Bollamottur

Eins og ég hef áður skrifað hér þá notum við mikið mottur undir bolla og krúsir hér á heimilinu. Ég bætti í safnið um daginn og saumaði fleiri. Þessar má líka nota sem gólfmottur á heimili Barbie, það alla vega gert hér þegar ömmustelpurnar koma hingað. Motturnar eru alfarið saumaðar í útsaumsvélinni. 

Ég skellti saman tveimur munstrum. Mottan sjálf er upprunalega með texta sem ég sleppti en setti þess í stað þessar myndir af Sunbonnet Sue, sem ég hef alltaf verið hrifin af. Ég minnkaði myndirnar um 20% svo þær pössuðu.

 Bæði munstrin, þ.e. motturnar og myndirnar, eru fríar á síðu Kreative Kiwi. Hugmyndin er ekki mín heldur fékk ég hana frá konu sem er í fb hóp Kreative Kiwi.

Hjónahnútur

Fyrir löngu fann ég þetta munstur á netinu. Ég átti afgang af stramma og nóg af kambgarni, svo ég taldi bara út eftir myndinni sem ég fann og kláraði miðjuna. Svo lagði ég það frá mér í mörg ár en lauk við það fyrir nokkru.

Í heildina er munstrið mun stærra, breiður rammi í kringum fuglana, en ég setti bar mjóan ramma og lét það gott heita. 

 Svo bjó ég til lítinn púða sem fer vel með hinum nálapúðunum. Hann er saumaður með fléttusaum, eða gamla krosssaumnum. Upphaflega munstrið er byggt á munstri úr Sjónabókinni.

Ágústálfur

Þá hefur ágústálfurinn litið dagsins ljós. Það er alltaf skemmtilegt að fara í gegnum efnalagerinn og velja efni í hatt sem passar árstíðinni. Að þessu sinni eru það ber, reyndar hvorki blá né svört. 

Uppskriftin er frá Kreative Kiwi, margt skemmtilegt hjá þeim.
 

Saumað á Baby born

Mér finnst alltaf gaman að sauma dúkkuföt. Það eru alltaf not fyrir þau á þessu heimili og nóg til af efnivið. Ég á alls konar efnisafganga frá fatasaumi, sérstaklega jerseyefnum.

Þessi föt eru öll úr jerseyefnum, engar smellur eða riflásar, sniðin mjög einföld og fljótlegt að sauma þau. Sokkabuxurnar eru meira að segja eins að aftan og framan svo auðveldara sé fyrir börn að klæða dúkkurnar. Mér finnst samt fallegra að hækka buxur að aftan á Baby born og myndi gera það ef ég saumaði fleiri. Joggingbuxurnar hér að neðan voru líka eins að framan og aftan, en ég hækkaði þær upp að aftan. Betri þannig.

Sniðin keypti ég hjá Ida Victoria, fékk þau á PDF formi sem mér finnst allt í lagi þegar um svona litlar flíkur er að ræða, ekkert að líma, bara prenta út og klippa. Bolirnir hér að ofan eru allir saumaðir eftir sama sniði, bara mismunandi ermasídd og á einum er þeim alveg sleppt.

Í þessar nærbuxur er hægt að nota alveg ótrúlega litla búta. Í sníðapakkanum eru tvö snið, annað fyrir boxernærbuxur.

                             Nú geta dúkkurnar verið í nærbuxum í stíl við kjólana.

                         Hér þurfti ég að rifja upp hvernig maður setur smellur á flíkur. 

                                    Joggingbuxurnar og þetta pils hafa stroff í mittið.

Þennan nærbol saumaði ég í vor, en hann er ekki úr þessum sniðapakka heldur úr bókinni Sy og strikk dukkeklær eftir Anne Grethe Gaaserud. Ein ömmustelpan vildi strax fá að eiga hann.
 

Bugða

Þetta er sjalið Bugða. Var búin að veita því athygli í Garnbúð Eddu síðan uppskriftin kom út og dreif mig loksins í verkið. Ég átti allt í það nema bleiku tónana þrjá fyrir miðju. Þá keypti ég í mini hespum á Prjónagleðinni á Blönduósi í sumar og var þá byrjuð að prjóna fyrsta hlutann. 

Uppskriftin gerir ráð fyrir prjónastærð 3,5 en ég notaði prjóna nr. 4, finnst það koma vel út þannig, enda prjóna ég frekar fast. Bleikyrjótta garnið í fyrsta hlutanum er frá Dóttir Dyeworks, þrír bleiku tónarnir í miðjubekknum og í affellingunni frá Mal og dökk gráa garnið frá Rohrspatz&Wollmeise. Uppskriftin er eftir Eddu Lilju Guðmundsdóttur.

Það var gaman að prjóna þetta sjal, uppskriftin vel gerð og ég er farin að plana annað í öðrum litum.

 

Júlíálfur

 Þá er júlíálfurinn mættur á svæðið, blómlegur og sumarlegur. Hann er sá sjötti í röðinni, svo nú er ég hálfnuð til að eiga einn fyrir hvern mánuð. 

Fleiri litlir púðar

Ég saumaði nokkra litla púða fyrir nokkru og hafði í körfu fyrir barnabörnin með leikföngunum hér heima.  Þau hafa leikið sér ótrúlega mikið með þá, og ein ömmustelpan bað mig um að gera einn handa sér til að taka með heim. Þá saumaði ég auðvitað handa öllum og urðu þeir tveir á mann fyrir rest. Aðal málið hjá þeim var að fá að velja sér dýr og litinn á tvinnanum. Myndirnar eru ekki flóknar, en höfða greinilega til þeirra. Einfalt er stundum best.

Myndirnar eru úr Super designs í útsaumsforritinu mínu. 

 

Veggteppi

Á veggnum bak við borðið þar sem ég hef úsaumsvélina saumaði ég teppi sem var að hluta gert í þeirri vél. Nú er ég búin að taka af plássinu sem teppið hafði, teppið orðið of stórt og hefur fengið annan stað. Það er nefnilega þannig að þegar maður á útsaumsvél safnast að manni smátt og smátt töluverður tvinni. 

Útsaumstvinnakeflin eru frekar stór og finnst mér best að geyma þau í hillu. Ég keypti tvær smíðajárnshillur fyrir nokkrum árum á netinu, ætlaðar fyrir naglalakk. Þær taka samtals 60 kefli og eru fullar. Þá bætti ég við myndahillu úr Ikea, fyrst einni. Þær eru akkúrat nógu djúpar til að hægt sé að koma fyrir tveimur röðum af keflum í hillu. Svo bætti ég annarri við í vor og þá saumaði ég þetta litla teppi og lét það passa á vegginn. Blokkina fékk ég í EQ8 forritinu og saumaði með pappírssaumi. Eftir á sá ég að litapallettan í því passar við tvinnakeflin sem hanga allt í kringum það í þessu horni.

 Merkið komið á sinn stað, búið til í Spíralprógramminu í Platínum útsaumsforritinu,

Júníálfur

 Júníálfurinn fór upp á vegg í gær. Eins og áður hefur komið fram ætla ég að sauma álf fyrir alla mánuði ársins og láta litina í hattinum skírskota til árstíðarinnar á einhvern hátt. Hér lét ég fánalitina ráða ferð í tilefni þjóðhátíðardagsins.