Saumaherbergið 5 ára

 

Bloggið mitt varð 5 ára á laugardaginn, 25. janúar. Af því tilefni ákvað ég að setja inn nokkrar myndir af saumaherberginu. Eiginmaðurinn hannaði og smíðaði þetta borð handa mér til að fella vélina niður í.

Þetta er fyrsta saumavélin, sem ég eignaðist, rúmlega tvítug, Singer futura. Hún var fyrsta tölvustýrða saumavélin á markaðnum. Hún var alveg frábær og með ótrúlega flotta fídusa. Ég notaði hana þar til hún gaf sig.

Einu sinni kom ég öllum handavinnubókunum fyrir í þessum skáp, en get það ekki lengur.

 

Hér stendur svo overlockvélin mín, ávallt reiðubúin.

Þetta sníðaborð smíðaði minn heittelskaði líka handa mér.

 

Hér geymi ég svo megnið af bútasaumsefnunum.

Þetta er annað saumaherbergið sem ég eignast. Hið fyrra var teiknað sérstaklega fyrir mig þegar við byggðum við heimili okkar árið 2004. Fyrir tveimur árum fluttum við, og þá fékk ég annað barnaherbergið í húsinu, og húsbóndinn hitt.

 

Posted with Blogsy

Sokkar

Þessi sokkapör prjónaði ég handa annarri tengdadóttur minni. Bláu sokkarnir eru prjónaðir úr Drops Merino extra fine, uppskriftin er hér.

Þeir röndóttu eru úr ullar/bómullarblöndu sem heitir Hot Socks, og fæst í Föndru eins og Merino garnið. Uppskriftin er innan á miðanum á Fabel garninu, fín uppskrift, sem ég hef prjónað nokkrum sinnum áður. Þeir eru reyndar gráir, en virðast bláir á myndinni.

 

Posted with Blogsy

Ugluhúfa

 

Ég á lítinn, sex mánaða frænda, sem langaði svo í ugluhúfu, svo frænka varð að hekla húfuna handa honum. Ég studdist við þessa uppskrift, en fór eftir stærstu stærðinni, varð bara að prófa mig áfram. Garnið er Tuva og heklunálin nr. 5 í húfunni en 4 í augum, eyrum og gogg.

 

Posted with Blogsy

Gleðilegt ár!

 

Posted with Blogsy

Tvíbandavettlingar

 

Þessi fjögur vettlingapör setti ég í jólapakkana handa sonum mínum og tengdadætrum.

Þeir eru prjónaðir úr kambgarni, og eru uppskriftirnar úr Vettlingabókinni eftir Kristínu Harðardóttur.

Bókin er mjög flott, og þarna útbýr Kristín uppskriftir að vettlingum sem eru byggðar á gömlum vettlingum sem hafa varðveist.

 

Posted with Blogsy

Geðileg jól!

 

Posted with Blogsy

Hjartaklútar

Það er spurning hvort maður eigi að setja allt á bloggið sem telst til handavinnu, ég geri það ekki, en ákvað að leyfa þessu að fara.

Ég nota svona klúta stöðugt, og eru þessir prjónaðir úr afgöngum. Munstrið lærðist strax, svo þetta varð fínt sjónvarpsprjón.

Hér kemur hjartað út í sléttu prjóni.

Munstrið er úr þessu 32 ára prjónamunsturblaði. Ég fitjaði upp 57 lykkjur, þá fékk ég 5 munstur á lengdina, og 6 raðir upp.

 

Posted with Blogsy

Hekluð bjöllusería úr Heklbók Þóru

Fyrir nokkrum vikum heklaði ég nýja bjölluseríu, og fór eftir uppskrift úr Heklbók Þóru. Uppskriftin er mjög þægileg að hekla.

Seríuna gerði ég til að hengja upp í saumaherberginu mínu. Hér fær hún selskap af jólakúlum Arne&Carlos yfir jólin, en sjálf fær hún að hanga þarna lengur.

Og hér sést inn um gluggann á Saumaherbergi Hellenar ;)

 

Posted with Blogsy

Jólabollamottur

Fyrir tveimur árum saumaði ég tvær bollamottur, og er færslan um þær hér. Nýlega bætti ég við fjórum í viðbót. Varð pínu svekkt því þessar voru örlítið minni en hinar (örugglega bara ég sem sé það), en ég var með nokkur eintök í tölvunni og hef greinilega ekki prentað út sama snið og síðast.

 

Posted with Blogsy