Dómínóteppi úr afgöngum

Fyrir nokkrum mánuðum flokkaði ég alla garnafganga vel eftir tegundum og setti í glæra poka. Ég á mikið af ungbarnagarni, og ég tók alla minnstu hnyklana og hafði þá sér og fylltu þeir alveg gráan ikea renniláspoka, eins og maður notar í eldhúsinu. Á aðventunni vantaði mig eitthvað að prjóna og greip þessa afganga og byrjaði að prjóna ferninga með dómínóprjóni, þar sem ekkert þarf að sauma saman. Ég átti nú alveg eins von á að ekkert yrði úr þessu en svona varð útkoman. Þetta er ekki stórt, 70x88 sm, en ömmustelpurnar tóku það til handargagns þegar þær voru hjá mér í vikunni og önnur þeirra lagði sig undir því. Garnið kláraðist alveg, pokinn er tómur, en ég bætti aðeins við rauða litinn í kantinum til að klára.

 

Veski fyrir heyrnartól

Ég hef lengi ætlað að sauma svona veski fyrir símaheyrnartólin. Hver þekkir ekki að hafa heyrnartólin laus í töskunni eða hanskahólfinu í bílnum þar sem þau flækjast í það sem er þar fyrir. Þessi veski leysa málið. Saumaði núna eitt fyrir mig og annað fyrir eiginmanninn. Ég setti hring fyrir lyklakippu á þau en þess þarf ekki. Ég á haug af þessum tólum en setti þau sem ég nota mest í veskið. Læt hér fylgja tengil á myndband sem kennir aðferðina við saumaskapinn.

 

Náttkjólar og dúkkukjólar

Mig langaði að stinga náttfötum í jólapakka ömmubarnanna og þá kom í ljós að tvær af ömmustelpunum mínum, systurnar, vilja bara sofa í náttkjólum núorðið. Þess vegna var bara einfaldast að sauma þá sjálf og notaði ég sama snið og á leikskólakjólnum sem ég skrifaði um í síðustu færslu, Onion 20047. Efnið fékk ég í Föndru, lífræna bómull. Stærri kjólarnir eru í stærð 116 á fimm ára stelpurnar og sá minni í stærð 104 á þriggja ára dömuna. Þær sváfu allar þrjár í kjólunum sínum á jólanótt. Litli prinsinn fékk líka náttgalla en amma keypti hann.

Svo tilheyrði að sauma kjóla á dúkkubörnin í stíl. Sniðið af þeim er úr bókinni Sy og strikk dukkeklær eftir Anne Grethe Gaaserud.

 

Leikskólakjóll

 Í byrjun aðventu saumaði ég þennan kjól á eina ömmustelpuna sem átti “ekkert til að fara í” á leikskólann. Hún hafði nefnilega séð skólasystur sína í kjól sem minnti á jólin og langaði í eitthvað svipað. Pabbinn vildi leysa málið en vissi ekki hvar hann ætti að kaupa kjól og var að auki á kafi í prófum. 

Hann hringdi því í ömmuna sem reddaði málunum í hvelli, keypti efni í Litlu músinni og fékk það með pósti fljótt og vel og útkoman varð þessi kjóll. Ég vildi ekki hafa jólamótíf í munstrinu heldur nota rauðan og hvítan lit til að gera hann jólalegan. Barnaefnin frá Litlu músinni er alveg æðislega falleg og úr lífrænni bómull, meðhöndlaðri án eiturefna.

Sniðið er hið klassíska frá Onion nr. 20047, og stærðin er 116.

Vesti

Þetta verður jólavesti á litla 15 mánaða ömmustrákinn minn. 

Fyrst gerði ég stærð á 12-18 mánaða en það varð alltof lítið á alla kanta. Sennilega hef ég prjónað það of fast, mér hættir til þess. Svo ég prjónaði annað, þetta á myndinni, og notaði stærð á tveggja ára og prjónaði lausar, á alveg von á að þetta smellpassi. Verður fínt með hvítri skyrtu og slaufu.

Ég var svo heppin að eignast lítinn frænda fyrir nokkrum dögum og ætla að klára minna vestið fyrir hann.

Ég notaði tvær dokkur af Drops baby merino.

Uppskriftin er frá Garnstudio.com.

Verkefnataska

Enn ein verkefnataskan orðin til. Ég hef alltaf þörf fyrir þessar undir prjónadót og ýmislegt annað.  Þessi er stór og góð.

Munstrið saumaði ég í útsaumsvélinni minni góðu í hör, og er það eins framan og aftan á töskunni. 

 

Barnasokkar úr Fabel

 Þá eru öll barnabörnin búin að fá ullarsokka fyrir veturinn.  Ég fór eftir uppskrift frá Garnstudio.com og notaði Fabel garn eins og gefið er upp í uppskriftinni. Stroffið er hátt og gott, en sokkbolurinn varð alltof þröngur miðað við lengd, svo ég fækkaði verulega úrtökum eftir stroffið og hælinn. Þá urðu þeir fínir. Þeir eru á tvær fimm ára og eina þriggja ára skvísur og ársgamlan gæja.

Uppskriftin er hér.

Dúkkukjólar

 Dúkkurnar fengu aftur föt fyrir nokkru. Efnin eru öll afgangar af kjólum sem ég saumaði á ömmustelpurnar. Ég vatt mér í þetta til að prófa nýja overlockvél sem ég fékk mér fyrir rúmum mánuði. Segi betur frá henni seinna. En þetta var ágætis æfing. Dúkkufötin hér aðeins neðar á síðunni voru líka saumuð næstum alfarið á þessari nýju vél.

Sniðið af kjólunum er frá Norlin.

Vörðuklettur

Ég tók þátt í samprjóni Svalra sjala á fb í september. Mjög skemmtilegt samprjón sem er reyndar nýlokið, en ég var frekar fljót með sjalið. Garnið keypti ég hjá Kristínu í Vatnesyarn í sumar, ætlaði reyndar að prjónað annað úr því en fannst það passa vel í þetta sjal. Mjög ánægð með afraksturinn og nota það mikið.