Vinterkonglegenser

Leikskólapeysa á 4 ára ömmustelpu.

Uppskriftin er í Klompelompe strikk aret rundt.

 

Ég prjónaði stærð fyrir 4 ára, og passar peysan vel, aðeins rúm en ekkert meira.

Garnið er Klompelompe Tynn Merinoull, keypt í Rokku.

Baby Born dúkkuföt

Hér er ég búin að prjóna dress á dúkkur ömmustelpnanna þriggja.

 

Þær verða allar að fá eins, að sjálfsögðu.

 

Uppskriftirnar eru allar úr Klompelompes sommerbarn.

Prjónaði flest úr bómullargarni, allt nema peysuna og húfuna á síðustu myndinni, þar notaði ég ullargarn.

 

Það skemmtilega er að öll fötin eru dúkkuútgáfur af barnastærðum af sömu flíkum.

Borðmottur

Við notum mikið svona mottur undir allt mögulegt í eldhúsinu, bæði fyrir matardiska og ýmislegt annað.  Borðplöturnar eru úr eikarlímtré og eldhúsborðið líka, svo okkur finnst gott að hafa eitthvað undir ílátum t.d. með heitum mat.

Sniðið af þessum fékk ég í EQ8 forritinu mínu og saumaði með pappírssaum.

 

Fjölnota innkaupapokar

Í vikunni fór ég upp á háaloft og fann til efni til að sauma úr fjölnota innkaupapoka.

Við notum bara svona poka núna undir matarinnkaup og fleira.

Hef líka látið börnin mín fá svona poka.

Mest eru þetta gardínuefni og svo ein svört saumuð upp úr flík.

Svona pokar eru mjög þægilegir, bara að muna að henda þeim í þvottavél öðru hverju.

 

Rúnni Júl

Ég varð að prófa þessa uppskrift frá knillax.is.

Ömmustelpa, sem verður fjögurra ára eftir sex daga fékk hana.

Einhvern veginn fannst mér ég verða að hafa hana aðeins við vöxt, og fitjaði því upp á fyrir 5 ára stærð.  Hún er því dálítið og stór ennþá, en verður fín á næsta ári.  

Litla daman mín er líka alveg í meðallagi, þannig að hún vex bara í hana í vetur.

 

Uppskriftin gefur manni möguleika á að prjóna aukaumferðir að aftan til að síkka peysuna, en ég sleppti þeim, enda er síddarmunurinn fínn svona.

Ég prjónaði úr Drops Merino Extra Fine. 

Elska að prjóna úr þessu garni.

Keypti það í Gallery Spuna.

Þríhyrningateppi

Enn einu sinni er ég búin að sauma upp úr afgangakössunum mínum.

Ég held að þetta séu ein fimm teppi sem ég hef gert bara með afgöngum, og nú er lítið eftir.

Ég hendi engu, svo afgangar hafa safnast upp í áranna rás.

En mér finnst líka gaman að sauma svona, næstum án þess að hugsa.

Nú get ég farið að snúa mér að efnunum mínum í skúffunum, sem bíða mín samanbrotin og snyrtileg.

Það stóð alltaf til að prófa að gera þríhyrningateppi úr 60° þríhyrningum, því ég á stiku til þess.

Ég skar niður allt sem var nógu stórt, og lét ljóst og dökkt skiptast á.

Það, sem ekki var nógu stórt til að verða að þríhyrningi, skar ég niður í búta sem voru 2,5 tomma á breidd og saumaði saman í bindingu.

Svo skellti ég teppinu á sætisbakið í húsbílnum, bara svo það fengi að njóta sín einhvers staðar.

Önnur Hjartapeysa

Eins og alþjóð veit þá á ég þrjár ömmustelpur. 

Tvær þær eldri eru hér um bil jafn gamlar, fæddar með þriggja vikna millibili (upp á dag, fæddust báðar um kvöld), og verða fjögurra ára í sumar.

Sú þriðja er fædd 2017 og er tveggja ára frá því í maí.

Fyrst eftir að þær eldri fæddust gerði ég allt eins á þær, kannski í mismunandi litum, en flest sambærilegt.

Nú fer ég meira eftir því hvers foreldrarnir óska, prjóna á aðra þeirra og ef hina langar í eins, þá er ekkert annað en sjálfsagt að prjóna líka á hana..

 

Ég prjónaði hjartapeysu á aðra þeirra í vor. Hin fékk að máta, og svo óskaði hún eftir eins peysu, og amma prjónaði hana.

 

Og hér er daman komin í peysuna sína, og finnst mér hún mjög fín í henni.

Stærðin er á 4 ára, garnið Lanett og prjónastærðin 3,0.

Uppskriftin er úr Prjónað af ást.

Skæri

Ég hef alltaf átt góð skæri, ekki of mörg, bara vönduð og þau sem ég þarf.

Ég þurfti ekki að kaupa þessi tvö, mér finnst bara þetta nýja útlit á skærum svo rosalega flott.

Hins vegar eru þau fanta góð, blaðið er rifflað og það er eins og að klippa vatn að nota þau.

 Þau koma frá Karen Kay Buckley, og ég pantaði þau af Drop, sem áður hét Massdrop.

 

Blómavettlingar

Uppskriftina af þessum vettlingum er ég búin að eiga í mörg ár.

Þeir eru prjónaðir úr kambgarni á prjóna nr.2.

Ég á töluvert litaúrval af kambgarnsafgöngum, svo ég þurfti bara að kaupa dökkblátt í aðallitinn.

Í staðinn fyrir að nota grænt í laufblöðin eins og ég hef oftast séð, þá notaði ég gráa liti.

Ég er frekar löt að prjóna vettlinga, en geri það samt öðru hvoru.