Prjónaðar bjöllur

Nú hef ég prjónað bjöllur í fyrsta sinn, en hef heklað fullt af þeim.

Ég notaði heklugarn nr. 10 eins og ég hef heklað úr áður.

Uppskriftin er úr jólablaði Húsfreyjunnar 2012.

 

Posted with Blogsy

Annar toppur

Ég sé að ég hef ekkert sett á bloggið í október, þótt ýmislegt sé í gangi í saumaherberginu. Ég skelli því inn mynd af toppi, sem ég saumaði fyrir nokkrum vikum, en myndaði fyrst í dag. Hann er eftir sama sniði og þessi rósótti.

 

Posted with Blogsy

Enn ein peysan - prjónuð úr afgöngum

 

Ég held áfram að prjóna úr afgöngum, því eitthvað verður maður jú að hafa á prjónunum. Nú var það úr einföldum plötulopa, og ég kláraði rauða litinn áður en ég var búin með peysuna, og ég ætlaði ekki að kaupa meira. Þá var bara að róta í körfunni, og þessi grái varð endanlega fyrir valinu, og ég held bara að peysan sé betri fyrir vikið.

Uppskriftin er frá Drops.

 

Posted with Blogsy

Lítið bútasaumsstykki

 

Í þessu stykki ákvað ég að sleppa uppáhaldslitnum mínum, rauðum, og nota lit sem ég er alls ekkert fyrir, appelsínugulan. Ég held ég reyni þetta ekki aftur. Mér finnst ég stundum dálítið föst í uppáhaldslitunum mínum, en það er skemmtilegra að sauma úr þeim.

Svo stakk ég í höndum, mér finnst það alveg ótrúlega gaman.

 

Posted with Blogsy

Mr.Greenjeans - prjónuð úr uppraki

Ég rakst á þessa peysu á netinu, og varð að prjóna hana.

Uppskriftin er á Ravelry og heitir Mr.Greenjeans. Ef þetta nafn er slegið inn koma upp alls konar útgáfur af henni. Ég vildi helst hafa eitthvað annað en ull í henni, og mundi þá eftir peysu sem ég nota aldrei, og ákvað að rekja hana upp og nota garnið. Það er frá Dalegarn og er blanda úr bómull, hör og silki.

Tölurnar keypti ég hjá Heimilisiðnaðarfélaginu, en þær eru úr endurunnu efni.

Ég valdi að hafa peysuna hneppta alveg niður en uppskriftin gerir ráð fyrir einni tölu.

Þetta er peysan sem ég rakti upp.

 

Posted with Blogsy

Saumaður toppur

Þessi toppur var m.a handavinnan mín um helgina. Efnið keypti ég í Vogue, og sniðið í Föndru. Þetta er Onion snið nr. 5032. Ég ætla að sauma annan úr einlitu efni, sem ég á, því sniðið er mjög gott.

Posted with Blogsy

Lopapeysan Elín - prjónuð úr afgöngum

Þegar ég lagði af stað í ferðalag í sumar tók ég með mér afgangslopa, sem ég á nóg af, og uppskrift. Hún er í Fleiri prjónaperlum, og heitir Lopapeysan Elín. Peysan er prjónuð úr einföldum lopa. Í uppskriftinni er gert ráð fyrir tveimur tölum efst, en ég get hneppt minni niður. Ég valdi líka að hafa ermarnar stuttar vegna þess að ég bretti yfirleitt upp ermar, og svo entist lopinn akkúrat í peysuna eins og hún er. Hún passar vel og er mjög þægileg.

Posted with Blogsy

Still Light

 

Það eru margir mánuðir síðan ég prjónaði þessa peysu. Ég hef bara hvorki komið því í verk að nota hana eða sýna hana hér á blogginu. Garnið sem ég notaði heitir Rasmilla's yndlingsgarn 1 og fæst í garnbúð Gauju. Í því er 55% lambsull og 45% bómull. Þetta garn prjónast alveg óskaplega vel, og liggur alveg slétt í lykkjunum að loknu prjóni. Það lá við að óþarft væri að bleyta hana og leggja, en ég gerði það samt til að festa niður brotin í vösunum.

Uppskriftin heitir Still Light og fæst á Ravelry.

 

Posted with Blogsy

Sumarfiðrildi

 

Mér finnst alltaf gaman að skreyta eftir árstíðum, ekki bara á hátíðum. Ég heklaði nokkur svona fiðrildi nýlega, úr bómullarafgöngum. Svo set ég þau hingað og þangað, í blómapotta, á salerniskassann, í gluggakistuna o.s.frv. Uppskriftin er frá Whispering Forest Design og fæst ókeypis á Ravelry, og heitir þar Sweet Butterfly.

 

Posted with Blogsy