnið á þessum krögum.

En uppskriftin er úr bókinni Leikskólaföt, og eru þeir prjónaðir úr tvöfaldri Englaull frá Litlu prjónabúðinni.

Og að sjálfsögðu eru þeir gerðir á Ylfu Karlottu og Auði Kötlu, ársgömlu ömmustelpurnar mínar.

 

Posted with Blogsy

Kragi

 

Þennan kraga prjónaði ég í samprjóni, KAL, sem Prjónakistan á facebook stóð fyrir. Þetta var óvissuprjón, og áttum við að nota 3 liti, en líka mátti nota allt að 16 liti og taka alltaf nýja og nýja munsturliti. Prjónaskapurinn stóð yfir í 9 daga, og fengum við uppskriftaskammtinn daglega á fb. Þetta var mjög skemmtilegt, eftirvænting á hverjum degi, og ég er mjög ánægð með kragann.

Þessi mynd er af síðu Prjónakistunnar, kraginn er hár og flottur, og liggur vel að hálsinum.

 

Posted with Blogsy

Hnepptur trefill

Þennan trefil prjónaði ég um áramótin og hef notað hann mikið síðan. Ég notaði alpakka garn frá Sandnes, hafði það tvöfalt og notaði prjóna nr. 5,5. Ég fitjaði upp 34 lykkjur, prjónaði 2 sléttar og 2 brugðnar til skiptis, og mældi svo bara á sjálfri mér hversu langur hann þurfti að vera. Tölurnar eru af peysu sem ég átti rúmlega tvítug!