Heildartala yfir síðuflettingar

mánudagur, 31. desember 2018

Leikskólakjólar


Ég fékk pöntun frá annarri tengdadótturinni upp á bleikan leikskólakjól. Litla daman vill bara fara í bleikum kjól í leikskólann og treður sér í alltof lítinn kjól á morgnana.
 

Auðvitað saumaði amma kjól, og annan á hina þriggja og hálfs árs dömuna sína, bara í öðrum lit.
 

Efnin eru keypt í Föndru, og sniðið líka, Onion 20047.
Stærðin er í 104, en þær verða fjögurra ára í sumar.

miðvikudagur, 26. desember 2018

Tilda sommerkjole


Þetta eru jólakjólar þriggja ára stelpnanna minna í ár.
Uppskriftin er úr Klompelompe sommerbarn, og heitir Tilda sommerkjole.
Það var ekki auðvelt að mynda þá í skammdegismyrkrinu, og er annar djúpgrænn og hinn milliblár, alls ekki svona gráblár eins og myndin sýnir.

Fyrst ætlaði ég að nota Mandarin petit og var komin vel niður fyrir handveg á fyrri kjólnum þegar ég uppgötvaði litagalla í garninu.  Þá nennti ég ekki að taka annan séns og fór yfir í aðra garntegund, Capri frá Katia.  Það er heldur grófara, en kjólarnir komu ágætlega út.  Yfirleitt er ég mjög ánægð með Mandarin petit og var svekkt yfir að geta ekki notað það.  Mér finnst þetta Capri bómullargarn gefa frá sér svolitla ló, sem ég veit ekki alveg hvað þýðir.
En stelpurnar voru flottar í kjólunum, fín vídd neðst á þeim og flottir þegar þær snúa sér í hring.

mánudagur, 10. desember 2018

Bútasaumsdúkur


Þessi dúkur er búinn að vera lengi í vinnslu.
Ég hef alla vega náð að sauma hann á þrjár saumavélar.


Upphaflega átti þetta að verða veggteppi, en varð of stór til þess fyrir minn smekk.
Hann endaði í 136 x 136 sm.
Hann passar mjög vel á borðstofuborðið.
 

Hugmyndina fékk ég úr blaði frá Fons and Porter´s Love of Quilting.
Ég teiknaði blokkirnar í EQ forritinu og notaði pappírssaum.

miðvikudagur, 28. nóvember 2018

Heklaðir kragar


Þegar ég ætlaði að fara að leita á þessum krögum á blogginu, fann ég þá hvergi, hafði gleymt að setja þá hér inn. 
Ég heklaði þá á ömmustelpurnar þrjár í janúar á þessu ári.
Þeir eru í tveimur stærðum, heklaðir úr Mandarin petit og aðferðina sá ég á Youtube.

laugardagur, 17. nóvember 2018

Everyday dress


Í þó nokkurn tíma hef ég séð snið á netinu sem heita "Made by Runi".  
Mér sýnist þetta vera sænsk kona, búsett í Noregi sem rekur þetta fyrirtæki ásamt fjölskyldu sinni.
Mig hefur lengi langað til að prófa snið sem heitir Everyday dress, og lét ég verða af því fyrir nokkrum vikum að panta það.  Hún selur bæði útprentuð snið og rafræn á PDF skjölum sem maður prentar út og límir saman. Ég nenni því ekki og keypti því útprentað og fékk það sent, tók ekki nema viku að fá það hingað.
Grunnsniðið er heill kjóll í þremur síddum, eins og þessi efsti. Ég saumaði hann í mestu síddinni. Allar brúnir eru kantaðar með stroffefni.

Svo selur hún svoköllur "Add on" snið, en þá notar maður grunnsniðið af efsta kjólnum, en breytir efri hlutanum, og þá er hægt að hafa ermar (þrjár síddir mögulegar) og annað efni í toppnum ef vill.
Ég keypti sem sagt Add on pakkann líka.
Af gráa efninu keypti ég tvær síddir, var ekki viss um að ein sídd dygði, sem hún reyndar gerði, og átti ég því efni í neðri hluta á öðrum kjól, og bætti svörtu við að ofan og í ermar.

Þá sá ég að afgangurinn af svarta efninu dugði í stutterma efri topp, og í neðri hlutann setti ég efni sem ég hef átt lengi, og bryddaði með rauðu stroffefni, en hafði svart neðst.
Þetta snið býður upp á alls konar samsetningar.

föstudagur, 2. nóvember 2018

Motta undir saumavélina


Ég saumaði mottu undir saumavélina, bæði af því að það er gott að hafa mottu undir og svo er auðveldara að hnika vélinni til á borðinu. Ég hef oft haft svona undir vélunum mínum, en þá bara gripið eitthvert stykki sem ég átti.
Ýmis lítil áhöld sem ég er alltaf að grípa til við saumaskapinn, eins og sprettari, pinsettur, fingurbjörg og stiletto, voru á bakka á bak við vélina, en eru nú í vasanum lengst til hægri.  Í miðjuvasanum geymi ég litlu skærin, og vasann til vinstri nota ég til að henda í afklipptum þráðum, sem ég ryksuga svo bara upp öðru hverju.

miðvikudagur, 31. október 2018

Kjólar


Eins og ég sagði í síðustu færslu þá ætla ég að vera duglegri að sýna fatasauminn minn.
Ég er kjólakona, og hef saumað mest eftir Onion sniðum síðasta áratug.
Kjólinn hér að ofan er ég nýbúin að sauma, Hann er úr einskonar crepe jersey efni, aðeins teygjanlegu, en mjög þægilegu að vera í. 
Sniðið heitir Onion 2035, og hef ég saumað nokkra kjóla eftir þessu sniði.
 

Þennan saumaði ég fyrr í sumar, sem rósóttan og léttan sumarkjól.  Hann er úr svipuðu efni og hinn, og notaði ég líka snið frá Onion, snið 2017.  Það er ekki lengur á síðunni þeirra, svo ég get ekki sett tengil í það.  Ég hef líka saumað nokkra kjóla eftir þessu sniði, og hafa þeir passað mjög vel.

Efnin í báða kjólana voru keypt í Föndru og sniðin voru líka keypt þar fyrir mörgum árum.

laugardagur, 27. október 2018

Saumuð peysa


Ég sauma alltaf á mig föt annað slagið, en hef einhvern veginn alveg gleymt að setja það hér á bloggið, gleymi líka að taka myndir. Reyni að bæta úr því.

Þessa peysu saumaði ég um daginn. Ég átti einhverja fimm metra af þessu gráa jersey efni, og fannst fínt að prófa sniðið á því áður en ég færi að kaupa nýtt efni í peysuna, svona til að sjá hvort sniðið passaði og hvort einhverju þyrfti að breyta. Ég fór alveg eftir sniðinu í öllu, og flíkin passar bara vel.

Sniðið heitir Cardigan og topp og er frá Stoff&Stil, keypt fyrir mig í Svíþjóð.

laugardagur, 20. október 2018

Fjölnota töskur


Ég tók mig til um daginn og saumaði fjölnota töskur úr gömlum gardínum, sem lágu uppi á háalofti.
Ég hef áður saumað innkaupatöskur, og þær hafa reynst mjög vel, sérstaklega þegar maður man eftir að setja þær aftur út í bíl eftir innkaup.
Ég renndi þeim saman í overlockvélinni, en gekk frá höldum og kanti að ofan í saumavélinni.


Ég saumaði þessa sérstaklega undir sunddótið fyrir nokkrum mánuðum, og hafði hana nógu stóra til að rúma hreinan alklæðnað að auki þegar svo ber undir,

fimmtudagur, 18. október 2018

Húfan Ösp


Þetta er húfan Ösp.
Hana prjónaði ég á yngstu ömmustelpuna mína sem er tæplega 18 mánaða.

Uppskriftina keypti ég á Ravelry.
Ég notaði Drops Merino extra fine og næst minnstu stærðina. 
Dúskinn keypti ég í Gallery Spuna eins og garnið.

fimmtudagur, 4. október 2018

Allar saumavélarnar mínar fyrr og nú


 Mér finnst tími til kominn að fjalla aðeins um saumavélasögu mína. Fyrst ætla ég að skrifa um þær þrjár vélar, sem ég nota núna, og fara svo yfir þær vélar sem ég hef átt áður eða er hætt að nota.
Þetta er nýjasta, flottasta og besta vélin sem ég hef eignast, Husqvarna Viking Epic 980Q, sem kom út á þessu ári.  Þegar ég sá útsaumsvélina Designer Epic árið 2016, þessa bláu, sleppti hjartað slagi, því vélin sjálf var svo flott, en ég hef hingað til ekki haft áhuga á útsaumi í vél. Hjartað tók svo aukakipp þegar ég sá að það var komin bleik vél, sem var sama vél og hin en án útsaums. Ég var staðráðin í að eignast hana.  Ég keypti hana í Pfaff, Selma pantaði hana fyrir mig, því þau eru ekki með hana í búðinni, og fékk ég hana um miðjan ágúst.


 Það sem mér líkar best við er stærðin, hún er stór, með langan arm og hátt undir arminn, nóg pláss í kring um nálasvæðið t.d. þegar maður skiptir um fót eða nál.  Hún þræðir sig sjálf, er mjög vel lýst. Flestar aðgerðir fara fram á snertiskjá sem virkar eins og spjaldtölva, og vélin er nettengd. Í henni eru ótal myndbönd með kennslu í saumaaðferðum, spólurnar eru stærri og því þarf sjaldnar að fylla á þær.


 Það sem mér finnst líka svo flott er að hægt er að nota stór tvinnakefli á þessa vél. Hún er hljóðlát og einhvern vegin svo mjúk þegar hún vinnur.
Ég er alsæl með vélina og held að við eigum eftir að eiga mörg góð ár saman.


 Overlock vélina mína eignaðist ég árið 2009, keypti hana í Pfaff. Ég hef saumað föt á sjálfa mig í áratugi, og á börnin mín þegar þau voru lítil, en einhvern veginn lét ég aldrei verða af því að kaupa mér svona vél. 
Þessi er mjög góð, ég hef mikið saumað jersey kjóla á hana undanfarin ár, auk annars. Hún velur sjálf stillingar þegar maður er búinn að segja henni hvernig efni maður notar og hvaða saumur er valinn, svo ég þarf aldrei að eyða tíma í að stilla eitt eða neitt.

Þessa Brother 2340CV þekjusaumsvél hef ég átt í tvö ár.  Mér fannst nú algjör óþarfi að eiga svona, enda gat overlock vélin saumað þekjusaum líka, bara svolítil vinna að breyta henni fyrir það, enda nennti ég því sjaldan.
En svo ákvað ég bara að láta hana eftir mér, enda fékk ég hana með góðum afslætti á saumavéladögum hjá Pfaff, og nota hana til að falda.  Lúxus, en hún gleður mig.


Eldri vélar

 Þetta var fyrsta saumavélin mín, Singer futura.

Við mamma fórum á heimilissýningu í Laugardalshöll árið 1980, (munið þið eftir þeim?), sáum þessa vél og urðum svo hugfangnar að mamma hjálpaði mér að kaupa hana, enda var ég í skóla og átti ekki mikla peninga. Hún var dýr, kostaði hálfa milljón fyrir myntbreytingu, og var seld í Fálkanum að því að mig minnir.  Mér hefur alltaf skilist að þetta hafi verið fyrsta elektróníska saumavélin á markaðnum.  
Þessi vél hafði alveg ótrúlega marga flotta fídusa, eins og til dæmis það að ekki þurfti að taka spóluna úr til að fylla á hana, heldur spólaði hún með spóluna á sínum stað, í gegnum nálina.  Hnappagötin voru sjálfvirk, og hægt að endurtaka nákvæmlega eins hnappagat og það fyrsta, og hún mældi sjálf stærðina eftir tölunni, sem maður setti aftast í fótinn.
Þessa vél notaði ég í 22 ár, eða þar til móðurborðið gaf sig og of dýrt var að skipta um. Öll þessi ár var ég svo ánægð með vélina, að ég spáði ekkert í aðrar saumavélar. 
Vélina á ég ennþá, enda finnst mér hún vera antík.


 Þegar Singer vélin gaf sig voru góð ráð dýr, og ég þurfti að finna nýja vél í hvelli. Eftir að hafa skoðað það sem var í boði keypti ég Husqvarna Lily 545 í Völusteini, sem þá var með umboðið.  Þar með varð ég ástfangin af Husqvarna, og hef verið það síðan.  Hún var æði, ég var farin að sauma meira af bútasaum, og ég gat boðið henni alls konar tvinna í fríhendisstungu, hún réði við allt. Ég átti hana í sjö ár, en þá fannst mér tími til kominn að uppfæra hana og leita að nýrri vél, sem hentaði betur í bútasauminn. Vinkona mín keypti hana af mér og er nýhætt að nota hana.


 Einhvern tíma rétt eftir áramótinin 2009 sá ég þessa vél auglýsta í norsku blaði, og þar með var teningunum kastað.  Vinkona mín og ég fórum niður í Pfaff þegar vélarnar voru rétt nýkomnar í hús og keyptum hvor sína vél. Pfaff quilt expression 4.0 var þvílík bylting þegar ég fékk hana.  Armurinn var stór, sjálfvirkar þráðklippur, fullt af skrautsporum, hægt að stilla allt mögulegt inni í vélinni. Ég saumaði mikið á hana, og hún var full af skemmtilegum fídusum.
Maðurinn minn smíðaði borðið, sem er á myndinn fyrir ofan, svo ég gæti stungið í vélinni á sléttum fleti.  Það virkaði mjög vél.  Svo seldi ég hana.


 Mig var farið að langa aftur í Husqvarna vél. Ýmsar ástæður voru fyrir því, en ein er sú að mér finnst svo gott að geta sett góðan yfirflytjara á vélina. Árið 2016 keypti ég þessa á saumavéladögum í Pfaff. Sapphire 965Q er æðisleg vél, og mjög auðveld í notkun, flottur snertiskjár sem mjög auðvelt er að rata um, allt mjög aðgengilegt og augljóst og svo er hún mjög kröftug, saumar gegnum mörg lög eins og ekkert sé. Hún er að mörgu leyti svipað upp byggð og Epic vélin mín, þannig að af því ég kunni á hana þá var lítið mál að byrja að nota Epic vélina.
En nú var ég búin að sjá Epic 980Q vélina, og það varð ekki aftur snúið.  Eftir að hafa átt hana í tæp tvö ár keypti sama vinkona mín hana af mér og hafði keypt Husqvarna Lily vélina mína!


Svo í lokin má ég til með að sýna The Eldredge E vélina mína, sem ég hef reyndar aldrei saumað á, þarf að prófa það einhvern tíma. Hana færði yngri bróðir minn mér árið 2011 þegar hann heyrði að mig langaði svo í gamla saumavél upp á punt. Hann vissi þá að gamalli vél uppi á háalofti í húsi foreldra okkar, fann hana og gaf mér.  Sennilega er hún frá látinni föðursystur okkar.

Uppfært: svo allt sé nú satt og rétt, þá er tengill hér á bloggfærslu þar sem ég segi m.a. frá enn einni saumavélinni, sem ég er búin að kaupa.

sunnudagur, 30. september 2018

Gammósíur - Hulltights

Þetta eru gammósíur handa ömmustelpunum þremur.
Uppskriftin er ur Klompelompe - Sommerbarn.
Ég prjónaði úr Klompelompe tynn merinoull, og stærðirnar eru á 4 ára (þessar lillabláu) og þær minnstu á 2 ára. 

Svo voru allar merktar stelpunum 💕

miðvikudagur, 26. september 2018

Enn eitt afgangateppið


Ég hef verið dugleg undanfarin misseri að sauma úr afgöngum, litlum bútum sem safnast saman á mörgun árum. Ég byrjaði í bútasaum fyrir meira en þrjátíu árum, svo mikið hefur fallið til,enda hendi ég ekki neinu.
Mér finnst líka svo gaman að sitja við saumavélina og sauma og sauma, og þurfa ekki að hugsa of mikið um það sem ég er að gera.
 

Þetta er fjórða afgangateppið sem ég hef nýlokið við (eitt hef ég aldrei sýnt), og nú er mjög lítið eftir af litlum bútum hjá mér. 
Ég sneið tveggja tommu ferninga, og raðaði ljósum og dökkum til skiptis.
Vattið innan í er líka allt samansaumaðir bútar, ég rétt náði að hafa það nógu stórt, en kláraði líka restar þar.

föstudagur, 21. september 2018

Verkefnataska


 Aftur er ég búin að sauma verkefnatösku.
Þessi er nokkuð stór, og kemst uppskriftarbæklingur í A4 auðveldlega ofan í hana.

 Hún fór í notkun um leið og hún var tilbúin.

þriðjudagur, 18. september 2018

Klompelompeföt á Baby Born

Fyrir þriggja ára afmæli eldri ömmustelpnanna tveggja í sumar prjónaði ég föt á dúkkurnar þeirra.
Uppskriftirnar eru úr Dukkestrikk 15 opskrifter frá Klompelompe.
Bókina pantaði ég af síðunni þeirra frá Noregi.
Það skemmtilega við þessi dúkkuföt er að stelpurnar eiga eins föt sjálfar, bæði peysurnar og lambhúshetturnar, sem eru enn í notkun, og hafði ég dúkkufötin í sama lit og fötin þeirra.

fimmtudagur, 30. ágúst 2018

Skokkar


Nú eru ömmustelpurnar mínar búnar að fá skokk í afmælisgjöf, en þær áttu allar afmæli í sumar.
Uppskriftin heitir Tankestreg, og fæst hún í Litlu Prjónabúðinni, og sömuleiðis garnið, sem heitir Geilsk bomuld og uld.
Blái skokkurinn er í 2 ára stærð, og hinir 4 ára.
Bæði uppskriftin og garnið gerðu það að verkum að mjög gaman var að prjóna þá.

mánudagur, 20. ágúst 2018

Litlar töskur

Ég saumaði þessar litlu töskur handa litlu ömmustelpunum mínum þremur.
Þær þurfa oft að taka ýmislegt með sér þegar þær eru á ferðinni.
Útfærslan er upp úr sjálfri mér. 
Aðalverkefnið var að finna efni í allar sem var með sama heildarsvip.
Tölurnar fékk ég í Gallery Spuna, en efnin eru keypt í Virku og Storkinum.


föstudagur, 27. júlí 2018

Lykkja

Mig langaði að prófa að nota Drops Air í peysu á mig, og prjónaði þessa í sumar.
Garnið er mjög létt og þægilegt. Ég var með prjóna nr. 6, en garnið er gefið upp fyrir nr. 5.

Uppskriftin heitir Lykkja og er í Prjónafjöri. 
Ég aðlagaði síddina reyndar að mínum smekk.

mánudagur, 16. júlí 2018

Bionic Gear Bag

Þá er ég búin að sauma þriðju Bionic Gear Bag töskuna.
Þessa ætla ég að eiga því ég átti enga sjálf.
Litavalið er kannski full skrautlegt fyrir mig, en ég átti nokkra búta af efnum frá Kaffe Fassett og Amy Butler, og langaði að láta þau verða að einhverju.
Ytra byrðið er hins vegar úr Virku.

laugardagur, 14. júlí 2018

Húfur


Þetta er húfan Glóð, sem ég prjónaði á rúmlega eins árs sonardóttur mína. 
Garnið heitir Lark og er úr Litlu prjónabúðinni.
Ég gerði líka svona húfur á eldri stelpurnar tvær og hafa þær verið mikið notaðar.

Könglahúfuna prjónaði ég á litla frænku sem varð sex ára í vor. 
Ég prjónaði hana úr Drops Lima, frá Gallery Spuna.
Í uppskriftinni stendur að nota eigi Nepal, en það er alltof gróft, hef reynt það en það gekk ekki. Hins vegar verða þær æðislega fínar og passlegar úr Lima.

sunnudagur, 8. júlí 2018

Skírnargjöf

Lítill vinur, sem tengist mér fjölskylduböndum, var skírður um hvítasunnudag.
Af því tilefni prjónaði ég þessar flíkur á hann.
Allar uppskriftirnar eru úr Klompelompe bókunum.
Garnið er Drops baby merino, og í lambhúshettuna notaði ég með því Drops merino extra fine.
Peysan og vestið eru á eins árs, en lambhúshettan á 6 mánaða.

fimmtudagur, 21. júní 2018

Halla


Margar af peysunum mínum eru frekar síðar.
Núna vantaði mig styttri peysu undir hjólajakkann og útivistarjakkann. Það veitir ekki af að vera vel klæddur þó það sé sumar.

Uppskriftin af þessari peysu heitir Halla og er í Prjónafjöri 2.
Ég notaði Karisma frá Drops í staðinn fyrir léttlopa sem gefinn er upp.