Chunky Twist

Við stelpurnar í fjölskyldunni viljum gjarnan tolla í tískunni.

Þess vegna prjónaði ég svona eyrnabönd á okkur allar sex eftir að önnur tengdadóttirin benti mér á að allir væru með svona núna og hvort ég gæti ekki gert svona fyrir hana og dæturnar.

Þær fengu þessi á myndinni fyrir ofan.

Hinar mæðgurnar ákváðu að vera báðar með sama lit á sínu.

Þetta er svo mitt.

Ég átti afgang af gráu frá því ég prjónaði mér peysu, hefði samt trúlega keypt þennan lit líka.

Öll eru prjónuð úr Drops Air, og eru dásamlega mjúk.

Uppskriftin heitir Chunky Twist og fæst á Ravelry.

Garnið keypti ég í Freistingasjoppunni á Selfossi og Skartsmiðjunni í Reykjanesbæ, og afgangsgarnið mitt var frá Gallery Spuna.

Vesti

Þegar elstu ömmustelpurnar mínar fæddust prjónaði ég á þær Lillies top.

Tengdadóttir mín bað mig um að prjóna vesti á litla soninn með sama munstri, sem ég gerði með gleði.

Ég hafði það styttra og án þess að taka inn í hliðunum.

Stærðin er á 0-3 mánaða, en svona vesti vaxa aðeins með börnunum.

Ég er farin að safna vestisuppskriftum núna til að eiga handa honum fyrir næstu ár. Mér finnast strákar svo fínir í vestum og svo er þetta svo hlýtt.

Jaki Romper

Jaki Romper frá Petit Knitting, prjónaður á ömmustrákinn. Ég hafði stærðina á sex mánaða, verður fínn um jólin.

Ég notaði uppgefið garn, sem er Dale Lerke, sem ég keypti hjá Rifssaumi á Ólafsvík í sumar.

Ég breytti uppskriftinni aðeins að aftan. Það átti að leggja böndin yfir strenginn og festa með tölum, en mér fannst það alltof þykkt til að þægilegt væri fyrir barnið að liggja á því, þannig að ég saumaði böndin bara við brún og sleppti tölum.

Það varð afgangur af garninu þegar buxurnar voru búnar, og ég náði að gera sokka í stíl.

Uppskriftin heitir Tykke Lubbe og er úr Klompelompes vinterbarn, stærð 3-6 mánaða.

Glasamottur

Ég nota glasamottur út um allt hús eins og áður hefur komið fram, og nú eru ömmustelpurnar farnar að sýna þeim áhuga. 

Ég greip þess vegna tækifærið og fann þessar myndir í útsaumsvélinni minni góðu.

Ég saumaði í hörefni frá Ikea og rósótta efnið er frá Tilda.

Kemur mér mikið á óvart hvað ég hef gaman af að nota útsaumsvélina, hélt að ég kæmist aldrei á þann stað. 

Prjónaðar samfellur

Prjónaði samfellur á fjórða barnabarnið eins og á öll hin. Systir hans notaði svona samfellur næst sér frá því hún fæddist, og ennþá er hún í samskonar nærbolum sem ég prjónaði á hana, komin á fimmta ár.

Þetta er minnsta stærðin, og eins og alltaf prjónuð úr Alpaca Silke frá Sandnes.

Buxur

Uppskriftin af þessum buxum er í Babystrik på pinde 3, 3. hefti.

Ég prjónaði þær úr Drops baby merino.

Stærðin er á 0-3 mánaða.

Heklaðir smekkir

Áður en litli ömmustrákurinn fæddist heklaði ég tvo smekki fyrir hann.

Uppskriftin er á tinna.is, og ég notaði Mandarin petit.

Vorlilja

Það er meira en ár síðan ég prjónaði Vorliljuna mína. Er samt bara nýbúin að þvo hana og taka í notkun. Ég keypti garnið í garngöngunni 2018. Bleiki liturinn er handlitað garn frá Héraði, en grái er Yaku frá litlu prjónabúðinni, hvort tveggja dásamlega mjúkt.

Snilldin við þetta sjal er að það er eins á réttu og röngu þrátt fyrir garðaprjón, rendur og kaðal.

Snilldarhönnun frá Auði Björtu Skúladóttur.

Uppskriftina keypti ég í Handprjóni í Hafnarfirði.

Skogtopplue

Einhvern tíma rakst ég á þessa húfuuppskrift á netinu.

Þegar ég fór að lesa hana nýlega sá ég að það átti að nota Drops Merino Extra Fine, en ekki á uppgefna prjónastærð fyrir það garn, sem er nr. 4, heldur á prjóna 3.

Ég átti heila dokku af þessum lit og gat ekki beðið með að prófa hvernig það gengi upp.

Ég gerði hana á eins árs þótt litli gæinn minn sé bara rétt að verða tveggja mánaða.  Húfan verður bara geymd.

En hún kom mjög vel út með þessari prjónastærð, þétt og hlý, og leggst vel að höfðinu.
Uppskriftin er frí á Ravelry.