Ullarsokkar

Ég er búin að gatslíta ullarsokkum sem ég prjónaði í hittifyrra, og þurfti því að draga fram garn og prjóna og gera fleiri sokka. Ég notaði bara afganga, og réði það litavalinu að mestu. Þessir að ofan eru úr léttlopa og einbandi, prjónuðu saman.

 

Sokkarnir hér að ofan eru prjónaðir eftir sömu uppskrift og þeir gatslitnu, úr léttlopa.

Mér finnst langbest að nota svona lopasokka í gönguskóna.

Ég er að verða búin að prjóna þriðja parið. Allar uppskriftirnar eru úr bókinni Sokkar og fleira eftir Kristínu Harðardóttur. Sú bók er í miklu uppáhaldi hjá mér.

 

Posted with Blogsy

Log cabin borðmottur

 

Ég saumaði þessar borðmottur handa okkur hjónunum til að nota dags daglega, og hafði þær þess vegna bara tvær.

Ég notaði pappírssaum í blokkirnar, alltaf áhyggjulaust að láta allt passa með honum. Prentaði út úr EQ7 eins og venjulega.

 

Posted with Blogsy

Little sister's dress

 

Þennan kjól prjónaði ég á yngstu frænkuna mína, Hrafnhildi Sjöfn. Hún er átta mánaða, og ég hafði stærðina á eins árs. Ég notaði Rauma babygarn úr Fjarðarkaupum.

Uppskriftin er hér.

 

Posted with Blogsy

Símahulstur

 

Mig vantaði hulstur utan um nýja símann minn, og fann ágætis snið á netinu. Efnið er ég búin að eiga lengi, en hef ekki fundið því hlutverk fyrr en nú.

Hér er hægt að skoða sniðið.

 

Posted with Blogsy

Kringlóttur dúkur

Mig vantaði kringlóttan dúk á hringlaga borð.

Um jólin var ég með hringlaga jóladúk á þessu borði, og fór hann svo vel að nú finnst mér ég verði að hafa dúk á því.

Sniðið fann ég í EQ7.

 

Posted with Blogsy

Jólalegt lúruteppi

 

Þetta er teppi, sem ég kláraði milli jóla og nýárs, en ætlaði að hafa tilbúið fyrir jól. Það má því segja að ég sé snemma í því fyrir næstu jól. Blokkirnar eru fengnar úr EQ7, og ég notaði að mestu rauð og græn efni sem ég átti, sömuleiðis ljósu efnin.

Ég stakk í saumfarið kringum allar rauðu blokkirnar og svo fríhendis utan um, og á grænu blokkirnar notaði ég krákustíg.

Hér hef ég lagt teppið yfir stólbak, en það má líka hengja það upp. Ég sauma aldrei slíður aftan á teppi til að hengja þau upp, heldur festi ég litla búta með títuprjónum efst á þau, og þá get ég fínstillt slíðrin. Svo vil ég geta notað teppin á mismunandi hátt, t.d. skelli ég veggteppum sem dúkum á borð og öfugt.

 

Posted with Blogsy

Jólin koma

Ég hef ekki getað hætt að prjóna jólakúlurnar, og er búin með 80 stykki núna. En nú prjóna ég úr einbandi, og hér að ofan eru kúlur í þremur stærðum. Þær stærstu eru prjónaðar úr kambgarni á prjóna nr. 3, og framan við þær eru kúlur prjónaðar úr einbandi á prjóna nr 2. Fremstu kúlurnar eru úr sama garni og með sömu prjónastærð, en þær prjóna ég mjög fast og hengi á jólatré.

 

Svona lítur forstofuglugginn út.

Svona jólatré var á heimili foreldra minna þegar ég var að alast upp. Þetta tré fékk ég úr búi tengdaforeldra minna, og á það hengi ég bara heimagert skraut, og hef það í holinu.

Gleðileg jól!

 

Posted with Blogsy

Lambhúshetta

 

Fyrr í haust prjónaði ég þessa lambhúshettu á sjálfa mig. Ég notaði kambgarn og mohair, einn þráð af hvoru.

Uppskriftin er úr Lopa 32, og er þar prjónað úr léttlopa. Prjónafestan reyndist sú sama hjá mér og þeirri sem gefin er upp í bókinni.

 

Posted with Blogsy

Jólakúlur a là Arne&Carlos

Undanfarið hef ég verið að prjóna jólakúlur upp úr bók þeirra Arne og Carlos, Julekuler. Ég pantaði mér hana á ensku í byrjun árs, en var ekkert farin að prjóna upp úr henni þar til nú.

Og þegar maður er byrjaður er ekki hægt að hætta. Ég er búin að prjóna allar 55 uppskriftirnar, og gerði tvær aukalega af einni þeirra. Ég set ekki lykkju í þær strax, mér finnst fallegt að láta þær liggja nokkrar saman í skál eða körfu o.s.frv. Ég notaði kambgarn og prjóna nr. 3, og fyllti þær með ullarkembu eins og höfundarnir mæla með.

Rúsínan í pylsuendanum er svo sú að mér gafst tækifæri til að hlusta á fyrirlestur þeirra í Norræna húsinu fyrir rúmri viku, þar sem þeir voru hér á landi til að fylgja eftir íslenskri þýðingu á bókinni. Ég keypti íslensku bókina þótt ég ætti hana á ensku, og fékk áritun hjá þeim á báðar bækurnar.

Posted with Blogsy