Könnumottur - mug rugs og "give away" hjá LeKaQuilt

Nú er ég búin að sauma fjórar könnumottur til viðbótar við þær sem ég átti. Það er gott að eiga nóg af þeim fyrir tefólk eins og okkur, sem berum með okkur tebolla út um allt hús.

Ég nota alltaf sama grunnsniðið, en breyti bara myndum og litum. Þá passa þær allar saman.

LeKaQuilt er með "give away" á blogginu sínu, og er með nokkra hluti sem hún hefur saumað.  Hún er ótrúlega flínk bútasaumskona, og er mjög dugleg að applíkera í höndum.  Endilega skoðið bloggið hennar.

  Hér er slóðin : http://lekaquilt.blogspot.com/

Edinborg - London

Í haust fórum við hjónin til Edinborgar ásamt hópi fólks, og á röltinu rákumst við á litla hannyrðabúð, sem var að sjálfsögðu heimsótt. Þar keypti ég þessa mynd, sem ég er nú búin að sauma. Ég bætti reyndar nafninu við 

svo hún passaði betur í rammann.

Fyrir fjórum árum vorum við í London, og þar rakst ég á þessa mynd í Liberty.

Ég á líka útsaumaðan klukkustreng frá Færeyjum, en þar vann ég eitt sumar rúmlega tvítug. Hann á ég reyndar eftir að setja upp.

Peysukjólar

Ég saumaði mér tvo svona peysukjóla um daginn. Hún Lóa (Lóa-design á facebook, endilega skoðið) kenndi okkur kennurunum þetta. Efnið keypti ég í Twill, og teygjuskáböndin líka.

Rauði kjóllinn er úr teygjuefni, sem er æskilegra, en hinn ekki, samt er hann mjög fínn líka. Maður kaupir 80-90 cm af efni, 140 cm breiðu, og brýtur saman, saumar ermar úr teygjanlegu blúnduefni eða jerseyi á, gerir gat fyrir hálsmál, faldar það með teygjuskábandi og saumar saman í hliðum, þ.e. ferningur með ermum og hálsmáli.

Ég saumaði svo 15 cm teygju frá faldi upp í hliðarnar og teygði hana yfir 30 cm til að fá rykkingu. Ég notaði overlockvélina að sjálfsögðu, en það er enginn vand að gera þetta í venjulegri saumavél.

Síð peysa

Einhvers staðar á netinu sá ég peysu sem var prjónuð úr kambgarni og einbandi, og að sjálfsögðu varð ég að prófa það. Sniðið af peysunni er af "Keðju" úr bókinni Prjónað úr íslenskri ull, og munstrið er úr "Röngu".

Ég notaði prjóna nr. 4,5 og fékk sömu prjónafestu og með léttlopa. Í munstrinu hafði ég grátt kambgarn og brúnt einband.

Kragann prjónaði ég á grófari prjóna, 5,5, og notaði " bændamarkaðsstroff", þ.e. tvær sléttar umferðir sú þriðja slétt og brugðin.

Litlar hosur

 

Þrjú pör af ungbarnahosum, stærð 0 - 4 mánaða. Fínt að grípa í svona smáprjón þegar horft er á sjónvarpið á kvöldin. Uppskriftin er úr bókinni Sokkaprjón, en ég notaði fínni prjóna en gefið er upp, ég prjónaði á prjóna no. 2,5.

 

Posted with Blogsy

Inga - dömupeysa

Þessa peysu prjónaði ég um páskana.  Uppskriftin er í nýjasta tölublaði Húsfreyjunnar.  Hún er prjónuð úr tvöföldum plötulopa á prjóna nr. 5,5.  Sniðið er skemmtilegt því hún er aðsniðin í mittið.

Ég hafði mína gráa í stað svartrar og þurfti því að endurraða litunum í munstrinu aðeins, en ég er ánægð með útkomuna.  Svo bætti ég við smá kraga.

Lopapeysa á Baby Born

Þessi peysuuppskrift er úr bókinni Prjónað úr íslenskri ull.  Hún er úr léttlopa, og ég notaði mest afganga.  Uppskriftin heitir Dísa.

Blár ungbarnakjóll

Nú er orðið langt síðan ég hef sett nokkuð hér á bloggið, enda hefur ekki verið mikið að sýna. Allur tími og orka hefur farið í búferlaflutninga okkar hjóna. Ég náði þó að prjóna þennan kjól á minnstu frænkuna mína, hana Salvöru Veigu, sem varð eins árs þann 5. mars. Uppskriftin er úr Prjónablaðinu Ýr, úr blaði nr. 42.

Ég tók líka upp saumavélina til að sauma gardínur fyrir stofuna, fimm lengjur. Það var voða gott að sauma dálítið aftur. Nú erum við á fullu við að koma okkur fyrir á nýju heimili og nýtt saumaherbergi er að taka á sig mynd.

GLEÐILEGA PÁSKA!

 

Posted with Blogsy

Viðurkenning

Hún Anneli, sem er með bloggsíðuna Annelis hantverk, var svo hugguleg að senda mér viðurkenningu á blogginu sínu. Kærar þakkir, Anneli!! Ég hvet ykkur, sem lesið síðuna mína, að kíkja í heimsókn til hennar. Hún skrifar um ýmislegt auk handavinnu og tekur mjög fallegar myndir.

Tusen takk, Anneli, for denne award!!