Veggteppi

Á veggnum bak við borðið þar sem ég hef úsaumsvélina saumaði ég teppi sem var að hluta gert í þeirri vél. Nú er ég búin að taka af plássinu sem teppið hafði, teppið orðið of stórt og hefur fengið annan stað. Það er nefnilega þannig að þegar maður á útsaumsvél safnast að manni smátt og smátt töluverður tvinni. 

Útsaumstvinnakeflin eru frekar stór og finnst mér best að geyma þau í hillu. Ég keypti tvær smíðajárnshillur fyrir nokkrum árum á netinu, ætlaðar fyrir naglalakk. Þær taka samtals 60 kefli og eru fullar. Þá bætti ég við myndahillu úr Ikea, fyrst einni. Þær eru akkúrat nógu djúpar til að hægt sé að koma fyrir tveimur röðum af keflum í hillu. Svo bætti ég annarri við í vor og þá saumaði ég þetta litla teppi og lét það passa á vegginn. Blokkina fékk ég í EQ8 forritinu og saumaði með pappírssaumi. Eftir á sá ég að litapallettan í því passar við tvinnakeflin sem hanga allt í kringum það í þessu horni.

 Merkið komið á sinn stað, búið til í Spíralprógramminu í Platínum útsaumsforritinu,

Júníálfur

 Júníálfurinn fór upp á vegg í gær. Eins og áður hefur komið fram ætla ég að sauma álf fyrir alla mánuði ársins og láta litina í hattinum skírskota til árstíðarinnar á einhvern hátt. Hér lét ég fánalitina ráða ferð í tilefni þjóðhátíðardagsins.

Krosssaumur Karólínu

 Síðasta sumar heimsótti ég sýningu á Árbæjarsafni sem fjallar um Karólínu Guðmundsdóttur vefara og verk hennar. Alveg stórfóðleg sýning sem kemur á óvart. Mér skilst hún standi fram á næsta ár. 

Í tilefni sýningarinnar voru hannaðar og seldar útsaumspakkningar með munstrum frá Karólinu. Ég fékk tvær svona pakkningar í jólagjöf og lauk við að sauma báðar í febrúar. Svo hálfpartinn gleymdi ég þeim uppi í hillu en ætla að láta ramma þær inn. Það er líka hægt að nota þær í púða, en ég á svo marga útsaumaða púða að það er ekki á það bætandi. En það fer nú að verða lítið pláss á veggjunum líka….hlýt samt að koma þeim einhvers staðar fyrir.

Handklæði merkt

 Nokkur handklæði merkt fyrir bóndann. Allar leturgerðir fengnar úr MySewnet forritinu. Letrið lengst til vinstri er nokkurn veginn eins og hans eigin undirskrift á fangamarki sínu. Til viðbótar þeim fjölmörgu leturgerðum sem ég get valið um þar þá er í forritinu annað prógram, Quick Font, sem getur breytt öllum leturtegundum, sem eru í tölvunni sjálfri, í útsaumsletur. Hægt er að hafa stafina hallandi eða ekki, fyllta stafi, með eða án útlína og applíkeraða í öllum mögulegum stærðum. Og þá er ekki allt upp talið. Ég er búin að prófa ýmsa möguleika þar, en á bara prufur. 

Karin hverdagscardigan

 Ég saumaði nokkrar peysur á mig í fyrra eftir sniði frá Ida Victoria sem heitir Karin hverdagscardigan. Ég fór varla úr þeim í fyrrasumar. Sniðið gerir ráð fyrir þremur síddum, og hafði ég þær allar síðar. Reyndar er ég búin að stytta ermarnar á þremur þeirra í 3/4 sídd af því að ég ýti alltaf ermum upp og í staðinn fyrir að berjast við að halda þeim uppi á handleggnum klippti ég bara af þeim (og faldaði, að sjálfsögðu). 

Ég átti afgang af gráa efninu og þegar ég fór að mæla sá ég að hann myndi duga í miðsíddina af peysunni. Hún er bæði styttri, nær niður á mið læri, og með styttri ermar, mjög þægileg sídd. Efnið dugði nákvæmlega í hana.

Maíálfur

 Þessi álfur heilsar maímánuði, með bleikan blómahatt, sem minnir á sumarblómin sem vonandi verður hægt að setja í mold áður en næsti mánuður tekur við. Ég valdi bleikt vegna þess að ein litla blómarósin mín er mjög bleik í fatavali og á einmitt afmæli í maí.

Victoriakjolen aftur

Þegar ég finn gott kjólasnið þá sauma ég gjarnan fleiri en einn. Saumaði hann fyrst úr viscosaefni sem ég hafði átt lengi. Núna notaði ég bómullarjersey. Hann varð því aðeins þykkari og hlýrri, en mjög fínn. Þegar ég tók myndina var birtan erfið og liturinn er ekki svona blár, hann er grárri og ljósari.

Efnið pantaði ég frá Noregi, og ég verð að segja að það er aldrei leiðinlegt að fá svona sendingu.

 

Nærföt

Hvað gerir kona þegar alls kyns jerseyafgangar safnast upp og munstrin passa ekki alltaf í dúkkuföt? 

Jú, hún prófar að sauma nærbuxur. Ég hef aldrei haft nokkra trú á heimasaumuðum nærbuxum, þær gætu ekki verið þægilegur klæðnaður. En annað hefur komið í ljós. Þetta eru hinar ágætustu buxur, mjög gott að vera í þeim, og ekki síst bæði fljótlegt og gaman að sauma þær. Ég kantaði þessar með bómullarbandi, en á í pöntun teygjukantbönd líka sem ég hlakka til að prófa. 

Sniðið keypti ég hjá Ida Victoria í Noregi. Ég hef mjög góða reynslu af sniðunum hennar, þau passa mér alla vega vel. Svo er hún með Youtube rás þar sem hún fer í gegnum það hvernig hún saumar margar af flíkunum sínum. Hún selur líka efni og fleira. Mæli með. Hún er einnig með annan sníðapakka af nærbuxum handa konum, en ég valdi þennan. Svo er hún líka með snið fyrir börn.

 

Aprílálfur

Þá er álfurinn fyrir aprílmánuð kominn upp á vegg. Litaþemað á hattinum augljóslega tengt páskum, þótt hátíðin sé stundum í mars. Í þeim tilfellum er gult bara litur vorsins.

Hér er saumaskapurinn á lokastigi. Álfurinn er gerður í tveimur hlutum. Fyrst er það skeggið, nefið og fæturnir, það tekið úr rammanum og klippt frá undirlaginu og geymt á meðan hatturinn er gerður. Svo er allt fest saman á lokastiginu í vélinni. Ég gæti trúað að það taki hátt í tvo tíma hjá mér að gera einn álf.  Ég sauma 5 x 7” stærðina og nota 18 x 13 rammann. 

Uppskriftin er keypt hjá Kreativkiwi.