Heildartala yfir síðuflettingar

Sýnir færslur með efnisorðinu Bollamottur. Sýna allar færslur
Sýnir færslur með efnisorðinu Bollamottur. Sýna allar færslur

fimmtudagur, 19. júní 2025

Húsdýr


 Það er svo margt til hjá Kreative Kiwii sem gaman er að vinna í útsaumsvélinni. Ég féll alveg fyrir þessum kisum sem eru í rauninni bollamottur en geta líka verið bókamerki eða bara hvað sem er. Þær fóru til barnabarnanna enda búa þau á kattaheimilum.


Svo freistaðist ég til að sauma restina af bústofninum, gat ekki skilið þessi eftir.


Hér eru þau svo öll samankomin. Þette er mjög fljótlegt og skemmtilegt verkefni og fæst eins og áður sagði á síðu Kreative Kiwii.

fimmtudagur, 31. október 2024

🎃 👻 Hrekkjavaka 🕷️ 🕸️ 🎃

 

Það er alltaf svolítið gaman að gera smá hrekkjavökuskraut, sérstaklega þegar maður fylgist með erlendum facebook hópum. Kreative Kiwi er með mjög virkan og skemmtilegan hóp á fésinu og þar fær maður hugmyndir. Þessi graskersstæða kemur í nokkrum stærðum, mín er 45 sm á lengd. Þetta er sama munstur og í færslunni hér aðeins neðar en þar sleppti ég andlitunum.

 

Blýantaskrautið er úr filti. Margar í hópnum saumuðu svona til að gefa börnum, sem von var á að bönkuðu upp á, í staðinn fyrir sælgæti. Ég gaf barnabörnunum mínum fjórum það sem ég gerði, fjögur á mann.


Svo stóðst ég ekki þessar sætu vofur. Þær eru bókamerki, en ég setti líka lykkju efst.


Önnur útgáfa af graskerjunum, stök í mörgum stærðum, alveg upp í diskamottustærð.


Svo bætti ég fjórum laufblöðum eftir að ég var búin að sýna fimm önnur neðar á síðunni. Læt þau fljóta hér með.


Að lokum skelli ég líka þessu hjarta með, sem ég saumaði fyrir tæpum tveimur árum en hef aldrei sett hér inn á bloggið. Þá var ég nýbúin að eignast MySewnet forritið og var að prófa allt mögulegt skemmtilegt, þar á meðal þetta. Það er sem sagt hægt að setja texta inn í margvísleg form, ég valdi hjartað. Svo raðast orðin á ýmsan hátt með ýmsum leturgerðum, og þegar maður er ánægður með það sem maður sér er vinnan fólgin í að teygja og toga stafina þannig að orðin fylli upp í flötinn. 
Að sjálfsögðu valdi ég nöfnin á litla uppáhaldsfólkinu mínu. 

fimmtudagur, 10. október 2024

🍂 Haust 🍁


Ég hef gaman af því að skreyta smávegis eftir árstíðum. Þetta haustföndur varð til í útsaumsvélinni. Haustlitirnir í efnunum skila sér ekki alveg í útibirtunni, eru í rauninni dýpri og hlýrri.
Lengjan er um 45 cm, en hún kemur í styttri og nokkrum lengri útgáfum í munstrinu.


Hún er gerð í fjórum skrefum þar sem þarf að tengja allt saman jafnóðum.


 Svo saumaði ég nokkur laufblöð í tveimur stærðum, koma stærri líka. Þessi eru fín sem glasamottur eða bara til að fleygja á borð til að skreyta.  Bæði munstrin eru frá Kreativ Kiwi.

þriðjudagur, 7. nóvember 2023

Bláar bollamottur

Ég hef átt bolla og hliðardiska úr pólska stellinu vinsæla í fjölda ára og notað það mikið. En það hefur samt alltaf pirrað mig aðeins að ekki skuli fylgja undirskálar. Ég reyndi að bæta úr því og tíndi saman öll bláu efnin mín sem höfðu í sér munsturlitina úr því pólska, þ.e. grænt, gult og dökkrautt, og saumaði nokkrar bollamottur til að nota með bollunum. 

Geymi svo motturnar í sömu skúffu og leirtauið til að gleyma nú ekki að nota þær.

Munstrið er frá Kreativ Kiwi og er gert alfarið í útsaumsvélinni.
 

mánudagur, 28. ágúst 2023

Bollamottur

Eins og ég hef áður skrifað hér þá notum við mikið mottur undir bolla og krúsir hér á heimilinu. Ég bætti í safnið um daginn og saumaði fleiri. Þessar má líka nota sem gólfmottur á heimili Barbie, það alla vega gert hér þegar ömmustelpurnar koma hingað. Motturnar eru alfarið saumaðar í útsaumsvélinni. 

Ég skellti saman tveimur munstrum. Mottan sjálf er upprunalega með texta sem ég sleppti en setti þess í stað þessar myndir af Sunbonnet Sue, sem ég hef alltaf verið hrifin af. Ég minnkaði myndirnar um 20% svo þær pössuðu.


 Bæði munstrin, þ.e. motturnar og myndirnar, eru fríar á síðu Kreative Kiwi. Hugmyndin er ekki mín heldur fékk ég hana frá konu sem er í fb hóp Kreative Kiwi.

fimmtudagur, 24. febrúar 2022

Kaffiálfur

Ég sá mynd af þessum álfi í íslenskum vélsaumshóp á Facebook og ákvað að þennan yrði ég að eignast. Ég keypti munstrið, en gekk illa að sauma það út, og gafst að lokum upp.

Þá rakst ég á hann í erlendum vélsaumshóp þar sem hann var keyptur annars staðar frá, á Etsy, og keypti ég hann þar. Og viti menn, hann saumaðist svona glimrandi vel út. Nú er hann á borði við stólinn þar sem ég fær mér morgunbollann og býður mér góðan daginn.


 Svo passar hann svo vel við bollana mína sem eru frá Ingu Elínu. Litlu hlutirnir í lífinu skipta máli ☕️


laugardagur, 30. nóvember 2019

Glasamottur


Ég nota glasamottur út um allt hús eins og áður hefur komið fram, og nú eru ömmustelpurnar farnar að sýna þeim áhuga. 
Ég greip þess vegna tækifærið og fann þessar myndir í útsaumsvélinni minni góðu.
Ég saumaði í hörefni frá Ikea og rósótta efnið er frá Tilda.
Kemur mér mikið á óvart hvað ég hef gaman af að nota útsaumsvélina, hélt að ég kæmist aldrei á þann stað. 


fimmtudagur, 31. október 2019

Hrekkjavökubollamottur


Ég er nú ekki mikil hrekkjavökukona, en freistaðist samt til að föndra aðeins í tilefni hrekkjavökunnar.
Munstrin í mottunum hér fyrir ofan komu með Pfaff creative 1.5 útsaumsvélinni minni, og ég varð að prófa þau. Mikið var gaman að sauma þau út, og til að myndirnar yrðu að einhverju, þá bjó ég til bollamottur.


Í fyrra gáfu þau hjá Husqvarna eigendum Epic saumavéla graskerssporið, ég hlóð því niður af netinu.  Í ár fengum við svo kóngulóarsporið, og þessi spor saumaði ég núna í bollamottur líka.


Svo á ég EQ8 bútasaumsforritið, og þar er fullt af hrekkjavökusniðum.
Ég valdi nokkuð sakleysislegt grasker, og saumaði með pappírssaum.
Ég saumaði það reyndar fyrst og varð þessi motta minnst, hinar þurftu svo að vera stærri út af útsaumnum, sem þurfti meira pláss. Pirrar mig aðeins að allar séu ekki jafn stórar, en það verður að hafa það.
 

mánudagur, 18. febrúar 2019

Bollamottur


 Af því ég á bara einn ramma í útsaumsvélina ennþá, þann stærsta, þá verður stundum afgangs pláss í rammanum til að bródera meira í.
Þegar ég var að applíkera í hörinn sem ég sýndi í síðustu færslu, setti ég líka þessi blóm neðst í rammann, til að nýta efnið.

Og blómin urðu að bollamottum.
Ég nota  mikið svona mottur, þær eru út um allt hús hjá mér.

miðvikudagur, 14. maí 2014

Bollamottur í rauðu og hvítu

 


Nú er ég búin að sauma meira "redwork", bollamottur í þetta sinn.

Mér finnst ótrúlega gaman að gera þetta í saumavélinni, miklu skemmtilegra en í höndunum.

Einhvern tíma fyrir löngu keypti ég á Amazon bók, með þessum munstrum.

Ég get vel hugsað mér að gera meira af þessu og er þegar komin með hugmyndir ;).

 

miðvikudagur, 27. nóvember 2013

Jólabollamottur

Fyrir tveimur árum saumaði ég tvær bollamottur, og er færslan um þær hér. Nýlega bætti ég við fjórum í viðbót. Varð pínu svekkt því þessar voru örlítið minni en hinar (örugglega bara ég sem sé það), en ég var með nokkur eintök í tölvunni og hef greinilega ekki prentað út sama snið og síðast.

 

fimmtudagur, 11. apríl 2013

miðvikudagur, 27. júní 2012

Könnumottur - mug rugs og "give away" hjá LeKaQuilt

Nú er ég búin að sauma fjórar könnumottur til viðbótar við þær sem ég átti. Það er gott að eiga nóg af þeim fyrir tefólk eins og okkur, sem berum með okkur tebolla út um allt hús.
Ég nota alltaf sama grunnsniðið, en breyti bara myndum og litum. Þá passa þær allar saman.


LeKaQuilt er með "give away" á blogginu sínu, og er með nokkra hluti sem hún hefur saumað.  Hún er ótrúlega flínk bútasaumskona, og er mjög dugleg að applíkera í höndum.  Endilega skoðið bloggið hennar.

  Hér er slóðin : http://lekaquilt.blogspot.com/

föstudagur, 30. desember 2011

Jólakönnumottur

Ég hafði nú hugsað mér að sauma svona könnumottur fyrir jól, en gerði þær í gær. Ég er líka hætt að miða alltaf við næstu jól, það koma jól á hverju ári, og hlutirnir fá bara sinn tíma til að klárast.
Ég fór eftir sniði frá Elínu Guðjónsdóttur, en af því mig langaði fyrst að búa til svona litlar mottur, þá teiknaði ég blokkina upp í EQ7, og saumaði með pappírssaumi í minni stærð en uppgefnar eru hjá henni. Svo notaði ég nokkur af þeim 222 sporum sem eru í dásamlegu saumavélinni minni, og eru þá 3 leturgerðir ekki taldar með. Þó maður noti kannski svona spor ekki mikið, þá segi ég eins og góð kona sagði: Ég vil frekar hafa öll þessi spor og þurfa aldrei að nota þau, heldur en að hafa þau ekki og þurfa á þeim að halda. Ég valdi jólalegustu mótífin.
Sniðið hennar Elínar fæst í Quiltkörfunni í Faxafeni.

mánudagur, 22. ágúst 2011

Mug Rug

Þessa könnumottu saumaði ég eftir pöntun. Þetta er bara önnur mottan sem ég sauma, en sú fyrri hefur verið í daglegri notkun síðan hún var saumuð. Gerði þessa eftir sama formi og hina í EQ7 en skipti bara um mynd.

sunnudagur, 26. desember 2010

Mug Rug

Settist loksins niður við saumavélina. Þessar litlu mottur hef ég séð um allt á bloggunum undanfarið. Þær eru kallaðar Mug Rugs, og eru til í alls konar útfærslum. Ég "gúgglaði" með myndaleit áðan, og sá margar.
LeKaQuilt hefur saumað margar undanfarið, allar mjög flottar hjá henni. Mig vantaði einmitt mottu undir tebollann sem ég drekk í stofunni á kvöldin, svo nú er það mál leyst.
Ég notaði auðvitað EQ7 forritið mitt til að teikna í rétt mál, og prentaði eplið út og saumaði í pappír. Svo gerði ég nokkrar aðrar útgáfur, sem ég nota sauma kannski seinna. Mottan mín varð 6 x 9 tommur.