Litlar hosur

 

Þrjú pör af ungbarnahosum, stærð 0 - 4 mánaða. Fínt að grípa í svona smáprjón þegar horft er á sjónvarpið á kvöldin. Uppskriftin er úr bókinni Sokkaprjón, en ég notaði fínni prjóna en gefið er upp, ég prjónaði á prjóna no. 2,5.

 

Posted with Blogsy

Inga - dömupeysa

Þessa peysu prjónaði ég um páskana.  Uppskriftin er í nýjasta tölublaði Húsfreyjunnar.  Hún er prjónuð úr tvöföldum plötulopa á prjóna nr. 5,5.  Sniðið er skemmtilegt því hún er aðsniðin í mittið.

Ég hafði mína gráa í stað svartrar og þurfti því að endurraða litunum í munstrinu aðeins, en ég er ánægð með útkomuna.  Svo bætti ég við smá kraga.

Lopapeysa á Baby Born

Þessi peysuuppskrift er úr bókinni Prjónað úr íslenskri ull.  Hún er úr léttlopa, og ég notaði mest afganga.  Uppskriftin heitir Dísa.

Blár ungbarnakjóll

Nú er orðið langt síðan ég hef sett nokkuð hér á bloggið, enda hefur ekki verið mikið að sýna. Allur tími og orka hefur farið í búferlaflutninga okkar hjóna. Ég náði þó að prjóna þennan kjól á minnstu frænkuna mína, hana Salvöru Veigu, sem varð eins árs þann 5. mars. Uppskriftin er úr Prjónablaðinu Ýr, úr blaði nr. 42.

Ég tók líka upp saumavélina til að sauma gardínur fyrir stofuna, fimm lengjur. Það var voða gott að sauma dálítið aftur. Nú erum við á fullu við að koma okkur fyrir á nýju heimili og nýtt saumaherbergi er að taka á sig mynd.

GLEÐILEGA PÁSKA!

 

Posted with Blogsy

Viðurkenning

Hún Anneli, sem er með bloggsíðuna Annelis hantverk, var svo hugguleg að senda mér viðurkenningu á blogginu sínu. Kærar þakkir, Anneli!! Ég hvet ykkur, sem lesið síðuna mína, að kíkja í heimsókn til hennar. Hún skrifar um ýmislegt auk handavinnu og tekur mjög fallegar myndir.

Tusen takk, Anneli, for denne award!!

Þæfð karfa og bókakaup

Ég er löngu búin að kveðja jólin, en átti samt eftir að sýna þessa þæfðu körfu, sem ég prjónaði fyrir jól. Uppskriftin er af Drops jóladagatalinu og notaði ég tvöfaldan plötulopa en fór að öðru leyti eftir uppskriftinni. Ég þurfti reyndar að þvo körfuna þrisvar til að fá hana í góða stærð. Lopinn var fallega jólarauður, sérlitaður fyrir Handprjónasambandið.

Svo lét ég verða af því að fá mér þessa bók. Hún er mjög falleg, og mér finnst mjög gaman að prjóna kúlur. Ég pantaði hana á Amazon í Bretlandi. Hún var fljót að skila sér og kostaði ekki nema 3400 krónur, komin í mínar hendur. Hlakka til að prjóna upp úr henni.

Svo ætla ég líka að sýna þessa bók. Hana pantaði ég líka af Amazon í Bretlandi og kostaði hún 1830 kr. Í henni er fullt af teppum, sum flokkuð eftir þjóðernisstíl.

Þetta er samt teppið sem olli því að ég keypti bókina, teppi í sænskum sveitastíl. Ég VERÐ að hekla það.

Jólakönnumottur

Ég hafði nú hugsað mér að sauma svona könnumottur fyrir jól, en gerði þær í gær. Ég er líka hætt að miða alltaf við næstu jól, það koma jól á hverju ári, og hlutirnir fá bara sinn tíma til að klárast.

Ég fór eftir sniði frá Elínu Guðjónsdóttur, en af því mig langaði fyrst að búa til svona litlar mottur, þá teiknaði ég blokkina upp í EQ7, og saumaði með pappírssaumi í minni stærð en uppgefnar eru hjá henni. Svo notaði ég nokkur af þeim 222 sporum sem eru í dásamlegu saumavélinni minni, og eru þá 3 leturgerðir ekki taldar með. Þó maður noti kannski svona spor ekki mikið, þá segi ég eins og góð kona sagði: Ég vil frekar hafa öll þessi spor og þurfa aldrei að nota þau, heldur en að hafa þau ekki og þurfa á þeim að halda. Ég valdi jólalegustu mótífin.

Sniðið hennar Elínar fæst í Quiltkörfunni í Faxafeni.

Theodóra á peysufötum

Þessa dúkku, hana Theodóru, prjónaði ég í haust að mestu, en átti svo eftir alls konar smáfrágang, sem ég var að ljúka við í dag.

Undir peysufötunum er hún í klukku og nærbuxum. Ég átti klukku þegar ég var pínulítil, og man eftir því.

Þetta eru peysufötin, og í skónum eru meira að segja íleppar! Dúkkan og flest fötin eru prjónuð úr léttlopa, en skór og sokkar, ásamt íleppunum, eru úr einbandi. Uppskriftin er keypt hér.

Prjónaskapur af ýmsu tagi

Hún Úlfhildur Sjöfn, litla frænka mín, varð 4 ára þann 10. desember, og þá færði ég henni þessa lopapeysu. Uppskriftin er á heimasíðu Ístex.

Litla systir hennar, Salvör Veiga, þurfti að fá jólasveinahúfu til að vera eins og stóra systir. Ég prjónaði eins húfu á Úlfhildi Sjöfn fyrir tveimur árum. Uppskriftin er hér.

Þegar ég var búin að prjóna alla sokkana hér að neðan úr afgöngum af léttlopa, sem safnast reglulega upp hjá mér, náði ég að prjóna þetta teppi með Dómínó aðferðinni, og kláraði fullt af litlum hnyklum. Ég gerði ekki kant, því ég er að hugsa um að geyma það og bæta við það seinna þegar meiri afgangur safnast upp. Það eiga að vera takkar kringum teppið.

Þessi 12 sokkapör ásamt 7 öðrum, samtals 19 pör af sokkum á tveggja, fjögurra og sex ára, setti ég í verkefnið Jól í skókassa sem KFUM og K heldur utanum hvert ár.

Svo datt ég í jólakúluprjón og er búin að prjóna 12 kúlur. Ég prjóna eftir uppskrift frá Prjóna Jónu, sem er að finna á Facebook síðu hennar. Ég nota léttlopa og prjóna no. 4. Ég fékk þennan fallega jólarauða lit í Handprjónasambandinu, en mér skilst að þetta sé sérlitað fyrir það og bara selt þar. Það er með fleiri liti sem Ístex sérlitar fyrir það.
Ég hengi kúlurnar neðan í hringstigann okkar.

Loks er hér mynd af prjónuðum umbúðum utan um pakka, sem ég fór með á jólahlaðborð í vinnu mannsins míns. Þar var pakkaleikur, og sú sem fékk þennan var mjög ánægð með hann og það staðfesti fyrir mér að fólki finnst vænt um að fá handunna hluti.

 

Posted with Blogsy